Itech xiuit 2020, mochiujkej miak tetsaujmej uan peuak kokolis COVID-19. ¿Toni kichiujkej itaixpantijkauan Jehová para kinpaleuiskej akin kinijtakojtoya nochi nejin?

 Itech xiujtekit 2020, a tokniuan taixyekananij akin tekitij iniuan Oloch Taojtokaltianij, kijtojkej ke ueliskia mokuis 28 millones de dólares b para kinpaleuiskiaj akin tajyouijtoyaj. Nejin tomin mokuik para kinpaleuiskej akin tajyouijtoyaj keman mochiuak panoua 200 tetsaujmej, kemej COVID-19, keman miakpa kiouaejekak, ompa África taapexonik, ompa Venezuela amo onkaya tein kikuaskej uan ompa Zimbabue amo kiouia. Tomin tein motemakak kikuikej para kikouaskej takual, at, kani mokauaskej, tasal uan pajti. No kikuikej para kikouaskej tein okachi mokui para se tachipauas, para tayekchijchiuaskej, uan para kiyekchijchiuaskej uejueyi kalmej. Maj tikitakan seki taman tein mochiuani.

 COVID-19. Noyampa taltikpak, nejin kokolis kinijtakouani tokniuan, porin kokolispeuanij, motayokoltianij uan kipolouanij inintekiuj. Yejua ika, moixtalijkej panoua 800 oloch tokniuan akin kiixyekanaj tekit tein mochiua keman panoua se tetsauit. Yejuan kiitaj tein kinpoloua tokniuan akin tajyouijtokej uan kimatiltiaj Tokniuan Taixyekananij para maj yejuan kititanikan tein kinpoloua.

 Itech nochi xiujtekit, nejin tokniuan kinpaleuijkej miakej maj kipiakan, toni kikuaskej, at, okseki taman tein moneki uan pajti. Uan itech seki xolalmej nejin tokniuan sentekitikej iniuan tayekananij para maj tekiuanij kinpaleuikan tokniuan.

 Akin amo itaixpantijkauan Jehová no kiitanij tekit tein tikchiuanij. Field Simwinga, akin kinixyekana policías ompa Nakonde (Zambia), kiniluij tokniuan: “Semi tamechtasojkamatiliaj porin niman nankinpaleuijkej akin tajyouijtoyaj”.

 Ompa Angola amo kipiaj tein kikuaskej. Ompa Angola amo semi onkaya tein kikuaskej porin mochiujtoya kokolis COVID-19, yejua ika semi tapatiyouak. Tokniuan amo kinajsia tomin para kikouaskej tein kikuaskej.

 Yejua ika kiniluijkej tokniuan aki tekitij itech kali Betel ompa Brasil maj kinpaleuikan tokniuan akin kayomej Angola uan maj kintitanilikan despensa. Para kuali motekitiltis tomin tein motemaka, tokniuan monekia kiitaskej keniuj kikouaskiaj uan kititaniskiaj despensa. Uan kiixtalijkej kikouaskej mimiak. Uan sayoj taxtaujkej 22 dólares para kikouaskej uan kititaniskej sejse despensa. Sejse despensa katka etik 20 kilos, uan kipiaya arroz, et uan aceite. Hasta axkan motitankejya 33,544 despensas, tein etik 654 toneladas. Nochi tein kititankej uan tein ompa kikoujkej, tapaleuij maj kintamakakan panoua 50,000 akin amo kipiayaj tein kikuaskej.

 ¿Keniuj momachiliaj tokniuan? Alexandre, akin nemi itech se xolal tein uejka moajsi de Angola, kijtoua: “Nikita ke Jehová nechtasojta, ke amo niyetok noselti uan ke inechikol Jehová semi nechpatiuita”. Mariza, se tokniuj akin iselti kiniskaltijtok ikoneuan, techtapouia: “Jehová kikakik nonetataujtil. Niktasojkamatilia yejua, uan inechikol”.

 Tauaki ompa Zimbabue. Itech xiujtekit 2020, ompa Zimbabue semi tauakik, yejua ika millones mayanmiktoyajya. Tel miakej tokniuan amo semi kipiayaj tein kikuaskej.

 Kinixtalijkej makuil oloch tokniuan akin kiixyekanaj tekit tein mochiua keman panoua se tetsauit. Yejuan kintitanilijkej toni kikuaskej tokniuan. Miakej tokniuan tapaleuijkej, kiyejyektalijkej takual uan kitamamaltijkej tepos kampa kiuikaskiaj, uan no sekin tetaneujtijkej ininteposuan. c Itech xiujtekit 2020 mokuik 691,561 dólares para kikouaskej takual uan ijkon kintamakaskej panoua 22,700 akin amo kipiayaj tein kikuaskej.

 Sekin tokniuan, amo kipiayajok tein kikuaskej keman ajsik takual tein kinuikilijkej. Tokniuan kitasojkamatilijkej Jehová uan sekin peujkej mokuikatiaj para kiueyichiuaskej.

 Itech se xolal, ome tokniuan siuamej akin amo nemiok ininnamik, mosentilijkej iniuan akin no ompa nemiaj porin yaya kiniluitij ke se oloch akin amo tekitij iniuan tekiuanij, kitemakaskiaj takual. Sayoj ke, itech nejon nechikol, peujkej ika tajtouaj política, uan tokniuan kiixtalijkej amo kichiuaskej tein kiniluiayaj para kinmakaskej takual. Keman yajtoyajya, nochin peujkej kinkejkelouaj uan kiniluijkej: “Satepan amo xiktemojtiuikij takual, ¿eh?”. Sayoj ke, ome semana satepan, achto ke kitemakaskiaj takual akin pouiaj itech nejin oloch, tokniuan kiajxitijkej takual itech nejon xolal uan kinmakakej nejin ome tokniuan.

 Kemej akin ompa nemiaj kiitakej keniuj kinpaleuijkej tokniuan ompa Zimbabue, nejon kichiuak maj kuali ika tajtokan Jehová. Maj tikitakan tein kipanok Prisca, akin nemi itech se xolal tein tsikitsin. Maski Prisca uan ichankauan amo semi kipiayaj tein kikuaskej porin tauaktoya, yejua yaya tanojnotsati nochi miércoles uan viernes, hasta itech tonalmej keman monekia talkaxaniskej. Akin nemiaj itech ixolal, kiluiayaj: “¡Tikinmayanmiktis mochankauan porin titanojnotstinemi!”. Sayoj ke Prisca kinnankiliaya: “Jehová amo keman kinsenkaua itekitikauan”. Satepan, tokniuan kiuikilijkej takual. Akin ompaka nemiaj kimoujkaitakej uan kiluijkej: “Dios amo keman mitssenkauani. Uan tiknekij okachi tikixmatiskej”. Axkan, chikomen akin ompaka nemij kikakij nechikol itech radio.

 Ijkon kemej motokijtiuj tonalmej keman tatamitiya, okachi mochiuaskej tetsaujmej (Mateo 24:3, 7). Semi tamechtasojkamatiliaj porin nantapaleuiaj ika nochi namoyolo uan nankitemakaj tomin itech donate.isa4310.com. Uan kemej ipa nankitemakanij, nejin semi tapaleuis para maj tikinmakakan tein kinpoloua tokniuan akin tajyouijtokej.