XIMOKUAYEJYEKO titlachiati itech se museo kanin onka tlamantli tlen yiuejkika okinchijchijkej. Seki yokojkoyonkej uan yotlajtlankej. Seki ayakmo ajsitokej. Pero onka se tlen amo itlaj kipoloa. Mota nochi kuali okichijchijkej. Uan tiktlajtlania akin mitstlapouijtok kox yankuik non tlamantli. Uan ye kijtoa: “Amo, okachi yiuejkika okichijchijkej uan amo moneki ma kiyektlalikan”. Uan noijki tiktlajtlania: “¿Nochipa tlatitok?”. Uan mitsnankilis: “Amo, yokixiko chikauak ejekatl, kiauitl uan yimiak uelta okinekiayaj kichtekiskej”. Ik non, xamo timotlajtlanis: “¿Tlen ika okichijchijkej?”.

Ijkon ken non tlamantli, Biblia kuali okichijchijkej uan okachi yimiak xiuitl kipia amo ken okseki amochmej. Katej okseki amochmej tlen yiuejkika okinmijkuilojkej pero yotlajtlankej. Tlen kijtoaj itech tlen kimatij ixtlamatkej mopatlati porque axkan kajsij okseki tlamantli. Uan tlen kijtoaj ken uelis timopajtiskej, ualeua amo techpaleuia uan okachi timokokoaj. Noijki miakej amochmej ayakmo ajsitokej porque seki opoliuik noso yotlajtlankej.

Pero Biblia amo ijkon ken nonmej amochmej. Amo tlajtlami maski yikipia kanaj tres mil quinientos xiuitl. Uan maski miakej okinekiayaj kipojpoloskej, kitlatiskej, okijtojkej amo itlaj ipati uan amo okitekauiliayaj ikaj ma kipia, tlen Biblia kijtoa amo mopatla. Maski axkan onka miak tlamantli yankuik, Biblia kijtoa miak tlamantli tlen axkan yikin kajsikamatij tlaltikpaktlakamej (xikita recuadro “¿Ayakmo techpaleuia noso yokijtoaya tlen yikin tikmatij?”).

Pero xamo timotlajtlania: “¿Melauak ok techpaleuia tlen kijtoa Biblia?”. Para tikmatis, ximokuayejyeko itech nochi ouijkayotl tlen tikixnamikij. ¿Tlen ouijkayotl okachi temomojti? Xamo tikijtos guerras, kisokiotia tlaltikpak, sekimej sapanoa moteuiaj uan tetlajyouiltiaj. Axkan ximokuayejyeko itech tlen tlamachtia Biblia uan ximotlajtlani: “¿Okachi kuali tiyetoskiaj tla tikintlakamatiskiaj tlanauatilmej tlen katej itech Biblia?”.

MA TIYETOKAN IKA YOLSEUILISTLI IUAN OKSEKIMEJ

“Mapakikah non teyolsewiah, porke yejwah kinnotsaskeh impilwah Dios” (Mateo 5:9). “Asta kan weletis, nomejwah xiktemolikah kenijki nonmoyekwikaskeh ika yolsewílistli iwan nochteh” (Romanos 12:18).

MA TITEIKNOMATIKAN UAN MA TITETLAPOJPOLUIKAN

“Mapakikah non teiknomatih, porke Dios noiwa kimiknomatis” (Mateo 5:7). “Ximoxikojtokan uan sepa ximotlapojpoluikan tla ikaj amo kuali okichiuilijkej. Ijkon ken Jehová * sepa onamechtlapojpolui, noijki ijkon namejuan moneki xikchiuakan” (Colosenses 3:13, TNM).

AMO MA TIMOCHIKOITAKAN MASKI TLATLAMANTLI TOALTEPE

“Dios okinchijchi nochteh n tlakah para mamochajchantikah ipan nochi n tlaltíkpaktli” (Hechos 17:26). “Dios amo kintlasojtla san sikimeh, iwa oksikimeh amó, yej itech nochi nin tlaltíkpaktli, Dios kinselia akimeh kitlakitah iwa kichiwah tlan kuali” (Hechos 10:34, 35).

AMO MA TIKIJTLAKOKAN TLALTIKPAK

“Jehová okonanki tlakatl uan okitlali itech xochitlali Edén para ma tlatoka uan ma tlamalui” (Génesis 2:15). ToTajtsin Dios ‘kimpojpolos akimeh kijtlakoah n tlaltíkpaktli’ (Apocalipsis 11:18).

AMO MA TITLAIXNEKIKAN NION MA TIAUILNEMIKAN

“¡Kuali ximotlachilikah! Amo xikmokawilikah manomechyoltilana n tomi, porke n tlakatl amo kipia nemílistli san por kipia miak tomi” (Lucas 12:15). “Namejwan ya anteaxkawan de Dios, por yonik amo xikchiwakan nion itlaj tlan amo kuale. Amo ximomekatikan, amo xikchiwakan itlaj tlamantle biero iwan nion amo xikwelitakan ankipiaskej miek tlamantle okachi de tlan ya ankipiaj” (Efesios 5:3, ITlajtol toTajtzin Dios [NHY]).

MA TITEKITIKAN UAN AMO MA TITLACHTEKIKAN

“Tiknekih tikchiwaskeh nochi tlan kuali” (Hebreos 13:18). “Akin otlachtekia, ayakmó matlachteki, yej mapewa matekiti ika imawah” (Efesios 4:28).

MA TITLAPALEUIKAN

“Xikinyolchikawakah akimeh mosotlawah. Xikimpalewikah akimeh amo chikawak intlaneltokalis, iwa xikinmajsikamatiltikah nochteh n oksikimeh” (1 Tesalonicenses 5:14). “Matikimpalewikah n iknomeh iwan iknosiwameh ika tlan kimpoloa” (Santiago 1:27).

 Biblia amo san kijtoa nochi ninmej tlanauatilmej. Noijki techmachtia ma tikinpatioitakan uan nochipa ma tikintlakamatikan. Tla tinochtin tikintlakamatiskej, ¿amo tikneltoka okachi kuali tiyetoskiaj? Axkan okachi techpaleuia tlen kijtoa Biblia. Uan tejuatsin noijki mitspaleuis.

Tlakatl tlen okachi ixtlamatki okijto: “Ixtlamatilis Dios moixmati ika tlan kichiwah ipilwah akimeh kitlakitah” (Mateo 11:19). Nin melauak. Para tikmatiskej kox techpaleuis tlen kijtoa Biblia, moneki achto tiktlakamatiskej. Ik non, xamo timotlajtlania: “Tla Biblia melauak techpaleuia, ¿amo moneki ma mota itech nonemilis? ¿Melauak nechpaleuis ma nikyektlali ouijkayotl tlen nikixnamiki?”. Ma tikitakan se neskayotl.

Se siuatl tlen itoka Diana * oyolpakiaya uan okichiuaya miak tlamantli, pero san niman okipanok miak tlamantli tlen amo kuali: omikik ichpoch, inamik okikajte uan ayakmo okipiaya tomin. Ye okiyekijto: “Ayakmo onikmatiaya akin ne; ayakmo onikpiaya nochpoch, nonamik nion nokalijtik. Onikpolo nochi tlen onikpiaya uan ayakmo itlaj kuali onikchiaya”.

Diana kuali okajsikamatki ninmej tlajtolmej:  “Tiyoltokej 70 xiuitl uan tla ok tikpiaj chikaualistli tikajxitiaj 80 xiuitl. Pero tikpiaj miak ouijkayotl uan timotekipachoaj; san totoka panotikisa xiuitl” (Salmo 90:10).

Ijkuak Diana okipanok nochi non ouijkayotl omomachti Biblia uan sapanoa okipaleui. Ken tikitaskej itech ok eyi tlamachtilmej, miakej kitlakamatij tlen kijtoa Biblia sapanoa kinpaleuia uan noijki kixnamikij ouijkayotl. Yokitakej Biblia ajsitok ijkon ken yotimomachtijkej. Biblia amo ijkon ken okseki amochmej tlen satepan ayakmo itlaj ipati. ¿Kox onka okse amochtli ken Biblia? ¿Kox iTlajtol toTajtsin Dios noso tlaltikpaktlakamej? (1 Tesalonicenses 2:13).

Xamo noijki timokuayejyekoa axkan tikpiaj miak ouijkayotl uan timotekipachoaj. Ik non, ¿akin uelis techyolseuis, techpaleuis uan techiluis ken tikixnamikiskej ouijkayotl?

Ma tikitakan eyi tlamantli ken techpaleuis Biblia:

1. Para amo tikpiaskej ouijkayotl techiluia ken timomaluiskej.

2. Ken tikyektlaliskej ouijkayotl.

3. Ma tikxikokan tlen amo uelis tikpatlaskej.

Okseki tlamachtilmej techtlapouiskej itech ninmej eyi tlamantli.