TLAMACHTIL 05
Itech Biblia ijkuilitok tlen toTajtsin Dios kineki matikmatikan
Jehová otechmakak itlaj kualtsin, 66 amochmej tlen katej itech Biblia. Pero xamo tikijtoua: “¿Akin otlanauati makijkuilokan Biblia?”. Para tikmatiskej, matikitakan tleka axkan tikpiaj Biblia.
1. ¿Tleka uelis tikijtoskej Biblia iTlajtol toTajtsin Dios tla okijkuilojkej tlakamej?
Biblia okijkuilojkej kanaj 40 tlakamej, opejki kijkuilouaj itech xiuitl 1513 a.i.x. 1 uan otlanki okijkuilojkej itech xiuitl 98. Ouejkajkej okijkuilojkej kanaj 1,600 xiuitl pero tlen ompa kijtoua amo motlajtolnamiki. ¿Tleka amo motlajtolnamiki? Porque tlen ompa ijkuilitok iaxka toTajtsin Dios (xiktlajtolti 1 Tesalonicenses 2:13). Akinmej okijkuilojkej amo okitlalijkej tlen yejuan omokuayejyekouayaj. “Espíritu santo okinpaleui tlakamej matlajtokan ipatka toTajtsin Dios okinekia makitematiltikah” (2 Pedro 1:21). a ToTajtsin Dios okinyekanki ika iespíritu santo akinmej otlajkuilojkej ikinon okitlalijkej tlen ye mokuayejyekoua (2 Timoteo 3:16).
2. ¿Akinmej uelis kipiaskej Biblia?
Nochtin uelis kinpaleuis tlen kijtoua Biblia “akinmej oksekan chantij, tlatlamantli familias, akinmej tlatlamantli intlajtol uan akinmej chantij itech tlatlamantli altepemej” (xiktlajtolti Apocalipsis 14:6). ToTajtsin Dios yokichi makitlajtolkopakan ika tlatlamantli tlajtoli. Amo onka okse amochtli ijkon ken Biblia tlen sapanoua yokitlajtolkopkej ika tlatlamantli tlajtoli. Nochtin uelis kimatiskej tlen kijtoua Biblia maski tlatlamantli intlajtol uan tlatlamantli inmialtepe.
3. ¿Tlen okichi Jehová para amo makipojpolokan iTlajtol?
Biblia okijkuilojkej itech seki tlamantli tlen ijtlakaui ken kuetlaxtli uan papiro. Sekimej tlakamej okipatioitayaj tlen kijtoua Biblia ikinon okijkuilojkej uan ijkon okinpiayaj miak copias. Sekimej tekiuajkej uan akinmej otlayekanayaj itech religiones okinekiayaj kipojpoloskej, pero oksekimej tlen okipatioitayaj Biblia okichijkej seki tlamantli para amo makipojpolokan maski uelis kinmiktiskiaj. Jehová amo okitekauili itlaj makitsakuili uan ijkon nochipa techmatiltia tlen kineki. Biblia kijtoua: “ITlajtol toTajtsin Dios, yetos nochipa” (Isaías 40:8).
MATIMOMACHTIKAN
Matikitakan ken okichi toTajtsin Dios uan ijkon okijkuilojkej Biblia. Noijki tikitaskej tlen yokichi para amo makipojpolokan uan matikpiakan.
4. Biblia techiluia akin iTlajtol tlen ompa tikajsij
Xikitakan VIDEO. Satepan xiktlajtoltikan 2 Timoteo 3:16 uan satepan xikitakan tlen namechmachtia.
-
Tla Biblia okijkuilojkej tlakamej, ¿tleka tikijtouaj iaxka toTajtsin Dios?
-
¿Uelis tikneltokaskej toTajtsin Dios okinmilui tlakamej tlen omonekiaya kijkuiloskej?
Se tlakatl kiluia akin kipaleuia makijkuilo se carta ikinon carta iaxka akin otlanauati. Noijki ijkon opanok ika Biblia: maski okijkuilojkej tlakamej ompa tikajsij iTlajtol toTajtsin Dios.
5. Miakej okinekiayaj kipojpoloskej Biblia
Biblia iaxka toTajtsin Dios ikinon ye kimaluia para amo makipojpolokan. Sekimej tekiuajkej okinekiayaj kipojpoloskej Biblia. Akinmej otlayekanayaj itech religiones amo okinekiayaj oksekimej makitlajtoltikan Biblia. Pero sekimej okimaluijkej Biblia maski okinkokolijkej uan okinekiayaj kinmiktiskej. Para tikixmatis se tlakatl tlen okimalui tlen kijtoua Biblia, xikitakan VIDEO uan satepan xikitakan tlen namechmachtia.
-
¿Ken otimomachili ijkuak otikitak itech video miakej omochijchikajkej para matikpiakan Biblia? ¿Mitspaktiskia tiktlajtoltis Biblia? ¿Tleka ijkon tikijtoua?
Xiktlajtoltikan Salmo 119:97 uan satepan xikitakan tlen namechmachtia.
-
¿Tleka miakej okitlajtolkopkej uan okixejxelojkej Biblia maski okinekiayaj kinmiktiskej?
6. Nochtin uelis kitlajtoltiskej Biblia
Ika miak tlajtolmej yokitlajtolkopkej Biblia uan miakej yikipiaj. Xiktlajtoltikan Hechos 10:34, 35 uan satepan xikitakan tlen namechmachtia.
-
¿Tleka kineki toTajtsin Dios makitlajtolkopakan iTlajtol ika miak tlajtolmej uan nochtin makipiakan?
-
¿Tleka mitspaktia tlen kijtoua Biblia?
Itech nochi tlaltikpak
miakej kipiaj Biblia
ika intlajtol
Nochi Biblia noso san tlajko
kajki kanaj ika
3,000
tlajtolmej
Yokinchijchijkej kanaj
5,000 millones
amo onka okse amochtli tlen ijkon yokichijchijkej
SEKIMEJ KIJTOUAJ: “Biblia san okijkuilojkej tlakamej”.
-
¿Tlen tikijtoua?
-
¿Tleka uelis tikneltokas Biblia iTlajtol toTajtsin Dios?
XIKILNAMIKTO
Biblia iTlajtol toTajtsin Dios. Ye okichi tinochtin matikpiakan Biblia.
Matikojpauikan
-
¿Tlen kijtosneki toTajtsin Dios okinyekanki tlakamej para okijkuilojkej Biblia?
-
¿Tlen timokuayejyekoua ijkuak tikita amo ueli okipojpolojkej Biblia? ¿Yokintlajtolkopkej uan yokinchijchijkej miak Biblias?
-
¿Ken timomachilia ijkuak tikita toTajtsin Dios okimalui iTlajtol para tikpias?
NIN NOIJKI MITSPAKTIS
Ximomachti nochi tlen okichijkej para matikpiakan Biblia.
“¿Tleka tikpiaj Biblia?” (¡Ma titlachixtokan!, noviembre 2007)
Xikita tleka uelis kipojpoloskiaj Biblia.
“Amo ueli okipojpolojkej Biblia” (Akin Tetlapouijtok, núm. 4, 2016)
Xikita nochi tlen okintoktijkej akinmej okitlajtolkopkej Biblia.
Biblia yokikixtilijkej miak copias. ¿Ken tikmatij amo okipatlakej iTlajtol toTajtsin Dios?
“¿Okipatlakej tlen kijtoua Biblia?” (Nin tlamachtil kajki itech jw.org/ncx)
a Espíritu santo kijtosneki ichikaualis toTajtsin Dios. Non tikitaskej itech tlamachtil 07.
Xamo noijki mitspaktis
TLEN MIAKEJ MOTLAJTLANIAJ
¿Ken tlamachtiaj iTlaixpantijkauan Jehová?
Ijkuak mitstlajpalotiuij iTlaixpantijkauan Jehová uelis timomachtis ika moBiblia. Noijki uelis tikinyoleuas mofamilia noso moyolikniuan mouan mamomachtikan.
