1. ¿Tleka tikijtoaj nochi tlen onka iaxka Jehová? (Xikita foto kanin peua tlamachtil).

“ILUIKAK uan tlaltikpak uan nochi tlen itech onka” iaxka Jehová (Deut. 10:14; Apoc. 4:11). Ye otechchijchi, ik non, tiiaxkauan (Sal. 100:3). Maski timiakej, Jehová yokinpejpenki sekimej tlen sapanoa kinpatioita.

2. ¿Akinmej iaxkauan toTajtsin Dios?

² Salmo 135 kijtoa Jehová okinpejpenki israelitas “para ma yetokan iaxkauan” (Sal. 135:4). Noijki amochtli tlen okijkuilo Oseas okijto sekimej amo yetoskiaj israelitas tlen pouiskiaj itech ialtepe Jehová (Os. 2:23). Nin profecía omochi ijkuak toTajtsin Dios opejki kinpejpena akinmej amo okatkaj judíos para tlanauatiskej iuan Jesús ompa iluikak (Hech. 10:45; Rom. 9:23-26). Ninmej okinpejpenkej ika espíritu santo uan motokayotiaj “se pueblo non iaxka Dios” (1 Ped. 2:9, 10). Noijki tokniuan tlen kichiaj chantiskej tlaltikpak iaxkauan toTajtsin Dios (Is. 65:22).

3. (1) ¿Akinmej iuan mouika Jehová? (2) ¿Tlen timomachtiskej?

 ³ Akinmej yaskej iluikak uan akinmej mokauaskej tlaltikpak san sekan kiueyichiuaj Jehová uan kitekichiuiliaj (Luc. 12:32; Juan 10:16). Sapanoa tiktlasojkamatiliaj Jehová porque tikpatioitaj touan mouika. Ik non, axkan timomachtiskej ken uelis tiktlasojkamatiliskej Jehová porque techkauilia iuan ma timouikakan.

4. (1) ¿Ken uelis tiktlasojkamatiliskej Jehová porque techkauilia iuan ma timouikakan? (2) ¿Tlen okichi Jesús?

⁴ Tikteititiaj tiktlasojkamatiliaj Jehová ijkuak ixpan timotemakaj. Uan ijkuak otimoapolaktijkej, otikteititijkej inmixpan oksekimej tiiaxkauan Jehová uan otikijtojkej tiktlakamatiskej (Heb. 12:9). Jesús noijki ijkon okichi ijkuak omoapolakti, yetoskia ken okilui iTajtsin: “Nechyolpaktia nikchiuas motlanekilis” (Sal. 40:7, 8). Maski Jesús ijkuak oneski yopouiaya itech ialtepe Jehová, ye oksepa okilui iTajtsin kichiuaskia tlen kineki.

5. ¿Ken omomachili Jehová ijkuak Jesús omoapolakti?

⁵ ¿Ken omomachili Jehová ijkuak Jesús omoapolakti? Biblia kijtoa: “Ijkuak Jesús okiski de ijtik atl, okitak owalmotlapo n ilwikak iwa Iespíritu n Dios owaltemok ipan Jesús kemi se palomatsi. Iwa itech ilwikak omokak se tlájtoli non okijtoaya: —Ye nin Nokone non saikpanoa niktlasojtla, iwa satlawel nechyolpaktia” (Mat. 3:16, 17). Jehová sapanoa oyolpakik porque iKone kitekichiuiliskia. Noijki yolpaki ijkuak ixpan timotemakaj uan techteochiua (Sal. 149:4).

6. Xikijto ken momachilia Jehová ijkuak ixpan timotemakaj.

⁶ Para tikajsikamatiskej ma tikitakan ken momachilia Jehová ijkuak ixpan timotemakaj. Ma tikijtokan se tlakatl kitoka kuajkualtsin xochitl. Uan se tonal itakotsin kiteki se xochitl uan kitliokolia. Maski ye iaxka xochitl, yolpaki ijkuak itakotsin kitliokolia porque ijkon kiteititia kitlasojtla. Teta kita non xochitl sapanoa kuajkualtsin porque okimakak itakotsin. Noijki ijkon Jehová sapanoa yolpaki ijkuak ixpan timotemakaj (Éx. 34:14).

7. ¿Ken techpaleuia tlen okijkuilo Malaquías ma tikajsikamatikan ken momachilia Jehová ijkuak tiktekichiuiliaj ika nochi toyolo?

⁷ (Xiktlajtolti Malaquías 3:16). ¿Tleka moneki ma timotemakakan ixpan Jehová uan ma timoapolaktikan? Tiiaxkauan Jehová desde ijkuak peua timoskaltiaj ijtik tonantsin. Pero ijkuak tiknekij ma techyekana uan ixpan timotemakaj para tikchiuaskej tlen ye kineki, sapanoa yolpaki (Prov. 23:15). Uan noijki akinmej kitekichiuiliaj ika nochi inyolo kinmijkuiloa intoka itech iamoch.

8, 9. ¿Tlen kineki Jehová ma kichiuakan akinmej kinekij ma ijkuilito intoka itech iamoch?

⁸ Moneki tikchiuaskej seki tlamantli tla tiknekij ma ijkuilito totoka itech iamoch Jehová. Malaquías okijto ma tikmauilikan toTajtsin Dios uan ma timokuayejyekokan itech itoka. Pero Jehová  kipojpolos totoka itech iamoch tla tikueyichiuaj okseki tlamantli (Éx. 32:33; Sal. 69:28).

⁹ Timotemakaskej ixpan Jehová amo san kijtosneki timoapolaktiskej uan tikchiuaskej tlen kineki. San se uelta timoapolaktiaj pero tiktekichiuiliskej Jehová nochipa tikchiuaskej. Ik non, mojmostla ma tikteititikan ika tlen tikchiuaj tiktlakamatij Jehová (1 Ped. 4:1, 2).

10. ¿Tleka moneki ma mota akin kitekichiuilia Jehová uan akin amo?

¹⁰ Itech okse tlamachtil otimomachtijkej tlen okipanok Caín, Salomón uan israelitas. Yejuan okijtoayaj okiueyichiuayaj toTajtsin Dios pero amo okatkaj yolmelajkej. Ninmej neskayomej techititiaj amo san moneki tikijtoskej tikueyichiuaj Jehová, moneki ma tikchiuakan tlen kuali uan ma tikixtopeuakan tlen amo kuali (Rom. 12:9). Jehová kijtoa moneki “nankitaskej akin yolmelauak uan akin amo yolkuali, akin kitekichiuilia toTajtsin Dios uan akin amo kitekichiuilia” (Mal. 3:18).

11. ¿Tleka moneki ma kitakan tikueyichiuaj Jehová?

¹¹ Tiktlasojkamatiliaj Jehová porque otechpejpenki ma tipouikan itech ialtepe. Ik non, moneki ma mota kox tikpiaj chikauak totlaneltokilis (1 Tim. 4:15; Mat. 5:16). Ma timotlajtlanikan: “¿Oksekimej kitaj niyolmelajki ixpan Jehová? ¿Niyolpaki ijkuak oksekimej nikinmiluia niiTlaixpantijka Jehová? Ma timokuayejyekokan ken momachilis Jehová tla tipinauaj tikinmiluiskej oksekimej tiiTlaixpantijkauan (Sal. 119:46; xiktlajtolti Marcos 8:38).

12, 13. ¿Tleka ualeua oui tikitaskej akin iTlaixpantijka Jehová?

¹² Techyolkokoa sekimej tokniuan kichiuaj ken akinmej amo kitekichiuiliaj  Jehová (1 Cor. 2:12). Akinmej amo kitekichiuiliaj Jehová san kichiuaj tlen yejuan kinekij (Efes. 2:3). Maski yotechiluijkej ken timotlakentiskej uan ken timoyektlaliskej, miakej tokniuan ok tilintok motlakentiaj uan noijki ijkon motlakentiaj ijkuak monechikoaj. Oksekimej amo kualtsin moximaj uan amo kualtsin moxiluiaj (1 Tim. 2:9, 10). Ik non, amo mota akin kitekichiuilia Jehová uan akin amo kitekichiuilia (Sant. 4:4).

¹³ Oksekimej tokniuan noijki kichiuaj ken akinmej amo kitekichiuiliaj Jehová. Ijkuak mijtotitiuij, mijtotiaj uan kichiuaj ken akinmej amo kichiuaj ken Cristo. Itech Internet kintlaliaj fotos uan kijkuiloaj tlen kiteititia amo kipiaj chikauak intlaneltokilis. Xamo amo kinkixtiaj itech tlanechikol porque amo sapanoa tlajtlakolchiuaj pero kinmijtlakoaj akinmej mochijchikauaj kitlakamatiskej Jehová (xiktlajtolti 1 Pedro 2:11, 12).

14. ¿Tlen moneki tikchiuaskej para nochipa timouikaskej iuan Jehová?

¹⁴ Nochi tlen kiyekana Satanás “tokuerpo kelewia, toixtololowah noiwa kelewiah tlan kita, iwa tikneki matechweyilikah” (1 Juan 2:16). Tejuan tiiaxkauan Jehová, ik non, ma tikixtopeuakan “nochi tlan amokuali techyoltilanah itech nin tlaltíkpaktli” uan “matinemikah ika totlalnamikilis chipawak, matinemikah ika yolsewílistli iwa matikmopantikah Dios” (Tito 2:12). Ik non, moneki ma tikteititikan san Jehová tikueyichiuaj ika tlen tikijtoaj, ijkuak titlakuaj, ijkuak itlaj tikonij, ken timotlakentiaj uan ken titekitij (xiktlajtolti 1 Corintios 10:31, 32).

15. ¿Tleka moneki ma tikintlasojtlakan tokniuan?

¹⁵ Ijkuak tikintlasojtlaj tokniuan tikteititiaj kuali timouikaj iuan Jehová.  Tokniuan noijki iaxkauan. Nochipa tikintlasojtlaskej tla tikilnamiktoskej iaxkauan toTajtsin Dios (1 Tes. 5:15). Jesús okinmilui imachtijkauan: “Tla nomejwah nonmosepantlasojtlah, nochteh n tlaltikpaktlakah nomechitaskeh nomejwah de milajka notlamachtijkawah” (Juan 13:35).

16. ¿Ken kinmita Jehová itekipanojkauan?

¹⁶ Tlanauatil tlen okijkuilo Moisés techpaleuis ma tikmatikan ken moneki tikinmitaskej tokniuan. Itech iteokal Jehová okatkaj tepalkamej tlen san okintekitiltiayaj ijkuak okiueyichiuayaj. Tlanauatil okijtoaya levitas omonekiaya kinmaluiskej nonmej tepalkamej uan akin amo okinekiaya kitlakamatis non tlanauatil, omonekiaya kimiktiskej (Núm. 1:50, 51). Tla Jehová okitekipachoaya ken kinmaluiskiaj tepalkamej, tejuan okachi techmaluis porque ixpan otimotemakakej uan timochijchikauaj tiyetoskej tiyolmelajkej. Uan Jehová okijto ijkuak ikaj kintlajyouiltia itekipanojkauan, yetoskia ken ye kitsopitiliaj ixtololo (Zac. 2:8).

17. ¿Tlen kita Jehová?

¹⁷ Malaquías kijtoa Jehová kinkaki itekipanojkauan ijkuak san sekan katej (Mal. 3:16). Jehová melauak “kinmixmatok nochteh iaxkawah” (2 Tim. 2:19). Ye kimati tlen tikchiuaj uan tlen tikijtoaj (Heb. 4:13). Jehová kita kox tikintlasojtlaj tokniuan. Noijki kita ijkuak timotlapojpoluiaj, ijkuak techpaktia tiktemakaskej tlen tikpiaj uan ijkuak timotlasojtlaj (Heb. 13:16; 1 Ped. 4:8, 9).

18. ¿Ken tikteititiaj tiktlasojkamatiliaj Jehová tipouij itech ialtepe?

¹⁸ Tiknekij tikteititiskej tiktlasojkamatiliaj Jehová porque tipouij itech ialtepe. Kuali otikchijkej ixpan otimotemakakej. Maski tichantij “intsalko n amokualteh iwa n tlajtlakolchijkeh”, tiknekij ma kitakan amo itlaj totlajtlakol uan ‘titlawiah kemi n sítlalteh ixpa n tlaltikpaktlakah’ (Filip. 2:15). Ik non, ma tikixtopeuakan tlen amo kuali (Sant. 4:7). Ijkon tikteititiskej tiiaxkauan Jehová tla tikintlasojtlaj tokniuan uan tikintlakaitaj (Rom. 12:10).

19. ¿Ken kinteochiua Jehová itekipanojkauan?

¹⁹ Biblia kijtoa Jehová amo keman kikauas ialtepe (Sal. 94:14). Jehová amo keman techkauas maski san tlen techpanos. Maski timikiskej Jehová nochipa techilnamiktos (Rom. 8:38, 39). “Tla tiyoltokej, tiyoltokej para Jehová, tla timikiskej, timikiskej para Jehová. Ik non, tla tiyoltokej noso timikiskej, tiiaxkauan Jehová” (Rom. 14:8, TNM). Noijki tikchiaj tonal ijkuak Jehová kinyolitis iyolikniuan yolmelajkej (Mat. 22:32). Uan axkan noijki tikpiaj miak tlateochiualistli. Ijkon ken kijtoa Biblia: “Melauak yolpakij nochtin akinmej inTajtsin Dios Jehová, altepetl akin ye ineuian yokipejpenki para ma yeto iaxka” (Sal. 33:12).