TINOCHTIN tiknekij tiyolpakiskej pero axkan onka “miak tlaijyowílistli” (2 Tim. 3:1). Pero miakej kinpanoa tlen amo kuali, mokokoaj, amo kipiaj tekitl noso omikik akin sapanoa okitlasojtlayaj. Noijki tiitekipanojkauan Jehová xamo timoyolkokoaj uan ayakmo tiyolpakij. Tla ijkon techpanotok, ¿tlen techpaleuis oksepa ma tiyolpakikan?

Achto tikitaskej tlen kijtosneki tiyolpakiskej uan ken yolpakij sekimej maski kixnamikij ouijkayotl. Satepan tikitaskej tlen tikchiuaskej uan ijkon nochipa tiyolpakiskej.

Yolpakilistli amo kijtosneki ijkuak ikaj ixuetskatok. Ma tiktlalikan se neskayotl. Akin tlauana uelis sapanoa uetskas. Pero ayakmo ixuetskatok ijkuak ayakmo tlauantok uan kilnamiki kipia miak ouijkayotl. San oixuetskatoka pero amo melauak oyolpakiaya (Prov. 14:13).

Yolpakilistli amo san kijtosneki tiixuetskatoskej. Akin melauak yolpaki kipia noso kichia itlaj tlen sapanoa kuali. Tiyolpakiskej kijtosneki kuali tiyetoskej maski tikixnamikiskej ouijkayotl (1 Tes. 1:6). Ikaj uelis yolpakis maski amo kuali momachilia. Ma tikitakan se neskayotl. Tlatitlanilmej okinuitekej porque otetlapouiayaj itech Cristo. Pero Biblia kijtoa “owalkiskeh de kan okatkah n tekiwajkeh ika miak pakílistli, porke Dios okinkawili matlaijyowikah iwa makimpijpinawikah por okitenewayah Itoka n Jesús” (Hech. 5:41). Oyolpakej porque okatkaj yolmelajkej ixpan toTajtsin Dios uan amo porque okinuitekej.

Amo ikaj nesi yiyolpaktok noso porque ijkon iyelis. ¿Tleka amo? Porque yolpakilistli poui itech iespíritu santo toTajtsin Dios. Uan nin espíritu techpaleuia ‘matimoyolpatlakah’ uan ma tiyolpakikan (Efes. 4:24; Gál. 5:22). Ijkuak tiyolpakij okachi amo oui tikixnamikij ouijkayotl.

Jehová okinekiaya kuali ma tiyetokan uan amo ken axkan tikatej. Jehová ok yolpaki maski miakej kichiuaj tlen amo kuali. Biblia kijtoa: “Chikaualistli uan pakilistli katej kanin ye kajki” (1 Crón. 16:27). Uan yolpaki ijkuak itekipanojkauan kichiuaj tlen kuali (Prov. 27:11).

¿Ken uelis tikchiuaskej ijkon ken Jehová? Ijkuak itlaj amo kisa ken otiknekiayaj, amo sapanoa ma timotekipachokan. Okachi kuali, ma tiyolpakikan, ma tikitakan kuali tlen tikpiaj uan ma timochiakan ma moyektlali tlen techtekipachoa. *

 Biblia techtlapouia itech miakej itekipanojkauan toTajtsin Dios tlen oyolpakej maski okixnamikej ouijkayotl. Ijkon okipanok Abrahán. Oyolpakiaya maski okixnamik ouijkayotl uan ualeua yimikiskia (Gén. 12:10-20; 14:8-16; 16:4, 5; 20:1-18; 21:8, 9). ¿Tleka nochipa oyolpakik? Nochipa okilnamiktoka se tonal yetos itech xochitlali ijkuak ualtlanauatis Mesías (Gén. 22:15-18; Heb. 11:10). Jesús okijto: “Nomotata Abraham, opaki ijkuak okima niwalaskia” (Juan 8:56). Noijki uelis tiyolpakiskej ken Abrahán tla timokuayejyekoskej itech tlen tikseliskej itech xochitlali (Rom. 8:21).

Ijkon ken Abrahán, tlatitlanil Pablo uan Silas okilnamiktokaj tlen okijto toTajtsin Dios. Porque yejuan okipiayaj itlaneltokilis, non okinpaleui ma yolpakikan maski okixnamikej ouijkayotl. Se tonal sapanoa okinuitekej ika tlakotl uan okintsakej. Pero Biblia kijtoa: “Ik tlajko yuak, Pablo iwan Silas omotiotsajtsilijtokah iwa okitlakuikilijtokah Dios” (Hech. 16:23-25). Otlaxikojkej porque okilnamiktokaj tlen okijto toTajtsin Dios uan noijki okimatiayaj otlajyouijtokaj porque okatkaj imachtijkauan Jesús. Tla tiknekij tikchiuaskej ken yejuan, ma tikilnamikikan ken techteochiua Jehová tla tiktekichiuiliaj ika nochi toyolo (Filip. 1:12-14).

Axkan noijki miakej tokniuan yolpakij maski kixnamikij ouijkayotl. Se neskayotl, noviembre itech 2013 se chikauak ejekakiauitl noso supertifón tlen itoka Haiyan otlaijtlako ompa Filipinas. Okinxixini kanaj mil inkaluan iTlaixpantijkauan Jehová. Ijkon okipanok se tokni tlen itoka George, tlen chanti ompa Tacloban. Ye okijto: “Tinochtin tiyolpakij maski sapanoa otitlajyouijkej”. Tla timokuayejyekoaj tlen topatka yokichi Jehová uan tiktlasojkamatiliaj, tiyolpakiskej maski tikixnamikiskej ouijkayotl. ¿Tlen okseki tlamantli techmaka Jehová para ma tiyolpakikan?

Okachi tiyolpakij porque timouikaj iuan Jehová. Tikixmatij akin Ueyi tekiua itech nochi semanauak. Ye toTajtsin Dios uan toyolikni (Sal. 71:17, 18).

Noijki tiyolpakij porque tiyoltokej uan onka miak tlamantli tlen kualtsin (Ecl. 3:12, 13). Ken Jehová okichi itech ma timotokikan, tikmatij tlen kineki kichiuas uan ken kineki ma tikpiakan tonemilis (Col. 1:9, 10). Ik non, tikmatij tleka tiyoltokej uan tlen tikchiuaskej itech tonemilis. Pero miakej amo kimatij tleka tiyoltokej. Ijkon okiteititi Pablo ijkuak okijto: “‘Amaka okitak, amaka okikak, nion amaka tlakatl okajsikama tlan Dios okijto kinmakas akimeh kintlasojtla’. Dios otechnextili ika Iespíritu nochi tlan amaka okimatia” (1 Cor. 2:9, 10). Noijki tiyolpakij porque tikmatij tlen kichiuas toTajtsin Dios.

Jehová yokichi miak tlamantli ipatka ialtepe. Se neskayotl, ye techtlapojpoluia (1 Juan 2:12). Techiknomati, ik non, techiluia tiyoltoskej itech xochitlali uan ayakmo miak poliui ijkon panos (Rom. 12:12, TNM). Noijki techmaka miakej tokniuan para san sekan ma tiktekichiuilikan (Sal. 133:1). Uan Biblia kijtoa Jehová techmaluia para amo itlaj ma techchiuili Satanás uan amo kuali ejekamej (Sal. 91:11). Okachi tiyolpakiskej tla timokuayejyekoaj itech nochi nin tlateochiualistli (Filip. 4:4).

¿Uelis okachi tiyolpakiskej? Jesús okijto: “Ne nomechilia nochi ni para xipakikah kemi Ne nipaki, iwa ijkó xitentokah ika nopakilis” (Juan 15:11). Ninmej tlajtolmej techititiaj uelis okachi tiyolpakiskej. Uan yolpakilistli kajki ken tlitl. Moneki titlatlatijtoskej tla tiknekij ma tlaxotlato. Ma tikilnamikikan espíritu santo kichiua ma tiyolpakikan. Ik non, tla tiknekij tiyolpakiskej, moneki ma tiktlajtlanilikan iespíritu santo toTajtsin Dios (Sal. 1:1, 2; Luc. 11:13).

Noijki tla tiknekij tiyolpakiskej, ma tikchiuakan tlen kipaktia Jehová (Sal. 35:27; 112:1). ¿Tleka ijkon tikijtoaj? Porque otechchijchi para ma tikchiuakan tlen ye kineki. Biblia kijtoa: “Xikmauili akin melauak toTajtsin Dios uan xikintlakamati itlanauatiluan, nochi nin moneki kichiuas tlaltikpaktlakatl” (Ecl. 12:13). Ik non, melauak tiyolpakij ijkuak tiktekichiuiliaj Jehová. *

Amo san kuali timomachiliaj tla tiyolpakij, noijki techpaleuia ma tikchiuakan okseki tlamantli. Se neskayotl, tikyolpaktiaj Jehová ijkuak tiktekichiuiliaj ika pakilistli maski tikixnamikij ouijkayotl (Deut. 16:15; 1 Tes. 5:16-18). Ijkuak melauak tiyolpakij, tikixtopeuaj miak tlamantli uan okachi tikpaleuiaj iTekiuajkayo Jehová (Mat. 13:44). Nin kichiua okachi ma tiyolpakikan, kuali ma timomachilikan uan tikchiuaj oksekimej noijki ma yolpakikan (Hech. 20:35; Filip. 1:3-5).

Noijki ijkuak okachi tiyolpakij, techpaleuia ma tichikajtokan. Biblia kijtoa: “Akin yolpaki chikajtok” (Prov. 17:22). Se tepajti ixtlamatki tlen omomachti itech Universidad de Nebraska ompa Estados Unidos okijto: “Tla axkan tiyolpaki uan mitspaktia tlen tikchiua, satepan tichikajtos”.

Ken yotikitakej, uelis tiyolpakiskej maski tikatej itlamian tonalmej. Ma timotlatlaujtikan para tikseliskej iespíritu santo Jehová, ma timomachtikan Biblia uan itech ma timokuayejyekokan. Uan tla tiknekij okachi tiyolpakiskej, ma timokuayejyekokan ken techteochiua Jehová, ma titlaneltokakan ken otlaneltokakej itekipanojkauan uan ma tikchiuakan tlen kineki. Ijkon techpanos ken kijtoa Salmo 64:10: “Akin yolmelauak moyolpaktis itech Jehová uan itech mopaleuis uan yolpakiskej akinmej yolmelauakej”.