OPANOK majtlaktli tonal satepan ke Jesús otlejko iluikak, ijkuak omochi iluitl judía tlen itoka Pentecostés, ipan xiuitl 33, kanaj 120 imachtijkauan Cristo omonechikojkej Jerusalén ipan se kali. San niman, omokak ken se ejekatl chikauak, uan imachtijkauan Cristo opejkej tlajtoaj ika tlatlamantli tlajtolmej tlen yejuan amo kixmatiaj. ¿Tlen opanotoka? ToTajtsin Dios okinmakak espíritu santo.

Miakej tlaltikpaktlakamej tlen oualayaj itech miakej altepemej oiluichiuatoj Jerusalén. Nochtin omotlajtlachialtijkej ijkuak okitakej ke imachtijkauan Jesús opejkej kintlapouiaj oksekimej ika intlajtol. Pampa kinyektlapouiaskiaj tleka ijkon opanotoka, Pedro okinmilnamikti ke teotlajtojke Joel okijtojka ke toTajtsin Dios kinmakaskia iespíritu itekipanojkauan uan ijkon uelis kichiuaskiaj milagros (Joel 2:28, 29). Nin milagros tlen kichiuayaj melauak kinextiaya ke tlanechikol tlen otlaneltokaya itech Cristo kipiayaj itlateochiualis toTajtsin Dios, uan amo altepetl Israel. Ik non, akinmej kinekiaj kitekichiuiliskej toTajtsin Dios monekia tlaneltokaskej itech Cristo.

Ijkuakon, ikualankaitauan Cristo opejki kintlajyouiltia imachtijkauan. Ipan se tonal sekimej okintsakej telpiloyan, uan ijkuak otlayouak ouala se ángel tlen okitlapo kaltlatsakual uan okinkixti uan okinmilui okachi ma tetlapouikan. Ijkuak otlaneski, okalakej itech teokali uan opejkej tetlapouiaj itech Jesús. Tlayekankej teopixkamej sapanoa okualankej uan okinmiluijkej ayakmo ma tetlapouikan. Tlatitlaniltin ika miak yolchikaualis otlanankilijkej: “Tejuan tikpiaj de tikchiuaskej tlan Dios kijta iuan amo tlan namejuan ankijtaj” (Hechos 5:28, 29).

Inkualankaitauan okachi kintlajyouiltijkej. Sekimej judíos okiteluijkej Esteban uan okijtojkej ke tlen okijtoaya katka se tlajtlakol ixpan toTajtsin Dios, uan okimiktijkej ika tetl. Itech akinmej okitakej imikilis Esteban katka Saulo tlen ualaya itech Tarso, se telpochtli tlen okinkokoliaya akinmej tlaneltokayaj itech Cristo. Satepan opanok non, Saulo oyaj Damasco pampa kinekia kinkitskis nochtin tlaneltokakej tlen kinmajsiskia. Ijkuak oyajtoka itech ojtli, se tlauil tlen ouala itech iluikak okichi ayakmo ma tlachia. Ijkuakon, okikak se tlajtol tlen kiliaya: “Saulo, Saulo, ¿tlanik uel tinechtemojtinemi iuan tikneki tinechkojkokos?”. Ken amo kimatia tlen opanotoka, okitlajtlani: “¿Akin tej, tejuatsin?”. Uan ye okinankili: “Nej niJesús” (Hechos 9:3-5).

Opanok eyi tonal uan Jesús okititlanki se imachtijka tlen itoka katka Ananías pampa ma kichiua oksepa ma tlachia. Saulo omoapolakti uan opejki tetlapouia ika miak yolchikaualis. Satepan omoixmatik ken tlatitlanil Pablo, akin chikauak oteotekitik.

Achto, tlatitlaniltin san okintlapouiayaj judíos uan samaritanos itech iTekiuajkayo toTajtsin Dios. Uan se tonal, se ángel okimonextili Cornelio, se tlayekanke itech ejército romano tlen otlaneltokaya itech akin melauak toTajtsin Dios, uan otlatitlanki ma kinotsakan tlatitlanil Pedro. Ye oajsito iuan oksekimej imachtijkauan Cristo uan okintlapoui tlayekanke uan ichanejke. Ijkuak tlatitlanil okintlapouijtoka, non tlaneltokakej okiselijkej espíritu santo uan Pedro otlanauati ma kinapolaktikan ipan itoka Jesús. Ipan non tonal ik tlayekapan nochtin tlaltikpaktlakamej maski tlatlamantli inaltepetl uelis kipiaskej nemilis tlen amo keman tlamis. Melauak, in kuali tlajtolmej motematiltiskia ipan nochtin altepemej.

(Okisak itech Hechos 1:1–11:21.)