Hebreos 6:1-20
6 Tejuan amo san tikmatij tlen achto otechmachtijkej itech Cristo ikinon okachi matimochikajtiuiaj.* Amo san matimomachtijtokan tlen achto otechmachtijkej. Non kijtosneki ijkuak otechmachtijkej moneki timoyolkopaskej porque otikchiuayaj tlen amitlaj ipati, ijkuak otechmachtijkej moneki tikneltokaskej toTajtsin Dios,
2 ijkuak otechmachtijkej moneki timoapolaktiskej, ijkuak otechmachtijkej tlen kijtosneki tokniuan kintlaliaj inmauan inpan sekimej, ijkuak otechmachtijkej kinyolitiskej akinmej yoixpolikej uan ijkuak otechmachtijkej toTajtsin Dios saiktlami tlaixkomakas.
3 ToTajtsin Dios techpaleuis ijkon matikchiuakan.
4 Sekimej tlen achto okintlauilijkej okiselijkaj tetliokolil tlen uits iluikak uan okiselijkaj espíritu santo.
5 Yejuan okiselijkaj kuali itlajtol toTajtsin Dios uan okiselijkaj tlateochiuali tlen satepan uits.
6 Pero ayakmo otlaneltokakej. Yejuan amikaj uelis kinpaleuis mamoyolkopakan, porque yetoskia ken oksepa kipilouaj itech kouitl iKone toTajtsin Dios uan kichiuaj makipinauikan oksekimej.
7 Porque toTajtsin Dios kiteochiua tlali ijkuak nochipa kiaui uan satepan moskaltia xiuitl tlen kinpaleuia akinmej tlatokaj.
8 Pero amitlaj ipati tla moskaltia uitstli porque toTajtsin Dios san niman kiuijuikaltis uan saiktlami kitlatiskej.
9 Nokniuan, maski ijkon tikijtouaj tikmatij namejuan okachi kuali nankatej uan amo ijkon ken akinmej ayakmo tlaneltokaj. Namejuan nankichijtokej tlen namechpaleuis manamechmakixti toTajtsin Dios.
10 Porque toTajtsin Dios yolkuali uan amo kilkaua tlen nankichiuaj. Noijki amo kilkaua onankiteititijkej nankitlasojtlaj itoka ijkuak onankinpaleuijkej akinmej yolchipauakej uan ok nankinpaleuiaj.
11 Pero tiknekij nannochtin xikteititikan nankimatij nantekipanouaj. Ijkon nantlaneltokaskej hasta ijkuak mochiuas tlen nankichixtokej.
12 Ijkon amo nanyetoskej nantlatsijkej. Xikchiuakan ken akinmej okiselijkej tlen okinmilui toTajtsin Dios porque otlaneltokakej uan omochixkej.
13 Ijkuak toTajtsin Dios okilui Abrahán tlen kimakaskia, ineuian ijkon okijto porque amikaj okachi ueyititok ken ye.
14 Okilui: “Melauak nimitsteochiuas uan nikinmiaktilis moxuiuan”.
15 Abrahán omochixki uan satepan okiseli tlen okiluijkej.
16 Ijkuak tlakamej kijtouaj itlaj kichiuaskej, kiteneuaj itoka ikaj tlen okachi ueyititok. Non kiteititia melauak tlen kijtouaj uan ijkon amo mokualaniaj.
17 ToTajtsin Dios ijkon okichi ijkuak kuali okinmititi akinmej kiseliskej tlen kinmaxkatilis amo mopatla tlen ye kineki kichiuas. Ye ineuian okijto ijkon kichiuas.
18 Non ome tlamantli tlen toTajtsin Dios okichi amo keman uelis mopatlas uan ye amo keman tlakajkayaua. Non ome tlamantli techyolchikaua akinmej timopaleuiaj inauak toTajtsin Dios uan tikneltokaj tlen tikchiaj.
19 Tlen tejuan tikchixtokej kichikajtok toyolilis ijkon ken se tepostli tlen ika kiketsaltiaj barco uan kichikajtok. Tejuan tikneltokaj melauak mochiuas tlen tikchiaj. Tlen tikchiaj techpaleuia matikalakikan kanin kajki tsotsoli* tilauak.
20 Jesús achto ompa okalak, otechtlapolijtia ojtli uan okiyektlalijtia porque ye nochipa yetos teopixki ken Melquisedec.
