”ITlaixpantijkauan Jehová nochtin kuali okinnotsayaj uan noijki notskuintsitsiuan. Se tonal se siuatl tlen itoka Elaine okinmakak galletas notskuintsitsiuan. Satepan ijkuak ompa onikinuikaya san niman okinekiayaj ajsitiuij porque ‘ompa kinmakaskiaj galletas’.

”Notskuintsitsiuan okinpaktiaya galletas uan ne oniyolpakiaya maski san se tepitsin inmiuan onimotlapouiaya. Pero amo oniknekiaya inmiuan nimouikas. Maski yonikpiaya 70 xiuitl, amo onikmatiaya tlen yejuan otlamachtiayaj. Ijkon opanok porque amo onechpakti tlen okseki religiones otlamachtiayaj, ik non, onikijto okachi kuali san noselti nimomachtiskia Biblia.

”Satepan opejki nikinmita okachi miakej iTlaixpantijkauan Jehová tetlapouiaj ika carritos. Yejuan noijki kuali otetlajpalouayaj uan ijkuak itlaj onikintlajtlaniaya onechititiayaj tlen kijtoua Biblia, ik non, opejki nikneltoka tlen yejuan tlamachtiaj.

”Se tonal Elaine onechtlajtlani: ‘¿Tikneltoka yolkamej otechintliokoli toTajtsin Dios?’. Ne onikilui kema. Satepan onechtlajtoltili Isaías 11:6-9, ijkuakon opejki nikpatla ken nimokuayejyekoua pero ayamo onikuikaya nion se amatlajkuilol.

”Satepan onimotlapoui iuan Elaine uan inamik tlen itoka Brent. Yejuan onechiluijkej ma niktlajtolti amochtli Mateo hasta Hechos, ijkon nikmatiskia ken uelis nikchiuaskia ken Cristo, non onechpaleui. Itech 2016 Elaine uan inamik opejki nechmachtiaj.

”Sejse semana yoniknekiaya nimomachtis uan nimonechikos. Sapanoua oniyolpakiaya uan onimotlasojkamatiaya onimomachtijtoka tlen melauak tlamachtia Biblia. Opanok kanaj se xiuitl uan onimoapolakti. Axkan nikpia 79 xiuitl uan nikmati nikchijtok tlen Jehová kineki, ye nechkauilia ma niktekichiuili iuan tokniuan uan yejuan nofamilia”.