Mateo 8:1-34
-
Jesús okipajti se tlakatl tlen opalaniaya inakayo (1-4)
-
Se tlakatl tlen okinyekanaya soldados otlaneltokaya (5-13)
-
Jesús okinpajti miakej ompa Capernaúm (14-17)
-
¿Tlen techpaleuis matimochiuakan idiscípulos Jesús? (18-22)
-
Jesús okitlakaualti ejekakiauitl (23-27)
-
Jesús okinnauati ejekamej makalakikan inmijtik pitsomej (28-34)
8 Miakej oyajkej iuan Jesús ijkuak otemok itech tepetl.
2 Satepan se tlakatl tlen opalaniaya inakayo* okajsito Jesús, ixpan omotlankuaketski uan okilui: “NoTeko, ne nikmati tla te tiknekis uelis techpajtis”.
3 Jesús okikitski uan okilui: “Ne nikneki xipajti”. Uan san niman oualpajtik.
4 Jesús noijki okilui: “Amikaj xikilui tlen opanok. San xikitati teopixki uan xikuika motlatliokolil ijkon ken otlanauati Moisés. Ijkon tikteititis yotipajtik”.
5 Ijkuak Jesús oajsito Capernaúm, inauak omotoki se tlakatl tlen okinyekanaya soldados uan okitlatlaujti makipaleui.
6 Okilui: “Noteko, notlakeual ayakmo ueli molinia. Kajki nochan uan tlajyouijtok”.
7 Jesús okilui: “Nikpajtis ijkuak ompa niajsiti”.
8 Pero tlakatl tlen okinyekanaya soldados okinankili: “NoTeko, amo nechnamiki nimitspanoltis nochan. San xikijto mapajti uan pajtis notlakeual.
9 Porque ne noijki nikchiua tlen nechnauatiaj uan nikinnauatia nosoldados. Tla se nikiluia mauia, ye yaui. Tla okse nikiluia mauiki, ye uits. Tla notlakeual nikiluis itlaj makichiua, ye kichiuas”.
10 Jesús omotlajtlachialti ijkuak ijkon okikak uan okinmilui akinmej iuan oyayaj: “Ne namechiluia, amo keman nikita ikaj tlaneltoka ken nin tlakatl itech Israel.
11 Miakej uitsej ik kanin kisa tonaltsin uan ik kanin motlatia. Yejuan motlaliskej inakastlan mesa iuan Abrahán, Isaac uan Jacob itech Tekiuajkayotl tlen kajki iluikak.
12 Pero akinmej omonekiaya kiseliskej Tekiuajkayotl, kinkixtiskej uan kinkauaskej kanin tlayoua. Ompa tlauelchokaskej uan kualaniskej”.
13 Jesús okilui tlakatl tlen okinyekanaya soldados: “Ximokopa mochan uan mamochiua tlen tikneki porque otikteititi titlaneltoka”. Ijkuakon san niman opajtik itlakeual.
14 Ijkuak Jesús oyajki ichan Pedro, okitak imonna Pedro ouetoka ipan cama porque okipiaya totonik.
15 Jesús okimakitski uan okiski totonik. Siuatl omejki uan opejki kitlakualchiuilia Jesús.
16 Ijkuak otlayouak, Jesús okinuikilijkej miakej tlen okinpiayaj ejekamej* uan san ika se tlajtoli okinkixti ejekamej.* Noijki okinpajti nochtin kokoxkej.
17 Ijkon omochi tlen okijto profeta Isaías: “Ye otechkixtili kokolistli uan nochi tlen techkokoua”.
18 Ijkuak Jesús okitak miakej okiyaualojkej, ye iuan idiscípulos oyajkej okse lado itempa mar.
19 Se tlakatl tlen otlamachtiaya tlanauatil omotoki inauak Jesús uan okilui: “Tlamachti, ne mouan nias maski san kanin tias”.
20 Jesús okinankili: “Astomej kipiaj inchan uan totomej kipiaj intepajsol, pero iKone Tlakatl amo kipia kanin kochis”.
21 Ijkuakon se idiscípulo okilui: “NoTeko, techkauili achto maniktokati nopapa”.
22 Jesús okinankili: “Te nochipa nouan xiuiki uan xikinkaua mikamej makintokakan akinmej yoixpolikej”.
23 Jesús iuan idiscípulos otlejkokej itech se barco uan oyajkej.
24 San niman opejki chikauak ejekakiaui uan atl okitlauitekiaya barco uan opejki atemi. Pero Jesús okochtoka.
25 Discípulos okijxititoj uan okiluijkej: “¡ToTeko techpaleui! ¡Timikiskej!”.
26 Ye okinmilui: “¿Tleka nanmomojtiaj namejuan tlen amo okachi nantlaneltokaj?”. Jesús omejki, okitlakaualti ejekatl uan mar, uan nochi san otlamoka.
27 Discípulos omotlajtlachialtijkej uan okimoluiayaj: “¿Akin nin tlakatl? Hasta ejekatl uan mar kichiuaj tlen ye kijtoua”.
28 Ijkuak Jesús oajsito itempa altepetl Gadara, itech panteón oualkiskej ome tlakamej tlen okinpiayaj ejekamej* uan okinamikitoj. Yejuan okatkaj chijchikauakej uan otemomojtiayaj ikinon amikaj ik ompa opanouaya.
29 San niman chikauak okiluijkej: “¿Tlen otikchiuako nikan te iKone Dios? ¿Otechtlajyouiltiko maski ayamo ajsi tonal tlen omoijto?”.
30 Amo uejka ik ompa otlakuajtokaj miakej pitsomej.*
31 Ikinon ejekamej* okitlatlaujtijkej Jesús: “Tla techkixtis inmijtik tlakamej, techtitlani inmijtik pitsomej”.*
32 Ye okinmilui: “¡Xiakan!”. Yejuan okiskej inmijtik tlakamej uan okalakej inmijtik pitsomej.* Ijkuakon nochtin pitsomej* omotlamotlatoj ijtik mar uan ompa omikej.
33 Akinmej okinmaluiayaj pitsomej* ocholojkej. Ijkuak oajsitoj itech altepetl, okintlapouijkej oksekimej nochi tlen opanok. Noijki okijtojkej tlen okinpanok tlakamej tlen okinpiayaj ejekamej.*
34 Nochtin akinmej ompa ochantiayaj okitemotoj Jesús. Ijkuak okajsitoj, okitlatlaujtijkej oksekan mauia.
Notas
^ Noso “okipiaya lepra”.
^ Noso “demonios”.
^ Noso “demonios”.
^ Noso “demonios”.
^ Noso “kochijtin”.
^ Noso “demonios”.
^ Noso “kochijtin”.
^ Noso “kochijtin”.
^ Noso “kochijtin”.
^ Noso “kochijtin”.
^ Noso “demonios”.
