Hebreos 5:1-14
5 Tla se tlakatl kipejpenaj mayeto teopixki tlen tlayekana, kipejpenaj makitekichiuili toTajtsin Dios inpatka oksekimej. Ijkon makitemaka tetliokolil uan makinmikti yolkamej para makintlapojpoluilikan intlajtlakol.
2 Ye uelis kinmiknomatis akinmej kichiuaj tlen amo kuali porque amo kimatij tlen kichiuaj. Ye kinmiknomatis porque noijki tlajtlakole.
3 Ikinon moneki kitemakas itetliokolil para makitlapojpoluilikan itlajtlakol ijkon ken ye kichiua inpatka oksekimej.
4 ToTajtsin Dios kitlalia se teopixki matlayekana uan amo san iselti mochiua teopixki. Ijkon ken toTajtsin Dios okitlali Aarón mayeto teopixki.
5 Cristo noijki amo iselti omochi teopixki tlen tlayekana. ToTajtsin Dios okiueyitlali uan amo san ye ineuian omoueyitlali. Ye okilui: “Te tinokone uan axkan onimochi nimotajtsin”.
6 Noijki iTlajtol toTajtsin Dios kijtoua: “Te nochipa tiyetos titeopixki ken Melquisedec”.
7 Ijkuak Cristo okatka nikan tlaltikpak, ika nochi iyolo chikauak omotlatlaujti uan ochokak. Okitlatlaujti toTajtsin Dios akin uelis kipaleuiskia amo maixpoliui uan ye okikak porque kimauilia.
8 Maski ye okatka ikone toTajtsin Dios, okimatki tlen kijtosneki tetlakamatis* porque otlajyoui.
9 Ye nochipa otetlakamatki,* ikinon uelis kinpaleuis mamomakixtikan akinmej kitlakamatij* uan nochipa yoltoskej.
10 ToTajtsin Dios okitlali mayeto teopixki tlen tlayekana ken Melquisedec.
11 Onka miak tlamantli tlen uelis tikijtoskej itech Cristo, pero oui tikyekijtoskej porque namejuan amo san niman nankajsikamatij.
12 Axkan namejuan yinantlamachtiskiaj pero moneki oksepa ikaj manamechmachti tlen achto onanmomachtijkej itech iTlajtol toTajtsin Dios. Yetoskia ken oksepa nankinekij leche uan amo nankinekij tlakuali.
13 Akin ok koni leche kajki ken se konetl porque amo kimati tlen kuali tlamachtia iTlajtol toTajtsin Dios.
14 Pero akinmej yomochikajkej* kikuaj tlakuali. Yejuan mokuayejyekouaj* uan non kinpaleuia makitakan tlen kuali uan tlen amo kuali.
Notas
^ Noso “tlauelkakis”.
^ Noso “otlauelkaki”.
^ Noso “kiuelkakij”.
^ Noso “yomoskaltijkej”.
^ Noso “monejneuiliaj”.
