ACHTO tipeuas tiktlajtoltis Biblia, moneki tikmatis sekimej tlamantin itech. In Biblia, tlen noijki moixmati ken Santas Escrituras, kipia 66 amochtin. Peua itech Génesis, uan tlami ika Apocalipsis, noso Revelación.

¿Akin okichijchi Biblia? Nin se kuali tlajtlanil. Ipan 1,600 xiuitl, ken 40 tlakamej okijkuilojkej 66 amochtin. Maski ijkon, nion se itech yejuan okijto okijkuilo itlayejyekolis. Se itech yejuan okijto: “Dios okichij ma kijkuilokan itlajtol nochi tlan axan kajki ijkuilitok itech tiotlajkuilole” (2 Timoteo 3:16). Uan okse okijto: “Iespíritu Jehová okitekitilti nokamak pampa ma nikijto itlajtol, okichi ma kisa itlajtol itech nokamak” (2 Samuel 23:2). Ken tikitaj, akinmej okijkuilojkej Biblia okijtojkej ye Jehová, akin Ueyi Tlanauatij ipan nochi Tlaltikpak, ye akin okijto tlen omoijkuiloskia itech iTlajtol. Uan ompa techiluiaj ken ye otechmakak Biblia pampa ma tikixmatikan.

Noijki moneki ma tikmatikan itech tlen tlajtoa Biblia: toTajtsin Dios kitlalis se tekiuajkayotl itech iluikak pampa ma moixmati uan ma momati san ye kinamiki ma kinnauati tlaltikpaktlakamej. Itech nin amatlajkuilol tikitas ken ijkon tlajtoa itech nochi Biblia, tlen peua itech Génesis uan tlami ika Apocalipsis.

Timitsyoleuaj xikilnamikto nin ijkuak timomachtijtos tlen kijtosneki nochi tlen omoijkuilo itech Biblia, se amochtli tlen kipia miak ipati uan tlen amo onka okse ken ye.