¿Tleka okinmiktijkej judíos? ¿Tleka okitekauili toTajtsin Dios ijkon ma pano?

MA MOKAKI IKA

Akinmej ijkon yotlajyouijkej motlajtlaniaj tleka ijkon okinpanok uan kinekij ikaj ma kinyolseui. Sekimej kijtouaj tla toTajtsin Dios techtlasojtla, ¿tleka amitlaj okichi ijkuak sapanoua okintlajyouiltijkej judíos?

Seki tlamantli tlen amo melauak itech toTajtsin Dios uan tlen opanok

Amo melauak: Sekimej kijtouaj tlajtlakoli tla timotlajtlaniskej tleka toTajtsin Dios okitekauili ijkon ma pano.

Melauak: Miakej tlakamej uan siuamej tlen otlaneltokakej noijki omotlajtlanijkej tleka toTajtsin Dios kitekauilia ma titlajyouikan. Profeta Habacuc okitlajtlani toTajtsin Dios: “¿Tleka tikchiua ma nikita tlamantli tlen amo kuali uan tiktekauilia ma techtlajyouiltikan?” (Habacuc 1:3, Martín Nieto,1992). ToTajtsin Dios amo okajuak Habacuc ijkuak ijkon okitlajtlani, ye okitekauili ma kijkuilokan itech Biblia tlen okijto profeta.

Amo melauak: ToTajtsin Dios amo kitekipachoua ijkuak titlajyouiaj.

Melauak: ToTajtsin Dios amo kipaktia ijkuak titlajyouiaj (Proverbios 6:16-19). Biblia kijtoua ijkuak okatka Noé, toTajtsin Dios “sapanoua omoyolkoko” porque tlakamej nochipa okichiuayaj tlen amo kuali (Génesis 6:5, 6). Ik non, tikmatokej okiyolkoko ijkuak okitak nochi tlen okinchiuilijkej judíos (Malaquías 3:6).

Amo melauak: ToTajtsin Dios okintlajyouilti judíos porque okichijkej tlen amo kuali.

Melauak: Itech achto siglo toTajtsin Dios okinkauili romanos ma kimoaxkatikan Jerusalén (Mateo 23:37-24:2). Pero ayakmo keman ijkon okichi. Porque ye “kinpatioita judíos uan akinmej amo judíos” (Romanos 10:12, Dios habla hoy [Versión Popular]).

Amo melauak: Tla melauak kajki toTajtsin Dios tlen techtlasojtla uan sapanoua chikauak, amo kitekauiliskia ma kinmiktikan judíos.

Melauak: ToTajtsin Dios kitekauilia ma pano tlen amo kuali pero amo itlajtlakol ijkuak ijkon panoua (Santiago 1:13; 5:11).

¿Tleka okitekauili toTajtsin Dios ma kinmiktikan judíos?

Ye kikaua ma titlajyouikan porque kineki kiteititis Satanás san tlakajkayaua. Biblia kijtoua Satanás tlanauatijtok uan amo toTajtsin Dios (Lucas 4:1, 2, 6; Juan 12:31). Biblia kijtoua ome tlamantli tlen techpaleuis ma tikajsikamatikan tleka toTajtsin Dios okitekauili ma kintlajyouiltikan judíos (Lucas 4:1, 2, 6; Juan 12:31).

ToTajtsin Dios techkauilia ma tikpejpenakan tlen tiknekij tikchiuaskej. Ye okinmilui Adán uan Eva tlen omonekiaya kichiuaskej pero amo okinchiualti ma kitlakamatikan. Yejuan inselti okipejpenkej kijtoskej tlen kuali uan tlen amo kuali pero tlen okipejpenkej okixnamik toTajtsin Dios, ik non, otlajyouijkej (Génesis 2:17; 3:6; Romanos 5:12). Yiuejkika miakej kipejpenaj tlen amo kuali, ik non, tlajyouiaj. Amochtli Statement of Principles of Conservative Judaism (Declaración de principios del judaísmo conservador) kijtoua: “Itech nochi tlaltikpak miakej tlajyouiaj porque kinekij san inselti moyekanaskej uan kipejpenaj tlen amo kuali”. ToTajtsin Dios amo techchiualtia ma tiktlakamatikan ye techkauilia ma tikpejpenakan tlen tiknekij tikchiuaskej.
ToTajtsin Dios kineki uan uelis kiyektlalis nochi tlen opanok. Ye yokijto kinyolitis miakej akinmej yoixpolikej, noijki nochtin judíos tlen okinmiktijkej. Noijki akinmej amo okinmiktijkej, toTajtsin Dios kichiuas ayakmo keman ma kilnamikikan tlen okinchiuilijkej (Isaías 65:17; Hechos 24:15). ToTajtsin Dios sapanoua techtlasojtla, ik non, tikneltokaj kichiuas tlen yokijto (Juan 3:16).

Miakej judíos maski okintlajyouiltijkej, axkan tlaneltokaj uan yolpakij. ¿Tlen okinpaleui? Yejuan okajsikamatkej tleka toTajtsin Dios kitekauilia ma titlajyouikan uan noijki okimatkej satepan kiyektlalis nochi tlen opanok.