Ma timokuayejyekokan itech tlen iaxka toTajtsin Dios
“Xikmosenmaka [ximokuayejyeko] nochi tlan yonimitsnajnawati, iwa ijkó nochteh kitaskeh tikyekchiwa moteki.” (1 TIMOTEO 4:15)
1, 2. ¿Tleka amo tikatej ken yolkamej?
TLALTIKPAKTLAKAMEJ amo ken yolkamej. ¿Tleka? Tikmatij titlajkuiloaj, titlajtoaj, tiktlajtoltiaj se amatl uan noijki tikajsikamatij tlen kijtoaj oksekimej tlaltikpaktlakamej. Noijki ueli tiktlatlaujtiaj Jehová uan tiktlakuikiliaj. Akinmej sapanoa momachtiaj amo kajsikamatij tleka tokuatitix ueli kichiua nochi nin tlamantli.
2 Uan amo san titlajtoaj, Jehová otechmakak okse tlamantli tlen kichiua amo ma tiyetokan ken yolkamej (Salmo 139:14; Apocalipsis 4:11). Ken otechchijchi ken ye, sejse uelis kipejpenas tlen kichiuas (Génesis 1:27). Ik non, tejuan tikpejpenaskej kox tiktekitiltiskej totlajtol pampa tikueyichiuaskej uan tiktekichiuiliskej Jehová.
3. ¿Tlen otechmakak Jehová pampa kuali ma tikpejpenakan tlen tikchiuaskej?
3 Jehová noijki otechmakak Biblia pampa uelis tikmatiskej ken moneki ma tikueyichiuakan uan ma tiktekichiuilikan. Axkan nochi Biblia noso san tlajko uelis tikajsiskej ika kanaj 2,800 tlatlamantli tlajtolmej. Ijkuak tiktlajtoltiaj Biblia uan itech timokuayejyekoaj, peua timokuayejyekoaj ken Jehová (Salmo 40:5; 92:5; 139:17). Uan tla ijkon timokuayejyekoaj, uelis kuali tikpejpenaskej tlen tikchiuaskej uan uelis tiyoltoskej nochipa (xiktlajtolti 2 Timoteo 3:14-17).
4. 1) ¿Tlen kijtosneki timokuayejyekoskej? 2) ¿Tlen tlajtlanilmej axkan tikinnankiliskej?
4 Timokuayejyekoskej itech itlaj kijtosneki san non tikpiaskej itech totsontekon, ichtaka uan kuali itech timokuayejyekoskej (Salmo 77:12; Proverbios 24:1, 2). Miak ipati ma tikxelokan kauitl pampa timokuayejyekoskej tlen timomachtiaj itech Jehová uan Jesús (Juan 17:3). Axkan tikinnankiliskej eyi tlajtlanilmej. 1) ¿Tlen techpaleuis ma timokuayejyekokan? 2) ¿Itech tlen tlamantli uelis timokuayejyekoskej? 3) ¿Tlen uelis tikchiuaskej pampa nochipa timokuayejyekoskej uan noijki ma techyolpakti?
¿TLEN TECHPALEUIS MA TIMOKUAYEJYEKOKAN?
5, 6. ¿Tlen techpaleuis ma tikilnamikikan uan ma tikajsikamatikan tlen tiktlajtoltiaj?
5 Tlaltikpaktlakamej uelis tikchiuaskej seki tlamantli uan amo itech timokuayejyekoskej, se neskayotl, timijyotiaj, tinejnemij uan okseki tlamantli. Pero ¿noijki ijkon tikchiuaj ijkuak itlaj tiktlajtoltiaj? Uelis tiktlajtoltijtokej se amatl uan timokuayejyekojtokej itech okseki tlamantli. ¿Tlen uelis tikchiuaskej pampa amo ijkon ma techpano? Moneki san itech non timokuayejyekoskej uan tikmatiskej tlen kijtosneki tlen tiktlajtoltijtokej. Uan ijkuak tlamis tiktlajtoltiskej se párrafo noso se tlaxelol, ma timotlajtlanikan: “¿Tlen nechmachtia tlen oniktlajtolti? ¿Kuali nikajsikamati?”.
Tla san ichtaka tiktlajtoltiaj Biblia techpaleuis ma timokuayejyekokan uan amo ma tikilkauakan
6 Akinmej momachtiaj kijtoaj ijkuak itlaj tiktlajtoltiaj uan tikoliniaj tokamak okachi kuali tikajsikamatij tlen tiktlajtoltiaj. Uan Jehová kimati nin pampa ye otechchijchi. Ik non, okinauati Josué ‘ichtakatsin [ma] kitlajtolti’ tlanauatil, ken san ye motlapouijtoskia (xiktlajtolti Josué 1:8). * Tla ijkon tiktlajtoltiaj Biblia, okachi kuali timokuayejyekoskej uan amo tikilkauaskej tlen otiktlajtoltijkej.
7. ¿Keman uan kanin moneki timokuayejyekoskej? (Xikita tlaixkopinal tlen ika peua tlamachtil.)
7 Uan melauak, ualeua oui kuali timokuayejyekoskej ijkuak timomachtiaj. Uelis tisotlauaj noso mokaki miak tlamantli tlen techkuejsoa. Ik non, moneki timokuayejyekoskej kanin amo itlaj techkuejsos uan ijkuak amo itlaj techtekipachos. Se neskayotl, ueyi tekiua David omokuayejyekoaya ijkuak yiyoak (Salmo 63:6). Uan Jesús okitemoaya kanin uelis mokuayejyekoskia uan motlatlaujtiskia kanin amo itlaj kikuejsoskia (Lucas 6:12).
¿ITECH TLEN UELIS TIMOKUAYEJYEKOSKEJ?
8. 1) ¿Itech tlen tlamantli uelis timokuayejyekoskej? 2) ¿Tlen kimachilia Jehová ijkuak tikintlapouiaj oksekimej itech ye?
8 Amo san moneki timokuayejyekoskej itech tlen tiktlajtoltiaj itech Biblia. Noijki ijkuak tikitaskej nochi tlen okichijchi toTajtsin Dios, uelis timotlajtlaniskej: “¿Tlen nechmachtia itech Jehová?”. Ijkuakon tiknekiskej tiktlasojkamatiliskej ika se tlatlaujtilistli. Uan tla tikatej iuan oksekimej tlaltikpaktlakamej uelis tikinmiluiskej tlen tikmachiliaj (Salmo 104:24; Hechos 14:17). Jehová techita uan yolpaki ijkuak itech timokuayejyekoaj, tiktlatlaujtiaj uan tikintlapouiaj oksekimej itech ye. Biblia kijtoa: “Uan iamoch toTajtsin Dios itech yolitilistli opejki moijkuiloa iixpan ye pampa akinmej kimauiliaj Jehová uan akinmej omokuayejyekoayaj itech itoka” (Malaquías 3:16).
¿Timokuayejyekoa ken uelis tikinpaleuis akinmej tikinmachtijtok ika Biblia? (Xikita párrafo 9)
9. 1) ¿Tlen okiluijkej Timoteo ma kichiua? 2) ¿Itech tlen uelis timokuayejyekoskej ijkuak timomachtijtokej pampa titetlapouiskej noso titlamachtiskej?
9 Tlatitlanil Pablo okilui Timoteo ma mokuayejyeko ken okitayaj oksekimej tlen okijtoaya, okichiuaya uan otlamachtiaya (xiktlajtolti 1 Timoteo 4:12-16). Tejuan noijki uelis timokuayejyekoskej itech nin tlamantli. Se neskayotl, ijkuak timoyektlaliaj pampa tikinmachtiskej ika Biblia, moneki tikxeloskej kauitl pampa timokuayejyekoskej tlen tikinmachtiskej. Ma timokuayejyekokan itech se tlajtlanilistli noso se neskayotl tlen kipaleuis akin tikmachtiskej kuali ma mouika iuan Jehová. Tla timokuayejyekoaj itech nin tlamantli okachi mochikauas totlaneltokilis uan titlamachtiskej ika yolpakilistli. Noijki moneki timokuayejyekoskej achto tiaskej titetlapouitiuij (xiktlajtolti Esdras 7:10). * Uelis tiktlajtoltiskej se tlakotonal itech amochtli Hechos, noso uelis timokuayejyekoskej itech se tlaxelol noso itech amatlajkuilolmej tlen tikintemakaj. Nin noijki techpaleuis ika yolpakilistli ma titetlapouikan (2 Timoteo 1:6). Noijki miak ipati ma timokuayejyekokan itech tlen kinekij tlaltikpaktlakamej tlen chantij ik kanin titetlapouiaj pampa uelis tikintlapouiskej uan okachi kinekiskej momachtiskej. Ijkon okachi kuali tiktekitiltiskej Biblia ijkuak titetlapouiaj (1 Corintios 2:4).
Ma tikxelokan kauitl pampa ma ajsi itech toyolo tlen tiktlajtoltiaj uan pampa tiktlasojkamatiliskej Jehová
10. ¿Itech tlen okseki tlamantli uelis timokuayejyekoskej?
10 ¿Tlen okseki tlamantli uelis timokuayejyekoskej? Tla itech uejueyij nechikolmej tikijkuiloaj tlen kijtoaj tokniuan, moneki ma tikxelokan kauitl pampa tikojpauiskej tlen otimomachtijkej. Uan ma timotlajtlanikan: “¿Tlen onechmachtijkej itech Biblia uan itech ialtepe Jehová?”. Noijki uelis timokuayejyekoskej itech tlen tiktlajtoltiaj itech revistas Akin Tetlapouijtok, ¡Despertad! noso itech okseki amatlajkuilolmej tlen techmakaj itech uejueyij nechikolmej. Noso ijkuak tiktlajtoltiaj itech Anuario ineskayo se tokni, ma timokuayejyekokan itech tlen okipanok pampa ajsis itech toyolo. Ijkuak tikintlajtoltiaj toamatlajkuiloluan, miak ipati inakastlan párrafo ma tikijkuilokan tlen okachi ipati. Nin techpaleuis ma tikilnamikikan tlen okachi ipati uan tlen uelis tiktekitiltiskej ijkuak tikintlapouiskej oksekimej noso ijkuak tiktlajpaloaj se tokni noso ikaj akin momachtijtok Biblia. Ijkuak timokuayejyekoaj miak ipati ma tikxelokan kauitl pampa tlen timomachtiaj ma ajsi itech toyolo uan pampa uelis tiktlasojkamatiliskej Jehová.
MOJMOSTLA MA TIMOKUAYEJYEKOKAN ITECH TLEN KIJTOA BIBLIA
11. 1) ¿Itech tlen moneki okachi ma timokuayejyekokan? 2) ¿Tleka miak ipati ma timokuayejyekokan itech Biblia? (Xikita tlajtoli tlen kiualika tlakxitlan.)
11 Okachi moneki ma timokuayejyekokan itech tlen kijtoa Biblia. Pero ¿uan tla se tonal ayakmo techkauiliaj ma tikpiakan Biblia? * Uelis techkixtiliskej Biblia, pero amo ikaj uelis kichiuas amo ma timokuayejyekokan itech tlamantli tlen achto otimokuayejyekojkej, ken seki tlaxelolmej noso tlakuikalmej (Hechos 16:25). Jehová techpaleuis ika iespíritu santo pampa tikilnamikiskej nochi tlen yitikmatij uan pampa tiyetoskej tiyolmelajkej (Juan 14:26).
12. ¿Tlen uelis tikchiuaskej pampa mojmostla tiktlajtoltiskej Biblia?
12 ¿Tlen uelis tikchiuaskej pampa mojmostla tiktlajtoltiskej Biblia? Ma tikitakan se neskayotl. Itech semana uelis tiktlajtoltiskej tlen motlajtoltis itech Biblia itech Tlamachtil pampa Akinmej Tetlapouiaj uan uelis itech non timokuayejyekoskej. Okseki tonalmej uelis tiktlajtoltiskej tlen kijtoa Mateo, Marcos, Lucas noso Juan, uan uelis timokuayejyekoskej itech tlen okichi uan otlamachti Jesús (Romanos 10:17; Hebreos 12:2; 1 Pedro 2:21). Uan pampa okachi techpaleuis tlen otiktlajtoltijkej, uelis tikintekitiltiskej amatlajkuilolmej tlen techiluia nochi tlen okichi Jesús, ijkon ken opanotiaya (Juan 14:6).
¿TLEKA MIAK IPATI MA TIMOKUAYEJYEKOKAN?
13, 14. 1) ¿Tleka miak ipati nochipa ma timokuayejyekokan itech Jehová uan Jesús? 2) ¿Tlen tiknekiskej tikchiuaskej tla timokuayejyekoaj itech Jehová uan Jesús?
13 Tla timokuayejyekoaj itech Jehová uan Jesús mochikauas totlaneltokilis (Hebreos 5:14; 6:1). Tla ayakmo timokuayejyekoaj itech Jehová, satepan ayakmo iuan timouikaskej (Hebreos 2:1; 3:12). Jesús okijto tla amo kuali tikseliaj tlen kijtoa Biblia, ouijkayotl, tomin uan tlen onka itech Tlaltikpak kichiuas ma timoxelokan itech Jehová (Lucas 8:14, 15).
14 Ik non, miak ipati nochipa ma timokuayejyekokan itech Biblia uan mojmostla okachi kuali ma tikixmatikan Jehová. Nin techyolchikauas pampa ma tikchiuakan ken ye uan noijki ijkon ma tikpiakan toyelis (2 Corintios 3:18). Tla timochijchikauaj, uelis nochipa okachi timomachtiskej itech Jehová uan iyelis. ¡Se ueyi tlateochiualistli! (Eclesiastés 3:11).
Tla timokuayejyekoaj itech Jehová uan Jesús okachi tiktekichiuiliskej Jehová ika yolpakilistli
15, 16. 1) ¿Ken techpaleuia ma timokuayejyekokan itech Jehová uan Jesús? 2) ¿Tleka ualeua amo timajxiliaj pampa timokuayejyekoskej? 3) ¿Tleka miak ipati ma timokuayejyekokan?
15 Tla timokuayejyekoaj itech Jehová uan Jesús okachi tiknekiskej tiktekichiuiliskej Jehová. Uan tla tikchiuaj ika yolpakilistli, noijki kitaskej tokniuan uan akinmej tikintlapouiaj. Uan noijki, ijkuak timokuayejyekoaj itech tlen okichi Jehová ijkuak okiualtitlanki Jesús topampa ma mikiki, tikajsikamatij tleka miak ipati ma timouikakan iuan toTajtsin Dios (Romanos 3:24; Santiago 4:8). Se tokni tlen itoka Mark tlen chanti itech ueyi altepetl Sudáfrica, kanaj eyi xiuitl otsaktoka pampa okatka yolmelajki. Ye kijtoa sapanoa kualtsin ijkuak mokuayejyekoa. Ijkuak okachi mokuayejyekoa okachi kimati itech Jehová. Uan noijki ijkuak itlaj kitekipachoa noso kiyolkokoa, kitlajtoltia Biblia uan satepan mokuayejyekoa itech tlen okitlajtolti. Nin sapanoa kiyolseuia.
16 Ualeua amo timajxiliaj pampa timokuayejyekoskej tlen tiktlajtoltiaj itech Biblia. ¿Tleka? Pampa axkan onka miak tlamantli tlen techtsakuilia. Patrick se tokni tlen chanti África kijtoa mojmostla kipia miak tlamantli tlen moneki kichiuas. Ualeua onka seki tlamantli tlen sapanoa kitekipachoa. ¿Tlen kichiua ijkuak ijkon kipanoa? Achto kitlatlaujtia Jehová uan kiluia nochi tlen kipanotok, uan ijkon okachi kuali mokuayejyekoa. Pampa uelis kichiuas nin moneki ma kixelo seki kauitl, pero ijkon okachi kuali mouika iuan Jehová. Uan noijki okachi kuali kajsikamati tlen kijtoa toTajtsin Dios (Salmo 94:19). Ken yotimomachtijkej, sapanoa techpaleuia mojmostla ma timomachtikan uan ma timokuayejyekokan itech tlen kijtoa Biblia. Uan miak ipati ma timochijchikauakan (Hechos 17:11).
¿KEN UELIS TIKPIASKEJ KAUITL PAMPA TIMOKUAYEJYEKOSKEJ?
17. ¿Tejuatsin keman timokuayejyekoaj itech Biblia?
17 Sekimej kualkan kitlajtoltiaj Biblia, mokuayejyekoaj uan motlatlaujtiaj. Oksekimej kichiuaj tlajko tonal ijkuak moseuijtokej. Oksekimej kichiuaj tiotlak noso achto kochiskej. Uan oksekimej kualkan uan yoak kitlajtoltiaj Biblia (Josué 1:8). Maski san tlen hora tikchiuaskej, tinochtin moneki ma tikxelokan kauitl pampa uelis tiktlajtoltiskej uan timokuayejyekoskej itech tlen kijtoa Biblia (Efesios 5:15, 16).
18. ¿Tlen kinmakas Jehová nochtin akinmej mokuayejyekoaj itech Biblia uan mochijchikauaj kichiuaskej tlen momachtiaj?
18 Jehová kijtoa kinteochiuas nochtin akinmej kitlajtoltiaj Biblia uan mochijchikauaj kichiuaskej ijkon ken ye kineki (xiktlajtolti Salmo 1:1-3). * Jesús okijto: “¡Okachi kuali yolpakilisojkeh akimeh kikakih itlajtol Dios iwa kitlakitah!” (Lucas 11:28). Pero tla timokuayejyekoaj itech tlen kijtoa Biblia, uelis tinemiskej ijkon ken kineki Jehová uan uelis tikueyichiuaskej, non tlen okachi ipati. Uan toTajtsin Dios techteochiuas pampa axkan tiyolpakiskej uan satepan itech Xochitlali tikpiaskej yolilistli tlen amo keman tlamis (Santiago 1:25; Apocalipsis 1:3).
^ párr. 6 Josué 1:8 kijtoa: “Nin amochtli itech Tlanauatil moneki amo keman tikkauas, uan tonal uan yoak moneki ichtakatsin tiktlajtoltis, pampa ijkon kuali tikchiuas nochi tlen ijkuilitok itech; pampa ijkon kuali tias itech moojui uan ijkon timoyekanas ika ixtlamatilistli”.
^ párr. 9 Esdras 7:10 kijtoa: “Esdras okiyektlali iyolo pampa kitaskia itlanauatil Jehová uan kitlakamatiskia uan kinmachtiskia israelitas tlanauatilmej uan tlaixkomakalistli”.
^ párr. 11 Itech revista La Atalaya (ika náhuatl del centro Akin Tetlapouijtok) 1 de diciembre 2006, xikita tlamachtil tlen itoka “Nuestra lucha para mantenernos espiritualmente fuertes”.
^ párr. 18 Salmo 1:1-3 kijtoa: “Yolpaki tlakatl akin amo kikaki tlen kijtoaj akinmej amo yolkualmej, uan amo moketsa itech inojui tlajtlakolejkej, uan amo motlalia kanin motlaliaj akinmej tepinatiaj. Okachi kuali, ye moyolpaktia ika itlanauatil Jehová, uan tonal uan yoak ichtakatsin kitlajtoltia itlanauatil. Uan melauak mochiuas ken se kuauitl tlen toktok itempa aueyatl, tlen kitemaka itlakilo ijkuak itonal uan ixijyo amo keman uaki, uan nochi tlen kichiuas kuali kisas”.
