Romanos 15:1-33
15 Tejuan akinmej tikpiaj chikauak totlaneltokilis, matikinpaleuikan matlaxikokan akinmej amo kipiaj chikauak intlaneltokilis. Noijki amo matikchiuakan san tlen tejuan techpaktia.
2 Tinochtin matikchiuakan tlen kinpaktia oksekimej uan ijkon tikinyolchikauaskej.
3 Porque nion Cristo amo okichi tlen ye kipaktia uan ijkon opanok tlen ijkuilitok: “Ne onechuijuikaltijkej akinmej omitsuijuikaltijkej”.
4 Nochi tlen yiuejkika omoijkuilo, omoijkuilo para matimomachtikan. Tejuan timochixtokej porque iTlajtol toTajtsin Dios techyolchikaua uan techpaleuia matitlaxikokan.
5 ToTajtsin Dios tlen techpaleuia matitlaxikokan uan techyolseuia, manamechpaleui ximokuayejyekokan* ken Cristo Jesús omokuayejyekouaya.*
6 Ijkon san sekan ika namotlajtol xikueyichiuakan iDios uan iTajtsin toTeko Jesucristo.
7 Cristo kuali onamechseli ikinon namejuan kuali xikinselikan oksekimej para makiueyichiuakan toTajtsin Dios.
8 Ne namechiluia, Cristo okinpaleuiko akinmej okimochiuilijkej circuncisión uan ijkon okiteititi toTajtsin Dios amo tlakajkayaua. Noijki okiteititi melauak tlen toTajtsin Dios okinmilui inuejkatatajuan.
9 Noijki okinpaleuiko akinmej chantij itech okseki altepemej para makiueyichiuakan toTajtsin Dios porque ye teiknomati. Ijkon ken ijkuilitok: “Ikinon nimitsueyichiuas inmixpan akinmej chantij itech okseki altepemej uan niktlakuikilis motoka”.
10 Noijki ijkuilitok: “Namejuan akinmej nanchantij itech okseki altepemej xipakikan iuan ialtepe toTajtsin Dios”.
11 Oksekan noijki ijkuilitok: “Nochtin namejuan tlen nanchantij itech okseki altepemej xikueyichiuakan Jehová. Xikinkauilikan akinmej chantij itech nochi altepemej makiueyichiuakan”.
12 Isaías noijki okijkuilo: “Uits se ixui Jesé uan ye kinnauatis miakej altepemej. Yejuan san kichixtoskej makichiua miak tlamantli kuali”.
13 ToTajtsin Dios tlen techpaleuia matimochiakan, manamechpaleui xipakikan uan xikpiakan yolseuilistli porque nankineltokaj. Ijkon espíritu santo namechpaleuis ximochiakan ika nochi namoyolo.
14 Nokniuan, ne nikmati namejuan uelis nankichiuaskej tlen kuali. Noijki namixtlamatkej uan uelis nankinmachtiskej oksekimej.
15 Pero onimixeui onamechijkuilili seki tlamantli para amo xikilkauakan. Onikchi porque toTajtsin Dios onechtliokoli tlen kuali.
16 Ye onechpejpenki maniktekichiuili Cristo Jesús uan manikinmatilti kuali tlajtoli akinmej amo judíos. Ne nikchijtok tekitl tlen onechmakak toTajtsin Dios para ye makinseli akinmej amo judíos. Yejuan yetoskej ken se tetliokolil tlen okichipa espíritu santo uan toTajtsin Dios kiselis.
17 Nipaki porque niidiscípulo Cristo Jesús uan niktekichiuilia toTajtsin Dios.
18 Amo nimixeuis nikijtos tlen ne onikchi. San nikijtos tlen onechnauati Cristo manikchiua para nikinpaleuis matetlakamatikan* akinmej chantij itech okseki altepemej. Ijkon okichi ika tlen onikijto uan tlen onikchi.
19 Yejuan otetlakamatkej* porque iespíritu toTajtsin Dios onechpaleui manikinchiua milagros uan okseki tlamantli tetlajtlachialti. Ijkon onikintlapoui nochtin akinmej chantij Jerusalén hasta altepetl Ilírico. Onikintlapoui kuali tlajtoli tlen kijtoua akin Cristo.
20 Ne onikijto amo nitetlapouis kuali tlajtoli kanin yomotematiltijka itoka Cristo, porque amo oniknek nikchiuas se tekitl tlen okse yokipeualti.
21 Ijkon ken ijkuilitok: “Kitaskej akinmej amo keman okixmatkej. Noijki kajsikamatiskej akinmej amo keman okikakiayaj akin ye”.
22 Ikinon miak uelta amo ouelik onamechtlajpaloto.
23 Pero itech ninmej altepemej nochtin yonikintlapoui uan yikipia miak xiuitl nikneki namechtlajpaloti.
24 Nikneki namechtlajpalojtikisa ijkuak nias España. Seki tonal namouan nimokauas uan nikneki techkajkauatij ijkuak nias.
25 Pero axkan yinias Jerusalén nikinpaleuitij tokniuan.
26 Porque tokniuan tlen chantij Macedonia uan Acaya okitemakakej seki tlamantli ika nochi inyolo. Non tlamantli kintitlaniliskej tokniuan tlen chantij Jerusalén porque amitlaj kipiaj.
27 Yejuan okitemakakej ika nochi inyolo pero ijkon okichijkej porque omonekiaya tlapaleuiskej. Judíos okinmatiltijkej akinmej amo judíos nochi tlamantli kuali tlen kitemaka toTajtsin Dios, ikinon akinmej amo judíos moneki kinmakaskej judíos tlen kinpoloua.
28 Ijkuak niktlamis nin tekitl uan nikinmakas tokniuan tlen okintitlanilijkej, nias España uan namechitikisa.
29 Ne nikmatok ijkuak nias namechtlajpaloti, nikuikas miak tlateochiuali tlen kitemaka Cristo.
30 Nokniuan, namechtlatlaujtia ika itoka toTeko Jesucristo uan ika tlasojtlalistli tlen kitemaka espíritu santo, ximochijchikauakan xiktlatlaujtikan toTajtsin Dios manechpaleui ijkon ken ne niktlatlaujtia.
31 Ijkon amitlaj nechtoktiskej akinmej amo tlaneltokaj tlen chantij Judea. Noijki tokniuan tlen chantij Jerusalén mapakikan ijkuak nikinpaleuiti.
32 Tla toTajtsin Dios kimonekiltis, nipakis namechtlajpaloti uan timosepanyolchikauaskej.
33 Namouan mayeto toTajtsin Dios tlen kitemaka yolseuilistli. Amén.
Notas
^ Noso “ximonejneuilikan”.
^ Noso “omonejneuiliaya”.
^ Noso “matlauelkakikan”.
^ Noso “otlauelkakej”.
