TLAPOUALISTLI 11

Achto kosamalotl

¿TIKMATI tlen achto okichi Noé ijkuak okiskej ye uan ichanejkauan itech akali? Ye okichiuili toTajtsin Dios se tlamanal noso se tetliokolil. Xikita ken ijkon kichijtok itech tlaixkopinal tlen kajki tlakxitlan. Noé okitliokoli toTajtsin Dios ninmej yolkamej uan ijkon okitlasojkamatili pampa okinmakixti ye uan ichanejkauan itech ueyi apachiuilistli.

¿Tikneltoka okipakti Jehová nin tetliokolil? Kema, okiyolpakti. Ik non, okimakak itlajtol amo keman oksepa kixpoloskia nochi tlen yoltok itech Tlaltikpak ika se apachiuilistli.

Amo opanok miak kauitl uan Tlaltikpak ouaki, Noé uan ichanejkauan okiskej ijtik akali uan okipeualtijkej se yankuik nemilistli. ToTajtsin Dios okinteochi uan okinmilui: ‘Xikinpiakan miakej namokoneuan. Ximomiaktilikan uan ijkon yetoskej tlaltikpaktlakamej itech nochi Tlaltikpak’.

Satepan, ijkuak tlaltikpaktlakamej kikakiskiaj itech ueyi apachiuilistli, uelis momojtiskiaj pampa kijtoskiaj oksepa ijkon mochiuaskia. Ik non, toTajtsin Dios okinmakak tlaltikpaktlakamej itlaj tlen ika kilnamikiskiaj Itlajtol, pampa amo keman oksepa atemiskia nochi Tlaltikpak. ¿Tikmati tlen okitemakak Jehová pampa tlaltikpaktlakamej kilnamikiskiaj itlajtol? Se kosamalotl.

Miakpa, satepan kiaui moita se kosamalotl ijkuak kisa Tonaltsin. Kosamalotl uelis kipias tlatlamantli tlapali tlen kuajkualtsin moitaj. ¿Te yotikitak se? ¿Tikita tlen kajki itech tlaixkopinal?

Nin okijto toTajtsin Dios: ‘Niktemaka notlajtol pampa amo keman nikinmixpolos nochtin tlaltikpaktlakamej uan yolkamej ika se apachiuilistli. Niktlalijtok nokosamalotl itech mixtli. Uan ijkuak kosamalotl kisas, ne nikitas uan nikilnamikis notlajtol tlen oniktemakak’.

Ik non, ijkuak tikitas se kosamalotl, ¿tlen moneki tikilnamikis? Kema, tlajtoli tlen okitemakak toTajtsin Dios: amo keman kixpolos nochi tlen yoltok itech Tlaltikpak ika se ueyi apachiuilistli.

Génesis 8:18-22; 9:9-17.