Se ixtlamatki itoka Alan Duthie okijto itlaj itech ilibro Bible Translations: And How to Choose Between Them (Traducciones de la Biblia: ¿cómo elegir entre ellas?). Ye okijto: “Tla tejuatsin timokuayejyekoua Biblia iTlajtol toTajtsin Dios, tikneltoka ye touan motlapouia. Tla tikchiuaj tlen techiluiaj kanin timonechikouaj, miak ipati moBiblia mayeto ika motlajtol”.

Akinmej kipatioitaj tlen kijtoua Biblia ika nochi inyolo, kineltokaj “nochi tlen ijkuilitok itech iTlajtol toTajtsin Dios ye iaxka. Biblia techpaleuia matitlamachtikan, techititia ijkuak itlaj amo kuali kajki, techpaleuia matikyektlalikan nochi tlamantli uan ika tikinpaleuiaj oksekimej mamokuayejyekokan ijkon ken kijtouaj itlanauatiluan toTajtsin Dios” (2 Timoteo 3:​16). Miakej kijtouaj Biblia amo techpaleuia. Pero Biblia techpaleuia matikyektlalikan tlen mojmostla tikixnamikij porque “iTlajtol toTajtsin Dios yoltok uan kipia chikaualistli” (Hebreos 4:12). Pero moneki yetos ika totlajtol para uelis tiktlajtoltiskej, tikajsikamatiskej uan tikchiuaskej tlen ompa kijtoua.

Ikinon yitikpiaj ika náhuatl del centro Biblia iTlajtol toTajtsin Dios Traducción del Nuevo Mundo Mateo-Apocalipsis. Viernes 9 de junio 2023 itech se ueyi nechikol iTlaixpantijkauan Jehová okijtojkej yokiski nin Biblia. Nin Biblia amo oui uan kuali moajsikamati. Ika náhuatl del centro axkan okachi kuali moajsikamatis iTlajtol toTajtsin Dios. Pero xamo timotlajtlania akinmej otlapaleuijkej ijkuak okitlajtolkopkej nin Biblia.

Xamo akinmej tlajtouaj náhuatl del centro kitaskej yankuik Traducción del Nuevo Mundo de las Escrituras Griegas Cristianas pero nin yikajki desde 1950. Non xiuitl okikixtijkej ika inglés. Okikixtijkej akinmej pouij itech Watch Tower Bible and Tract Society. Yejuan kinkixtiaj miakej biblias ipan nochi tlaltikpak. Akin Tetlapouijtok 1 de febrero 1951 okijto: “Akinmej pouij itech nin comité para tlajtolkopaskej, okijtojkej [...] amo moneki ikaj kimatis akinmej otlajtolkopkej. Noijki amo moneki ikaj kimatis tlen intoka maski ok yoltokej noso yoixpolikej. Ijkon kichiuaj porque kinekij kiueyichiuaskej itoka toTajtsin Dios”.

Itech 1961 okikixtijkej ajsitok Traducción del Nuevo Mundo de las Santas Escrituras. Amikaj kimati akinmej otlajtolkopkej pero matikilnamiktokan yejuan otlajtolkopkej ika nochi inyolo. Biblia tlen okiski 2013 kanin kijtoua tlajtolmej tlen ika peua, kijtoua: “Tikilnamiktokej miak ipati tlen kijtoua Biblia ikinon oksepa otikitakej tlen kijtoua uan otikyektlalijkej. Tejuan tikpatioitaj kuali mamoajsikamati ikinon amitlaj tikajxitiliaj nion itlaj tikkixtiliaj [...]. Tejuan tiktlajtolkopaj ijkon ken yiuejkika okijkuilojkej pero kuali moajsikamati uan amo oui tiktlajtoltiskej”.

Traducción del Nuevo Mundo yokitlajtolkopkej san tlajko noso ajsitok ika kanaj 245 tlajtoli uan yokinkixtijkej kanaj 245 millones. ¿Tlen yokajsikej akinmej kitlajtoltiaj?

Jesús okinmilui idiscípulos ijkin mamotlatlaujtikan: “ToTajtsin Dios tlen tika iluikak, nochtin makitlakaitakan motoka” (Mateo 6:9). Biblia kijtoua toTajtsin Dios kipia itoka. Ye itoka Jehová uan nesi kanaj 7,000 veces (Éxodo 3:​15; Salmo 83:18). Sekimej opejki tlamachtiaj tlen amo melauak ijkuak oixpolikej nochtin iapóstoles Jesús. Ikinon miakej judíos amo okinekiayaj mamoijto itoka toTajtsin Dios (Hechos 20:29, 30; 1 Timoteo 4:1). Akinmej okijkuilouayaj iTlajtol toTajtsin Dios ika griego opejki kipatkayotiaj itoka Jehová ika tlajtoli “Dios” uan “toTeko”.

Comité de Traducción del Nuevo Mundo oksepa kitlalia itoka Jehová itech Escrituras Griegas Cristianas a uan nesi 237 veces. Ijkon kitlaliliaj porque kuali yotlatemojkej uan amo san porque ijkon kinekij kitlaliskej. Matikitakan tleka ijkon tikijtouaj. Lucas 4:​18 kijtoua tlen tikajsij itech Isaías 61:1. Yiuejkika ijkuak okijkuilojkej non versículo de Isaías ika hebreo, onesiaya itoka Jehová. Ikinon Biblia iTlajtol toTajtsin Dios Traducción del Nuevo Mundo ijkin kijtoua itech Lucas 4:​18: “Jehová onechmakak iespíritu, porque ye onechpejpenki manikinmatilti kuali tlajtoli akinmej amitlaj kipiaj”.

Ijkon akinmej kitlajtoltiaj kimatij akin Jehová uan akin Jesús. Miakej biblias kijtouaj itech Mateo 22:44: “ToTeko okilui noTeko” (King James Version). Pero amo momati akin kitlapouijtokej. Pero non texto kijtoua tlen tikajsij itech Salmo 110:1 uan ijkuak okijkuilojkej ika hebreo okipiaya itoka toTajtsin Dios. Ikinon Biblia iTlajtol toTajtsin Dios Traducción del Nuevo Mundo itech Mateo 22:44 kijtoua: “Jehová okilui noTeko”. Miak ipati tikmatiskej akin Jehová uan akin iKone (Marcos 13:32; Juan 8:​17, 18; 14:28). Moneki kuali tikinmixmatiskej akinmej yejuan para timomakixtiskej ijkon ken kijtoua Hechos 2:​21: “Momakixtis akin kinotsa Jehová ika itoka”.

Biblia iTlajtol toTajtsin Dios Traducción del Nuevo Mundo kinpia tlajtolmej ijkon ken verbos tlen kinpia tlajtoli griego. Axkan miakej tlajtolmej kinpiaj verbos tlen kiteititiaj tlen yopanok, tlen panotok uan tlen satepan panos. Pero tlajtoli griego kinpia verbos tlen kijtouaj itlaj mochiua, yomochi noso mochijtok. Matikitakan tlen okijto Jesús itech Mateo 7:7. Ika griego tlajtolmej “xiktlajtlantokan”, “xiktemojtokan” uan “xikuiuitekikan” kijtosneki nochipa moneki tikchiuaskej. Ikinon tlen okijto Jesús ijkin okitlajtolkopkej: “Xiktlajtlantokan uan namechmakaskej, xiktemojtokan uan nankajsiskej, xikuiuitekikan puerta uan namechtlatlapoliskej” (noijki xikita Romanos 1:​32; Gálatas 5:​15).

Nin Biblia kinpia okachi verbos uan amo sustantivos. Non tlapaleuia okachi kuali mamokaki tlen ijkuilitok. Itech seki versículos ayakmo okitlalijkej tlajtoli “tlanechikol”. Okitlalijkej “timonechikouaj” noso “monechikouaj”. Uan kinpia okseki tlajtolmej tlen okachi kinmixmatij. Nin Biblia kijtoua tlajtoli “acuerdo” uan ayakmo kijtoua “tlajtolsenkaualistli”. Noijki kijtoua “apóstol” uan ayakmo kijtoua “tlatitlanil”. Uan kinpia notas para miakej makajsikamatikan se tlajtoli ijkon ken yejuan kijtouaj kanin chantij. Non tlapaleuia amo oui makitlajtoltikan Biblia uan kuali makajsikamatikan.

Axkan yokitlajtolkopkej Escrituras Griegas Cristianas ika náhuatl del centro. Pero satepan kitlajtolkopaskej tlen ok poliui. Akinmej kitlajtoltiskej nin Biblia ika náhuatl del centro uelis kineltokaskej okitlajtolkopkej ijkon ken kajki ika inglés tlen amo oui uan kuali moajsikamati.

Porque Cuerpo Gobernante tlen kipiaj iTlaixpantijkauan Jehová kinyekana akinmej tlajtolkopaj. Okijtojkej san sekan tekipanoskej para kuali makisa tekitl (Proverbios 11:14). Ikinon ipan nochi tlaltikpak yokintlalijkej akinmej tlajtolkopaskej. Kanin kajki kali kanin kinyekanaj iTlaixpantijkauan Jehová okintlalijkej akinmej kinpaleuiaj akinmej tlajtolkopaj. Yejuan kinpaleuiaj akinmej tlajtolkopaj, kinnankiliaj tlen kinekij kimatiskej uan kitaj makitlajtolkopakan Traducción del Nuevo Mundo ijkon ken moneki. Okinyektlalijkej programas para kinpaleuis akinmej kitlajtolkopaj iTlajtol toTajtsin Dios. Ika nonmej programas okitlajtolkopkej ika inglés tlajtoli hebreo uan griego. Non kinpaleuia akinmej tlajtolkopaj okachi amo oui makinpejpenakan tlajtolmej ika intlajtol. Nonmej programas kinpaleuia akinmej kitlajtolkopaj Traducción del Nuevo Mundo pero okachi tlapaleuiaj tokniuan ijkuak tlajtolkopaj uan amo programas. Ijkon tlen kitlajtolkopaj kajki ken ijkuilitok ika inglés uan kuali moajsikamati.

Timitsyoleuaj ximomachti Biblia iTlajtol toTajtsin Dios Traducción del Nuevo Mundo Mateo-Apocalipsis. Uelis tiktlajtoltis itech jw.org, itech JW Library noso uelis tikinmiluis iTlaixpantijkauan Jehová mamitsmakakan se Biblia. Mitspaktis ken ijkuilitok uan ken mota. Noijki mitspaktis tlen kipia sejse libro uan mitspaleuis san niman xikinmajsi versículos. Pero uelis tikmatos tlen ompa kijtoua iTlajtol toTajtsin Dios, ijkuilitok ijkon ken moneki uan kuali moajsikamati ika motlajtol.