Mateo 13:1-58
-
NESKAYOMEJ TLEN TLAJTOUAJ ITECH TEKIUAJKAYOTL (1-52)
-
“Se tlakatl otokato” (1-9)
-
¿Tleka Jesús otlamachtiaya ika neskayomej? (10-17)
-
Jesús okijto tlen kijtosneki ineskayo tlakatl tlen otokato (18-23)
-
Trigo uan amo kuali xiuitl (24-30)
-
Iyolo mostaza uan levadura (31-33)
-
Se profeta yokijtojka Jesús tlamachtiskia ika neskayomej (34, 35)
-
Jesús okijto tlen kijtosneki ineskayo trigo uan amo kuali xiuitl (36-43)
-
Itlaj miak ipati tlen tlatitok uan se perla patio (44-46)
-
Michayatl (47-50)
-
Tlamantli yankuik tlen ipati uan tlen amo yankuik (51, 52)
-
-
Jesús amo okitlakaitayaj kanin omoskalti (53-58)
13 Non tonal Jesús okiski itech kali kanin okatka uan omotlalito itempa mar.
2 Miakej ompa oajsitoj ikinon ye otlejkok itech se barco uan ompa omotlali. Pero akinmej oajsitoj omoketokaj itempa mar.
3 Ye okinmachti miak tlamantli ika neskayomej.* Okinmilui: “Se tlakatl otokato.*
4 Ijkuak otokaya,* seki semilla ouetski itempa ojtli uan totomej okikuajkej.
5 Okseki semilla ouetski kanin teyo* uan ompa amo okatka miak tlali. San niman oixuak porque amo uejkatlan otoktoka.
6 Pero ouaki porque otonaltlatlak uan amo uejkatlan omoneluayoti.
7 Okseki semilla ouetski ijtik uitsyo, pero omoskalti uitsyo uan okipacho.
8 Okseki semilla ouetski ipan kuali tlali uan opejki tlaki.* Seki semilla okitemakak 100, okseki okitemakak 60 uan okseki okitemakak 30.
9 Mayektlakaki akin kinpia inakasuan”.
10 Discípulos omotokijkej inauak Jesús uan okitlajtlanijkej: “¿Tleka tikintlapouia ika neskayomej?”.*
11 Ye okinnankili: “Namejuan namechkauiliaj xikajsikamatikan seki tlamantli santo tlen amo omomatiaya itech Tekiuajkayotl tlen kajki iluikak, pero yejuan amo kinkauiliaj makajsikamatikan.
12 Porque akin itlaj kipia okachi kimakaskej. Pero akin amitlaj kipia kikixtiliskej nochi tlen kipia.
13 Ikinon yejuan nikintlapouia ika neskayomej.* Maski tlachiaj amitlaj kitaj uan maski tlakakij amitlaj kikakij nion amitlaj kajsikamatij.
14 Yejuan kinpanoua tlen okijto profeta Isaías: ‘Yejuan tlakakiskej pero amo keman itlaj kajsikamatiskej. Tlachiaskej pero amo keman itlaj kitaskej.
15 Porque yejuan oyoltlakuauakej. Monakastsakuaj para amo tlakakiskej uan kintsakuaj inmixtololouan para amo tlachiaskej, ikinon amitlaj kajsikamatij nion amo moyolkopaj para manikinpaleui’”.
16 “Namejuan nanpakij porque nantlachiaj uan nantlakakij.
17 Ne namechiluia, miakej profetas uan akinmej yolkualmej okinekiayaj kitaskej tlen namejuan nankitaj, pero amo okitakej. Noijki okinekiayaj kikakiskej tlen namejuan nankikakij, pero amo okikakej”.
18 “Axkan xikkakikan tlen kijtosneki ineskayo* tlakatl tlen otokato.*
19 Semilla tlen ouetski itempa ojtli kijtosneki akin kikaki tlen kichiuas iTekiuajkayo toTajtsin Dios, pero amo kajsikamati. Uits Satanás uan kiuiuitla tlajtoli tlen omotokak iyolipan.
20 Semilla tlen ouetski kanin teyo* kijtosneki akin kikaki iTlajtol toTajtsin Dios uan san niman kineltoka ika pakilistli,
21 pero amo uejkika tlaneltoka porque amo uejkatlan omoneluayoti tlajtoli. Ayakmo tlaneltoka ijkuak kixnamiki ouijkayotl nion ijkuak kitlajyouiltiaj por iTlajtol toTajtsin Dios.
22 Semilla tlen ouetski ijtik uitsyo kijtosneki akin kikaki iTlajtol toTajtsin Dios, pero okachi kitekipachoua tlen axkan onka. Noijki moixkajkayaua ika ichikaualis tomin, ikinon non tlamantli kipachoua iTlajtol toTajtsin Dios uan amo kitemaka tlakilotl.
23 Semilla tlen ouetski ipan kuali tlali kijtosneki akinmej kikakij iTlajtol toTajtsin Dios uan kajsikamatij tlen kijtosneki. Yejuan yetoskiaj ken semilla tlen tlaki.* Seki semilla okitemakak 100, okseki okitemakak 60 uan okseki okitemakak 30”.
24 Noijki okinmilui okse neskayotl:* “Tekiuajkayotl tlen kajki iluikak yetoskia ken se tlakatl tlen kitoka* kuali semilla itlala.
25 Ijkuak nochtin okochtokaj, akin okikokoliaya tlakatl okitokako* amo kuali xiuitl kanin otoktoka trigo uan oyajki.
26 Ijkuak omiauatik trigo, noijki omoskalti amo kuali xiuitl.
27 Itlakeualuan okitatoj uan okiluijkej: ‘Tejuatsin otiktokak* kuali semilla motlala. Pero ¿tleka oixuak amo kuali xiuitl?’.
28 Ye okinmilui: ‘Okitokak* akin nechkokolia’. Itlakeualuan okitlajtlanijkej: ‘¿Tikneki matikuiuitlatij?’.
29 Ye okinnankili: ‘Amo, porque tla nankiuiuitlaskej amo kuali xiuitl noijki uelis nankiuiuitlaskej trigo.
30 Xikkauakan san sekan mamoskalti. Ijkuak kololoskej trigo, nikinmiluis akinmej tekipanoskej achto makiuiuitlakan amo kuali xiuitl, makijilpikan uan makitlatikan. Satepan kololoskej trigo uan kitlatiskej’”.
31 Noijki okinmilui okse neskayotl:* “Tekiuajkayotl tlen kajki iluikak yetoskia ken iyolo mostaza tlen se tlakatl okitokato itlala.
32 Nin semilla ye okachi tsikitsin, pero ijkuak moskaltia mochiua ueyi kouitl uan totomej mochantiaj itech imamayo”.
33 Noijki okinmilui okse neskayotl:* “Tekiuajkayotl tlen kajki iluikak yetoskia ken levadura tlen se siuatsintli okinelo ika kanaj 20 litros harina uan saiktlami nochi tixtli osamauak”.
34 Jesús okintlapoui ika neskayomej* akinmej ompa okatkaj. Ye nochipa okintlapouiaya ika neskayomej.*
35 Ijkon omochi tlen okijto se profeta: “Nikintlapouis ika neskayomej.* Nitetlapouis tlen yiuejkika amikaj okimatiaya”.
36 Jesús okalak kalijtik ijkuak okinmilui mayakan akinmej ompa okatkaj. Idiscípulos inauak omotokijkej uan okiluijkej: “Techyekilui ineskayo* amo kuali xiuitl tlen okitokakej tlala”.
37 Ye okinmilui: “Akin okitokak* kuali semilla ye iKone Tlakatl.
38 Itlala tlakatl kijtosneki nochtin tlen chantij tlaltikpak. Kuali semilla kijtosneki akinmej pouij itech iTekiuajkayo toTajtsin Dios. Amo kuali xiuitl kijtosneki yejuan ikoneuan Satanás.
39 Akin kikokolia tlakatl uan okitokak amo kuali xiuitl ye Diablo. Kololoskej trigo kijtosneki ijkuak yitlamis tlen axkan onka uan ángeles kololoskej trigo.
40 Ijkuak yitlamis tlen axkan onka, panos ijkon ken ijkuak kiuiuitlaj amo kuali xiuitl uan kitlatiaj.
41 IKone Tlakatl kintitlanis iángeles, uan yejuan kikixtiskej itech iTekiuajkayo nochi tlamantli tlen kichiua matlajtlakolchiuakan. Noijki kinkixtiskej akinmej amo kitlakamatij* tlanauatil
42 uan kintlamotlaskej ijtik tlitl. Ompa tlauelchokaskej uan kualaniskej.
43 Ijkuakon yolkualmej petlaniskej ken tonaltsin itech iTekiuajkayo inTajtsin. Mayektlakaki akin kinpia inakasuan”.
44 “Tekiuajkayotl tlen kajki iluikak yetoskia ken itlaj miak ipati tlen tlatitok tlala uan se tlakatl okajsik. Tlakatl opakiaya ikinon okika ompa matlatito, nochi omotlanemakito uan okiko non tlali”.
45 “Tekiuajkayotl tlen kajki iluikak yetoskia ken se tlasemanki tlen kintemojtinemi perlas kuajkualtsitsintin.
46 Ijkuak okajsik se perla patio, san niman nochi omotlanemakito uan okiko”.
47 “Tekiuajkayotl tlen kajki iluikak yetoskia ken se michayatl tlen kitlamotlaj ijtik mar uan ompa kalakij tlatlamantli michimej.
48 Michayatl okiuikakej itempa mar ijkuak otenki. Ompa omotlalijkej uan ijtik chikimej okintlalijkej kuajkualtin michimej, pero okintlamotlakej tlen amo kuajkualtin.
49 Ijkon panos ijkuak yitlamis tlen axkan onka. Uitsej ángeles uan kinxeloskej akinmej yolkualmej uan akinmej amo yolkualmej.
50 Kintlamotlaskej ijtik tlitl akinmej amo yolkualmej. Ompa tlauelchokaskej uan kualaniskej”.
51 Jesús okintlajtlani: “¿Onankajsikamatkej nochi tlen onamechilui?”. Idiscípulos okinankilijkej: “Kema”.
52 Ye okinmilui: “Tla onankajsikamatkej, xikmatikan nin tlamantli: se tlamachti tlen okimachtijkej Tekiuajkayotl tlen kajki iluikak, ye yetoskia ken se tlakatl tlen kipia ichan uan kikixtia miak tlamantli yankuik tlen ipati uan miak tlamantli tlen amo yankuik”.
53 Jesús oyajki ijkuak yokintlapoui ika nonmej neskayomej.*
54 Ijkuak oajsito kanin omoskalti, opejki tlamachtia itech insinagoga* uan akinmej ompa okatkaj omotlajtlachialtijkej. Omotlajtlaniayaj: “¿Kanin omomachti nin tlakatl? ¿Akin okimakak chikaualistli para makinchiua milagros?
55 ¿Amo ye nin itelpoch kojxinki?* ¿Amo ye nin itelpoch María? ¿Amo ikniuan Santiago, José, Simón uan Judas?
56 ¿Amo nikan chantij ikniuan siuamej? ¿Tleka ueli kijtoua uan kichiua nochi nin tlamantli?”.
57 Ikinon amo okineltokakej. Pero Jesús okinmilui: “Se profeta kitlakaitaj maski san kanin yetos, pero amo kitlakaitaj itech ialtepe nion itech ikalijtik”.
58 Jesús amo okinchi miakej milagros ompa porque yejuan amo otlaneltokayaj.
Notas
^ Noso “ejemplos”.
^ Noso “otlaxinito”.
^ Noso “otlaxiniaya”.
^ Noso “tepejxio”.
^ Noso “tlamochiua”, “tlapankisa”.
^ Noso “ejemplos”.
^ Noso “ejemplos”.
^ Noso “iejemplo”.
^ Noso “otlaxinito”.
^ Noso “tepejxio”.
^ Noso “mochiua”, “pankisa”.
^ Noso “ejemplo”.
^ Noso “kixinia”.
^ Noso “okixiniko”.
^ Noso “otikxini”.
^ Noso “okixini”.
^ Noso “ejemplo”.
^ Noso “ejemplo”.
^ Noso “ejemplos”.
^ Noso “ejemplos”.
^ Noso “ejemplos”.
^ Noso “iejemplo”.
^ Noso “okixini”.
^ Noso “kiuelkakij”.
^ Noso “ejemplos”.
^ Xikita diccionario.
^ Noso “carpintero”.
