¿Tlen tikchiua ijkuak tikneki kanaj tias?

1. 1. ¿San te timokuayejyekoua ik kanin tias uan ijkon tiajsiti?

2. 2. ¿Tikintoka oksekimej porque timokuayejyekoua kixmatij ojtli?

3. 3. ¿Timoyekana ika GPS, titlatemoua itech mapa noso tiktlajtlania se moyolikni tlen kixmati ojtli?

Tla tikpejpenas tikchiuas tlen achto moijtoua xamo kanaj tiajsiti pero amo tiajsiti kanin otiknekiaya tias. Pero tiajsiti kanin tikneki tias tla tikpejpenas tikchiuas tlen saiktlami moijtoua.

Tonemilis yetoskia ken ijkuak kanaj tiauij porque moneki kuali tikpejpenaskej tlen ojtli tiktokaskej tla tiknekij tiyolpakiskej. Pero moneki ikaj matechyekana uan ijkon kuali tikpejpenaskej ik kanin tiaskej.

Seki tlamantli tlen tikpejpenaj amo okachi miak ipati pero okseki tlamantli uelis kipatlas tonemilis. Tlen tikpejpenaj tikchiuaskej kiteititis kox kuali toyelis uan kox tikchiuaj tlen kuali. Tlen tikpejpenaskej uelis techpaleuis noso techijtlakos uan noijki akinmej tikintlasojtlaj. Matikitakan seki tlamantli tlen moneki tikpejpenaskej tikchiuaskej:

• ¿Akinmej san sekan uelis motekaskej uan tlen kichiuaskej akinmej yomonamiktijkej?

• Amo matitlachtekikan, matikitakan kanin titekipanoskej uan matikitakan tomin ken moneki.

• ¿Ken tikinmiskaltiskej konemej?

• ¿Ken moneki timouikaskej inuan oksekimej?

¿Ken tikmatij uelis tiyolpakiskej iuan tofamilia tla kuali tikpejpenaskej tlen tikchiuaskej?

Moneki matimotlajtlanikan: “¿Tlen nechpaleuis manikchiua tlen kuali?”.

Nin revista mitspaleuis xikneltoka Biblia mitsyekanas uan mitspaleuis xikpejpena tikchiuas tlen kuali.