Itech 30 xiujmej tein tiualpanouanij, miakej kimachiliayaj ke amo semi onkaya neteuilis itech se altepet iuan okse uan hasta kiitayaj ke kuali mouikayaj. Sayoj ke axkan amo ijkon kimachiliajok, kemej kinextia nejin tein motematiltiani:

•   “Kemej kisentoka moteuiaj ompa Gaza, miakej kimouiliaj maj taijtako itech okseki altepemej porin Israel uan Hizbulá peua moixnamikij kampa tentami Líbano” (Reuters, 6 de enero de 2024).

•   “Akin iuan tekitij Irán peuaj taixnamikij miakkan, uan ompa Irán kinchijchiujtokej okseki uejueyi teposmej tein ika tateuiaj. Uan no, Rusia uan China iuan tekitij Irán. Semi amo ouij maj peua kinteuikan akin nemij itech okseki altepemej” (The New York Times, 7 de enero de 2024).

•   “Kisentoka tajyouiaj akin nemij Ucrania porin rusos kisentokaj kinixnamikij” (UN News, 11 de enero de 2024).

•   “Kemej ompa China semi kitanij tomin uan okachi kipiaj teposmej tein ika tateuiskej, uan akin pouij Taiwán kitelpaleuiaj ininaltepeuj, uan no kemej Pekín uan Washington semi moixnamikij, uelis ijsiujka kipeualtiskej neteuilis” (The Japan Times, 9 de enero de 2024).

 ¿Kijtojka Biblia nejon tein mochiujtok axkan itech taltikpak? ¿Kichiuas maj peua se neteuilis itech nochi taltikpak?

 Biblia amo kijtoj itech katiyejua altepemej moteuiskiaj ijkon kemej axkan moitstok. Sayoj ke kemaj kijtoj ke miakkan moteuiskiaj uan nejin kichiuaskia maj moujkayetokan (Apocalipsis 6:4).

 Amatajkuilol Daniel kijtojka ke itech itamian tonalmej, uejueyi tekiuanij itech taltikpak moixnamikiskiaj porin kinekiskiaj kipiaskej ueyi tanauatil. Keman ijkon kichiuaskiaj, kitekitiltiskiaj uejueyi teposmej tein ika tateuiaj uan taxtauaskiaj miak tomin (Daniel 11:40, 42, 43).

 Biblia kijtoua ke amo motayektalis ta okachi motaouijkantalis. Ijkon kinextij Jesús: “Mochiuas se tetsaujkatajyouilis. Amo mochiuani se ijkon, desde keman peuak taltikpak hasta axkan” (Mateo 24:21). Itech nejin “tetsaujkatajyouilis”, peuas neteuilis Armagedón, tein kijtosneki ke “mosentiliskej para maj moteuikan itech iueyi tonal Dios, akin kipia nochi chikaualis” (Apocalipsis 16:14, 16).

 Sayoj ke keman ualas Armagedón, amo tamitaixpolos, ta miakej momakixtiskej. Keman Dios kiualkuis neteuilis Armagedón, kinixpolos tekiuanij de nikan taltikpak, akin kipeualtiaj neteuilis tein miakej kinijtakoua. Komo tikonneki tikonmatis keniuj neteuilis Armagedón uelis kiualkuis tein kuali, xikonlero nejin tamachtilis:

•   “¿Qué es el Armagedón?”.

•   “Tikchiaj Armagedón ika miak pakilis”.