TLAPOUALISTLI 65

Tekiuajkayotl omoxelo

¿TIKMATI tleka nin tlakatl kitsayantok itlaken? Jehová okilui ijkon ma kichiua. Nin tlakatl itoka Ahíya iteotlajtojki toTajtsin Dios. ¿Tikmati tlen kichiua se teotlajtojki? Se teotlajtojki ye akaj tlen toTajtsin Dios kiluia achto tlen panos satepan.

Nikan moita Ahíya omotlapouijtoka iuan Jeroboán. Jeroboán se tlakatl tlen oueyititoka tlen okitekichiuiliaya Salomón. Ijkuak Ahíya okinamik Jeroboán itech ojtli, Ahíya okichi se tlamantli tlen amo keman omoitaya. Okimokixtili itlaken tlen yankuik uan okitsayanki ika 12 tlakotonaltin. Ahíya okilui Jeroboán: ‘Xikitski majtlaktli tlakotonaltin pampa te’. ¿Tikmati tleka Ahíya okimakak majtlaktli tlakotonaltin Jeroboán?

Ahíya okiyekijto ken Jehová kikixtiliskia itekiuajkayo Salomón. Okijto toTajtsin Dios kimakaskia Jeroboán majtlaktli nechikolmej. Nin kijtosnekia san mokauaskiaj ome nechikolmej pampa kinnauatiskia Rehoboam ikone Salomón.

Ijkuak Salomón okikak tlen Ahíya okilui Jeroboán, okualanki miak. Okinekiaya kimiktis Jeroboán, maski ijkon, ye ocholo itech Egipto. Satepan, Salomón omikik. Otlanauati 40 xiuitl, uan axkan ikone Rehoboam omochi ueyi tekiua. Ijkuak Jeroboán okatka Egipto okikak Salomón yomikik, ijkuakon, omokuepki Israel.

Rehoboam okatka se ueyi tekiua amo yolkuali. Okachi okintlajyouilti tlaltikpaktlakamej amo ken itajtsin, Salomón. Jeroboán uan oksekimej tlakamej tlen oueyititokaj oyajkej okitatoj ueyi tekiua Rehoboam uan okitlajtlanilijkej amo ma kintlajyouilti israelitas. Maski ijkon, ye amo okinkakili. Uan axkan okachi omochi amo yolkuali. Ik non, israelitas okitlalijkej Jeroboán ma tlanauati ken ueyi tekiua itech majtlaktli nechikolmej, maski ijkon, ome nechikolmej, Benjamín uan Judá ok okipiayaj ken ueyi tekiua Rehoboam.

Jeroboán amo okinekiaya ialtepetl ma uia Jerusalén pampa kiueyichiuaskiaj Jehová itech teokali. Ik non, okinchijchi ome torojkonemej ika oro uan okichi tlaltikpaktlakamej itech majtlaktli nechikolmej ma kinueyichiuakan. San niman, itech nochi ueyi altepetl okatka tlen amo kuali.

Noijki itech tekiuajkayotl tlen okipiaya ome nechikolmej okatka miak ouijkayotl. Nion oajsik makuili xiuitl satepan Rehoboam omochi ueyi tekiua, ueyi tekiua itech Egipto oyajki pampa kiteuiskia Jerusalén. Okiuikak miak tlamantli tlen miak ipati tlen okatkaj itech iteokali Jehová. Ik non, teokali amo ouejka okipixki nochi tlamantli tlen achto okipiaya.

1 Reyes 11:26-43; 12:1-33; 14:21-31.