¿SE TONAL MOYEKTLALIS TLALTIKPAK?
Ejekatl
EJEKATL amo san techpaleuia matimijyotikan. Ejekatl noijki kipaleuia tlaltikpak porque tonaltsin sapanoua tetlatia. Noijki tla amo yetoskia ejekatl, ipan nochi tlaltikpak seuaskia uan tisekmikiskiaj.
Ejekatl ayakmo chipauak
Ejekatl ayakmo chipauak ikinon uelis timokokoskej. Akinmej tlapaleuiaj itech Organización mundial de la Salud kijtouaj san 1% kijyotilanaj ejekatl chipauak.
Ejekatl tlen amo chipauak uelis kichiuas matechajsi cáncer itech topulmón, ayakmo uelis timijyotiskej uan ayakmo kuali tekipanos toyolo. Noijki sejse xiuitl ixpoliuij kanaj siete millones porque ejekatl ayakmo chipauak.
Tlaltikpak okichijchijkej para uelis tiyoltoskej
Tlaltikpak okichijchijkej para makipia ejekatl chipauak uan makijyotilanakan akinmej yoltokej. Pero yetoskia ejekatl chipauak tla amo okachi kisokiotiskiaj tlaltikpak. Matikitakan tleka ijkon tikijtouaj:
-
Kojyo kitilana dióxido de carbono. Miakej amo kimatij kojyo tlen kajki itempa atl okachi tlapaleuia. Kanaj majtlaktli uelta okachi kitilana dióxido de carbono uan non amo kichiuaj tepeyo.
-
Ixtlamatkej kijtouaj seki xiuitl uejueyi tlen moskaltia ijtik atl ijkon ken quelpo, kitokaj dióxido de carbono uan amo san kitilanaj. Ixijyo quelpo uelis uejka yas ixko atl porque ijyotentok. Toponi ijkuak yiuejka kajki uan quelpo apolaki kanin monamiki mar uan kiuika dióxido de carbono. Nesi ompa mokaua sapanoua miak xiuitl.
-
Ijkuak opejki kokolistli COVID-19, omotak uelis mochipauas ejekatl tlen kiyaualoua tlaltikpak. Xiuitl 2020 okintsakej miakej fábricas porque ayakmo ikaj otekipano uan noijki ayakmo okachi okinuikatinemiayaj carros. Non otlapaleui ayakmo mayeto sokio ejekatl uan san niman omochipa. Ixtlamatkej okitemakakej se Informe mundial sobre la Calidad del Aire 2020. Yejuan okijtojkej kanaj 80% itech miakej altepemej opejki mochipaua ejekatl porque opejki kokolistli.
Ixtlamatkej kijtouaj tlen moneki tikchiuaskej
Matiakan ipan tobicicleta uan ijkon amo okachi tiksokiotiskej ejekatl tlen kiyaualoua tlaltikpak.
Tekiuajkej kinmiluiaj akinmej kinpiaj fábricas ayakmo makikixtikan gases tlen kisokiotia ejekatl. Ixtlamatkej kitemouaj ken kichipauaskej ejekatl tlen sokio. Uelis kintekipanoltiskej okuilintsitsintin para makichipauakan ejekatl tlen sokio. Ixtlamatkej noijki kijtouaj matinejnemikan tla kanaj tiaskej, matiakan ipan tobicicleta uan matikmaluikan electricidad kanin tichantij.
Sekimej tekiuajkej kinmakaj personas tlen ika motlakualchiuiliskej para amo makisokiotikan ejekatl pero miakej amo kipiaj tlen ika motlakualchiuiliskej.
Pero amo san nin tlamantli moneki tikchiuaskej. Ijkon okijtojkej ixtlamatkej itech se informe tlen okichijkej 2022. Ijkon okijtojkej akinmej tlapaleuiaj itech Organización mundial de la Salud, Banco Mundial uan akinmej tlapaleuiaj itech uejueyij agencias tlen katej itech okseki altepemej.
Okijtojkej 2020 sekimej ijkuak omotlakualchiuiliayaj, otlatlatiayaj ika tlen kisokiotia ejekatl. Miakej amo ueli kimokouiaj se estufa noso okseki tlamantli tlen ika motlakualchiuiliskej.
¿Tlen kijtoua Biblia panos satepan?
“Nin tlen kijtoua akin melauak toTajtsin Dios, Jehová. Akin okichijchi iluikak […]. Akin okichijchi tlaltikpak uan nochi tlen tlamochiua, kichiua mamijyotikan akinmej itech chantij” (Isaías 42:5).
ToTajtsin Dios okitlali mayeto ejekatl uan seki tlamantli tlen kipaleuia mamochipaua. ToTajtsin Dios kipia chikaualistli uan techtlasojtla miak. Ikinon uelis tikneltokaskej kipojpolos nochi tlen kisokiotia ejekatl uan ijkon yetos chipauak. Xikita tlamachtil “ToTajtsin Dios kijtoua kiyektlalis tlaltikpak”.
