Maski miakej semi amo kuali tein kipanouaj keman kichiuaj tein amo kuali, kisentokaj kichiuaj. Nejua ijkon nechpanok. Niyolik uan nimoskaltij Barcelona, ojpatika xolal tein okachi ueyi ompa España. Nochankauan nemiaj kampa motanotsaya Somorrostro, tein moajsia atenoj uan uejka takuitoya. Akin nemiaj Somorrostro amo kuali ininka tajtouayaj porin ompa monamakaya drogas uan mochiuaya tein amo kuali.

 Nikinpiaya chikueyi nokniuan uan nejua nitayekanaya. Kemej tikpanouayaj tatasojtilis, nopopaj nechtitanik maj nitekititi kampa mauiltiaj tenis. Nejua nikololouaya pelotas tein ika mauiltiayaj. Maski sayoj nikpiaya 10 xiujmej, mojmostaj nitekitia majtakti horas. Yejua ika, amo uelia niyaya kaltamachtiloyan ijkon kemej okseki konemej. Keman nikpiaya 14 xiujmej, peuak nitekiti kampa kichijchiuayaj miak tataman teposmej.

 Itech xiuit 1975, nechnotskej maj nipoui iniuan tateuianij, uan ijkuak amo uelia tikijtouayaj ke amo tikchiuaskiaj. Niknekia nikyejyekos okseki taman, yejua ika nimoijkuiloj iniuan Legión española ompa Melilla, se xolal tein kiixyekana España uan moajsi kampa ika norte ompa África. Ijkuak keman peuak semi nitauana uan niktelkui drogas.

 Keman nikisak itech Legión, nimokepak Barcelona uan peuak nimokui iniuan miakej telpochmej uan tiksenchiuayaj tein amo kuali. Tikichtekiaj tein yeski taman uan satepan tiknamakayaj porin tiknekiaj tomin tein ika tikixtauaskej drogas. Peuak nikui LSD uan anfetaminas, uan peuak semi niauilnemi, niteltauana uan nimauiltia ika tomin. Nochi nejon kichiuak maj peua semi nitateui. Nochipa nikuikatinemia se cuchillo, se hacha oso se machete uan nikixtiaya keman nikitaya ke monekia.

 Se tonal, tikichtekkej se carro uan policías peuak techtokaj. Mochiuak kemej itech se película. Tiyajkej kemej 30 kilómetros hasta ke policías peuak techtatoponiliaj. Ika tamik, tikixkuatelojkej carro, uan tinochin ticholojkej. Taixejekol maj nopopaj nechtokani keman kimatik tein panok.

 Makuil xiuit ninemik itech ojti. Nikochia kaltenoj kampa uejueyi kalmej, itech camiones, kampa se motalia itech parques uan kampa kinpachouaj mikemej. Seki tonalmej hasta ninemik itech se ostok. Amo nikmatia toni nikchiuas ika nonemilis uan niknemiliaya ke amo akin kitekipachouaya ox niyoltoya oso amo. Nikelnamiki ke, keman nikuia droga, nimomatejtekia. Hasta axkan moita kampa nimotejtekia.

 Keman nikpiaya 28 xiujmej, nomomaj nechtemoko uan nechiluij maj nimokepa kalijtik. Nimokepak uan nimotenkauak ke nikyektaliskia nonemilis. Sayoj ke amo niman nikchiuak.

 Se tiotak, ome itaixpantijkauan Jiova ualajkej tokalijtik. Keman nikinkaktoya, nopopaj nechtsajtsilij maj nikintatsakuili. Sayoj ke kemej amo nikuelitaya maj nechiluianij tein monekia nikchiuas, amo nikchiuak. Itaixpantijkauan Jiova nechtajtanijkej ox niknekia nikselis eyi amatajkuilolmej uan nikselij ika yolpakilis. Nikintajtanij kani mosentiliayaj uan seki tonalmej satepan, niyajki itech Kali kampa Mosentiliaj.

 Nochin tel kuali takentiayaj uan nejon yejua yekinika taman tein nechyolnotsak. Sayoj ke nejua nikuikaya notson ueyak, nitentsonej uan notilmaj semi soltik katka. Niknemilij ke amo kuali nechseliskiaj, yejua ika nimokauak kalampa. ¡Semi nikmoujkaitak keman ompa nikitak Juan, akin achto iuan nimokuia uan katka notasojikniuj! ¡Sayoj ke axkan kualtsin takentiaya! Satepan nikmatik ke se xiuit achto mochiujka itaixpantijkauj Jiova. Nimoyolchikauak nikalakis nechikol porin ompa nikitak. Nejon tonal nonemilis peuak mopata.

 Nikselij se nemachtil ika Biblia uan niman nikajsikamatik ke komo niknekia nikyolpaktis Dios, monekia amo nitateuisok uan amo niauilnemisok. Sayoj ke ouij nechkisak. Nikitak ke monekia senkis nikpatas nonemilis uan notanemilil uan ijkon nikyolpaktis Jiova (Romanos 12:2). Iteiknelilis Dios nechyololiniaya. Maski nikchiujka miak taman tein amo kuali, nikmachiliaya ke nechkaujtoya maj senkis nikpatani kemej nimonejnemiltiaya. Semi nechyololinij nikmatis keniuj tamati Jiova. Nikajsikamatik ke moajsi se Tachijchiujkej akin noka motekipachoua (1 Pedro 5:6, 7).

 Nejon necholinij maj nikpata seki taman. Kemej neskayot, keman itech nemachtil ika titajtojkej tachichinalis, niknemilij: “Komo Jiova kineki maj nichipauak itech nochi tein nikchiua, nejin cigarros moneki nikintamotas” (2 Corintios 7:1). Yejua ika nochin nikintamotak itech tajsol.

 Uan no, monekia amo nikuisok nion niknamakasok drogas. Nejon okachi ouij nechkisak. Monekia amo nimouikasok iniuan notasojikniuan porin nejon amo nechpaleuiaya maj nimonejnemilti kemej Jiova kineki. Satepan, peuak okachi nitakuaujtamati iuan Dios uan iniuan tokniuan akin axkan katkaj notasojikniuan. Yejuan semi nechtasojtayaj uan noka motekipachouayaj kemej amo keman aksa kichiujtoya. Seki metsti satepan uelik senkis nikauak drogas uan nimotakentij ika “yankuik talnamikilis”, tein nechpaleuiskia maj nikyolpakti Jiova (Efesios 4:24). Itech metsti agosto xiuit 1985, nimoauij kemej itaixpantijkauj Jiova.

 Biblia nechpaleuij maj kuali ninemi. Nechpaleuij maj nikaua tein nechijtakojtoya uan tein kichiuaya maj amo nimopoujkaita. Tein melauj, panoua treinta akin katkaj notasojikniuan momikilijkej keman ayamo xiuejkej katkaj porin kinkuik sida uan okseki kokolismej tein kinkuik porin kikuiaj drogas. Semi niktasojkamati maj amo nechpanouani nejon porin peuak niktakamati tein Biblia tamachtia.

 Amo nikuikatinemiok cuchillos uan hachas kemej nikchiuaya keman semi nitateuiaya. Tein melauj, amo keman niknemilij ke nikinpataskia ika se Biblia tein ika nikinpaleuiskia oksekin. Axkan, nonamik uan nejua titanojnotsaj miak tonalmej.

 Maski notatuan amo keman mochiujkej itaixpantijkauan Jiova, kiitakej ke Biblia semi nechpaleuij. Nopopaj hasta kintajtouiaya itaixpantijkauan Jiova ininixpan itasojikniuan uan kiyekmatia ke noyankuik taneltokalis senkis nechpatak. Uan nomomaj nochipa nechiluiaya ke kuali yeskia maj achtoya nipeuani nimomachtiani Biblia. ¡Melauak tein kijtouaya!

 Nochi tein nechpanok nechmachtij ke amo keman tiyolpakiskej komo tikuij drogas oso okseki taman tein teijtakoua. Axkan yekmelauj niyolpaki porin nikinpaleuia oksekin maj kiixmatikan tein yekmelauj tamachtia iTajtol Dios, tamachtilis tein nejua nechmakixtij.