Apocalipsis 3:1-22
3 “Xiktlajkuilili ángel tlen kajki itech tlanechikol Sardis. Nin tlen kijtoua akin kinpia chikome iespíritus toTajtsin Dios uan chikome sitlalimej: ‘Nikmati tlen tikchiua. Noijki nochtin kimatij tiyoltok pero yetoskia ken timiktok.
2 Ximotlachili uan xikchikaua tlen ok mokaua uan yipojpoliuiskia, porque nikita amo tikchiua nochi tlen noDios kineki xikchiua.
3 Ikinon nochipa xikilnamiki tlen otikseli uan otikkak. Nochipa xiktlakamati* uan ximoyolkopa. Tla amo tiijsas, niuits ken se ichteki uan amo tikmatis tlen hora niajsiki’”.
4 “‘Pero ompa Sardis katej sekimej tlen amo okisokiotijkej intlaken. Yejuan nouan nejnemiskej ika intlaken istak porque okimotlanilijkej.
5 Akin tlatlanis ijkon motlakentis ika itlaken istak uan amo keman nikpojpolos itoka itech libro tlen kijtoua akinmej yoltoskej. Ne nikijtos nikixmati itoka ixpan noTajtsin uan inmixpan iángeles.
6 Akin kinpia inakasuan makikaki tlen espíritu kinmiluia tlanechikolmej’”.
7 “Xiktlajkuilili ángel tlen kajki itech tlanechikol Filadelfia. Nin tlen kijtoua akin yolchipauak, akin amo tlakajkayaua, akin kipixtok illave David, akin tlatlapoua uan amikaj ueli tlatsakua, akin tlatsakua uan amikaj ueli tlatlapoua:
8 ‘Nikmati tlen tikchiua. (Moixpan oniktlali se puerta tlapotok tlen amikaj ueli kitsakua). Noijki nikmati maski amo tichikauak, otikchi tlen onimitsilui uan amo otechka.
9 Nikchiuas maualakan iaxkauan Satanás uan mokxitlan motlankuaketsaskej. Yejuan moteneuaj judíos pero amo melauak judíos porque tlakajkayauaj. Ne nikinmatiltis nimitstlasojtla.
10 Te otitlaxiko ijkon ken ne ikinon ne nimitsmaluis ijkuak ajsis hora nochtin kinyejyekoskej. Non hora uits para kinyejyekoskej nochtin tlen chantij tlaltikpak.
11 San niman niuits. Amo keman xikkaua tlen tikpia uan ijkon amikaj mitskixtilis mocorona’”.
12 “‘Akin tlatlanis nikchiuas makichikajto itemplo noDios uan ompa amo keman kisas. Ipan ye nikijkuilos itoka noDios, itoka ialtepe noDios uan yankuik notoka. Ialtepe noDios ye yankuik Jerusalén tlen ualtemoua iluikak desde kanin kajki noDios.
13 Akin kinpia inakasuan makikaki tlen espíritu kinmiluia tlanechikolmej’”.
14 “Xiktlajkuilili ángel tlen kajki itech tlanechikol Laodicea. Nin tlen kijtoua Amén, testigo yolmelauak uan amo tlakajkayaua, akin achto okichijchi toTajtsin Dios:
15 ‘Nikmati tlen tikchiua. Noijki nikmati amo tisesek nion amo titotonik. Okachi kuali tla tiyetoskia tisesek noso titotonik.
16 Pero ne nimitsijsotlas porque san tiyamankatotonik. Amo titotonik nion amo tisesek.
17 Te tikijtoua tikpia miak tomin, yotikmotlanili miak tlamantli uan amitlaj mitspoloua. Pero amo tikita te timialma, mitsiknomatij, amitlaj tikpia, amo titlachia uan tixipetstik.
18 Ikinon nimitsiluia techkouili oro tlen yokichipajkej ijtik tlitl para tikpias miak tomin. Techkouili tlakemitl istak para timotlakentis uan ijkon oksekimej amo mitsitaskej tixipetstik uan tipinauas. Techkouili pomada para tikintlalilis moixtololouan uan ijkon uelis titlachias’”.
19 “‘Ne nikinyektlalia uan nikinyektlapouia akinmej nikintlasojtla. Ikinon ximochichijchikaua uan ximoyolkopa.
20 Ne nimoketok kaltempa uan nikuiuiteki* puerta. Tla ikaj nechkakis uan tlatlapos, nikalakis ichan uan san sekan titlakuaskej.
21 Akin tlatlanis nikkauilis nouan mamotlali kanin kajki notrono. Ijkon ken ne onitlatlanki uan onimotlali iuan noTajtsin kanin kajki itrono.
22 Akin kinpia inakasuan makikaki tlen espíritu kinmiluia tlanechikolmej’”.
