¿SE TONAL MOYEKTLALIS TLALTIKPAK?
Kojyo
KOJYO tlapaleuia mayeto ejekatl chipauak uan ijkon uelis tiyoltoskej. Kojmej kitilanaj se gas tlen itoka dióxido de carbono tlen uelis techmiktis uan tlapaleuiaj mayeto oxígeno itech ejekatl tlen tikijyotilanaj. Kanaj 80% yolkamej uan xiuitl kajki itech kojyo. Tla amo yetoskia nochi non xiuitl amo uelis tiyoltoskiaj.
Kijtlakouaj kojyo
Sejse xiuitl sapanoua miak kojyo kitsontekij para uelis tlatokaskej. Itech 75 xiuitl tlen yopanok yokintsontekej sapanoua miakej kojmej uan non kichiua ayakmo mayeto okachi kojyo.
Ijkuak kitsontekij kojyo noijki pojpoliuij yolkamej uan nochi xiuitl tlen techpaleuia matiyoltokan.
Tlaltikpak okichijchijkej para uelis tiyoltoskej
Sapanoua tetlajtlachialti ijkuak oksepa moskaltiaj kojmej tlen yokintsontekej uan oksepa tlakojyoua. Ixtlamatkej noijki motlajtlachialtiaj ijkuak kitaj san niman seliaj uan moskaltiaj kojmej tlen okintsontekej uan oksepa kualtsin tlakojyoua. Matikitakan tleka ijkon tikijtouaj:
-
Sekimej ixtlamatkej okitakej tlen panoua ijkuak kitsontekij kojyo uan tlatokaj pero satepan kinkauaj tlalmej uan ayakmo tlatokaj. Sekimej ixtlamatkej omomachtijkej tlen okinpanok 2,200 tlalmej tlen katej América uan África. Yejuan okitakej kanaj majtlaktli xiuitl satepan otlaseliak uan oksepa otlakojyouak.
-
Itech revista tlen itoka Science sekimej ixtlamatkej okijtojkej panos kanaj 100 xiuitl oksepa tlaselias uan tlakojyouas. Ijkon peuas moskaltiskej kojmej, yetoskej yolkamej uan personas amo moneki itlaj kichiuaskej.
-
Itech altepetl Brasil sekimej ixtlamatkej okitakej tlen panoua ijkuak tlapaleuiaj mamoyektlali kojyo uan ijkuak amo tlapaleuiaj.
-
Noijki itech revista National Geographic sekimej ixtlamatkej okijtojkej omotlajtlachialtijkej ijkuak okitakej san ipan makuili xiuitl omoskalti kojyo uan ayakmo omonekiaya kintokaskej okseki kojmej.
Ixtlamatkej kijtouaj tlen moneki tikchiuaskej
Ipan nochi tlaltikpak miakej kitemouaj ken kimaluiskej kojyo uan kintokaj kojmej kanin yokintsontekej. Akinmej pouij Naciones Unidas okijtojkej nin tlamantli yotlapaleui porque yopanok 25 xiuitl ayakmo okachi kintsontekij kojmej.
Pero non amo okachi tlapaleuia. Akinmej tlapaleuiaj itech organización Global Forest Watch okijtojkej ok kitsontekij kojyo tlen okachi uejueyij ipan nochi tlaltikpak.
Miakej kitsontekij kojyo porque kitlaniliaj miak tomin ikinon ayakmo onka miak kojyo.
Katej akinmej kinmaluiaj kojyo para amo makintsontekikan miakej kojmej uan tlapaleuiaj makintokakan kojmej.
¿Tlen kijtoua Biblia panos satepan?
“Jehová a Dios okichi mamoskalti kouitl kuajkualtsin uan otlakiaya uelik tlakilotl” (Génesis 2:9).
Ijkuak amo okachi kojtsontekij san niman tlaselia porque toTajtsin Dios ijkon okitlali matlaselia. Ye kineki mayeto kojyo porque kimaluia tlen okichijchi.
Biblia techmachtia toTajtsin Dios amo kitekauilis makijtlakokan nochi tlen ye okichijchi. Ye amo kikauas makijtlakokan tlaltikpak uan nochi tlen ipan onka. Xikita tlamachtil “ToTajtsin Dios kijtoua kiyektlalis tlaltikpak” tlen kajki página 15.
a ToTajtsin Dios itoka Jehová (Salmo 83:18).
