Yiuejkika itech kalmej okipiayaj se metlatl tlen ika okichijchiuayaj harina. Siuamej noso tlakeualmej mojmostla okikuechoayaj xinachtli. Nochipa omokakiaya ken otlakuechoayaj (Éxodo 11:5; Jeremías 25:10).

Omoajsikej seki tlaixkopinalmej uan seki estatuillas itech ken okatka yiuejkika ueyi altepetl Egipto kanin mota ken omotekitiltiaya nin metlatl. Okipiaya ome temej: se tetl tlajkokueltik kanin okitlaliayaj xinachtli uan okipiaya okse tetl tlen ika otlakuechoayaj. Tlakeuali omotlankuaketsaya iixpan tetl tlajkokueltik uan okikitskiaya ika ome imauan metlapil. Uan niman ika miak chikaualistli metlapil okiuikaya tlayekapan uan tlakuitlapan pampa uelis kikuechoskia xinachtli. Se amochtli kijtoa metlapil okipiaya kanaj ome noso naui kilos. Tla ikaj okiuitekiaya ika metlapil uelis mikiskia (Jueces 9:50-54).

Metlatl miak ipati pampa kalchanejkej yiuejkika. Ik non, Biblia kijtoa: “Amo ikaj moneki kimoaxkatis se metlatl nion imetlapil, pampa kuali kimatis kikuepiliskej tlen iaxka, pampa kimoaxkatijtok inemilis ikaj” (Deuteronomio 24:6).

Biblia kijtoa Jesús “kajki iuan iPapan” (Juan 1:18, ITlajtol toTajtzin Dios). Nin tlajtoli kijtosneki Jesús uan Jehová sapanoa kuali mouikaj. Uan nin tlajtoli kisa itech ken yiuejkika okichiuayaj ijkuak otlakuayaj uan omotlaliayaj inakastlan ikaj.

Ijkuak okatka Jesús, judíos omotekayaj itech seki tlamantli tlen okiyaualoaya se mesa tlen amo uejkapa. Sejse omotekaya pampa mokauaskia iixpan mesa, uan inmikxiuan okatkaj tlakuitlapan, inmatlankua tlen okatka inpochma okitlaliayaj ipan se tsompali. Ijkuak ijkon omotlaliayaj inmayekma ueliskia kitekitiltiskiaj. Se amochtli kijtoa: “Ijkuak ijkon omotlaliayaj, itsonteko se tlakatl omokauaya ik ielpan se tlakatl tlen okatka ik ipochma”. Ik non, omoijtoaya okatka itech ielpan ikaj.

Sapanoa okipatioitayaj motlaliskiaj inakastlan akin okichi iluitl noso akin otlayekanayaj itech non kali. Ik non, itech yoak ijkuak Jesús okichi iCena toTeko iuan imachtijkauan, Juan okatka inakastlan Jesús, tlatitlanil tlen okachi okitlasojtlaya. Biblia kijtoa Juan “okachi omijkuani [omotekak ipan ielpan] inawak Jesús” pampa itlaj kitlajtlaniskia (Juan 13:23-25; 21:20).