Ma timomachtikan itech se telpochtli tlen okimakixti itlatsi. Nin telpochtli okatka isobrino tlatitlanil Pablo. Amo tikmatij ken omotokayotiaya nin telpochtli, maski ijkon, tikmatij okichi itlaj tlen okiteititi yolchikaualistli. ¿Mitspaktiskia tikakis tlen okichi?...

Pablo otsaktoka itech Jerusalén. Ye otsaktoka pampa otetlapouiaya itech Jesús. Sekimej tlakamej tlen amo yolkualmej okikokoliayaj Pablo, ik non, omotlapouijkej kichiuaskej itlaj tlen sapanoa amo kuali. Yejuan okijtojkej: ‘Ma tikiluikan akin kinyekana soldados ma kiuikakan Pablo ixpan akinmej tlaixkomakaj. Timotlatiskej itech ojtli, uan ijkuak Pablo panos, tejuan tikmiktiskej’.

Isobrino Pablo okikak tlen okinekiayaj kichiuiliskej. ¿Tlen kichiuaskia? Oyajki kan otsaktoka Pablo uan okilui tlen okikak. San niman Pablo okilui isobrino ma kiluiti akin kinyekana soldados tlen okinekiayaj kichiuiliskej. ¿Timokuayejyekoa okatka oui motlapouis isobrino Pablo iuan akin okinyekanaya soldados?... Kema, pampa nin tlakatl oueyititoka. Maski ijkon, isobrino okatka yolchikauak uan omotlapoui iuan nin tlakatl.

Nin tlakatl kuali okimatiaya tlen omonekiaya kichiuas. ¡Ye okinnechiko kanaj 500 soldados pampa ma kimaluikan Pablo! Okilui Pablo kiuikaskia Cesarea non yoak. ¿Omomakixti Pablo?... Kema, ¡tlakamej tlen amo yolkualmej ayakmo itlaj okichiuilijkej! Amo okichijkej tlen omokuayejyekojkej.

¿Tlen mitsmachtia nin tlapoualistli?... Noijki uelis tiyetos tiyolchikauak ken isobrino Pablo. Moneki tiyetoskej tiyolchikauakej ijkuak tikintlapouiaj oksekimej itech Jehová. ¿Tiyetos yolchikauak uan tikintlapouis oksekimej itech Jehová?... Tla tikchiuas, uelis ikaj tikmakixtis.