TEIN BIBLIA TANANKILIA: “Amo xikmoujkaitakan nejin, porin ejkos hora keman nochin akin yetokej itech miketekochmej tein moelnamikij kikakiskej itajtolis [Jesús] uan kisaskej” (Juan 5:28, 29, TNM).

Jesucristo achto kijtoj ke ijkuak yejua taixyekanas, oksepa kinmakas nemilis akin momikilijkejya. Fernando akin ika titajtojkej itech yekinika tamachtilis kijtoj: “Nikmoujkaitak keman nikixtajtoltij Juan 5:28, 29. Biblia kijtoua ke yekmelauj uelis tikchiaskej maj mochiua tein kuali uan peuak nikchia ika yolpakilis tein mochiuas satepan”.

Job se taixyekankej akin amo kikauaya Dios kineltokaya ke ejkoskia tonal keman Dios oksepa kimakaskia nemilis. Yejua tajtanik: “Komo se takat momikilia, ¿uelis oksepa nemis?”. Uan yejua kiyekijtoj: “Nimochias nochi tonalmej keman moneki nitekitis, hasta maj nechixpatakij. Tejua titanotsas, uan nejua nimitsnankilis” (Job 14:14, 15).

Marta iikniuj Lázaro, senkis kineltokaya ke akin momikilijkajya oksepa nemiskej. Satepan ke iikniuj Lázaro momikilij, Jesús kiluij: “Moknitsin oksepa pankisas yoltok”. Uan Marta kinankilij: “Kema, nejua nikmati ke noknitsin oksepa yoltinemis [...] kuak pankisaske yoltokke nochi in ánimajme [oso mikemej]”. Ompa Jesús kiluij: “Nejuatsin nikinyolitia in ánimajme uan nikinmaka nemilis oksepa. Uan nochi ten nouan yek takuautamati, yejua ne maski momikilis ya, pero oksepa yoltinemis” (Juan 11:23-25). Satepan, Jesús oksepa kimakak nemilis Lázaro. Nejon tein ijkuiliujtok itech Biblia techpaleuia maj tiknemilikan tein mochiuas satepan. ¡Tel kualtsin yeski keman tikitaskej keniuj noyampa taltikpak tel miakej millones oksepa kipiaskej nemilis!

TEIN BIBLIA TANANKILIA: ITajtol Dios kinextia ke ineajokuilis Jesús semi taman kemej tein no kipiakej oksekin chikueyi. ¿Keniuj? Porin yejuan oksepa kipiakej nemilis nikan taltikpak. Sayoj ke, keman Biblia ika tajtoua ineajokuilis Jesucristo kijtoua ke yejua: “Yajki eluiyaktsinko uan motalito iyekmakopaka Itajtsin Dios” (1 Pedro 3:21, 22, tejuan tiktalilijkej cursivas). ¿Sayoj Jesucristo moajokuiskia ompa iluikak? Yejua motenkaujka iuan itatojtokakauan keman kiniluij: “Niyo namechsesekotaliliti ya ne kaltsitsin, ijkuakon Nejuatsin oksepa nimoualuikas [...] para namechajokuikiu uan namechuikatiu nepa kampa eluiyaktsinko kampa noixpantsinko. Uan ijkon kampa Nejuatsin niyetos, namejuan no ompa nanyetoske sen nachipa” (Juan 14:3).

Jesucristo yajki iluikak uan kichiuak tein monekia uan ijkon kinseliskia seki itatojtokakauan. Biblia kijtoua, ke akin yaskej iluikak sennochin yeskij  144,000 taltikpakneminij (Apocalipsis [Revelación] 14:1, 3). Sayoj ke, ¿toni kichiuaskej ompa?

Tein melauj, kipiaskej miak tekit. Biblia kijtoua: “Semi tatiochiualme de Dios uan semi yolchipauke nochi ne achtopa panti ten Dios kinpankixtis ma oksepa yoltinemikan. Uan yejuan [...] amo kimachiliske ne tatsakuiltilis ten kiliaj ika ojpa mikilis. [...] Yejuan tekititinemiske keme tiopixkame itenkopaka Totajtsin Dios uan itenkopaka Cristo. Uan yejuan tayekantinemiske iuan Cristo ipan se mil xiume” (Apocalipsis 20:6). Nochi yejuan yeskij tekiuanij uan tiopixkamej uan taixyekanaskej semanauak taltikpak iuan Jesús.

TEIN BIBLIA TANANKILIA: Itech Biblia tikajsij tein kijtoj Pablo akin katka se imomachtijkauj Jesús: “Uan nitakuautamati iuan Dios de ke se tonal Totajtsin Dios kinpankixtis yoltokke nochi in ánimajme [oso mikemej], amo sayo in yolkualime. Ta, no nekes ten amo yolkualime” (Hechos 24:15, tejuan tiktalilijkej cursivas).

¿Akonimej “yolkualime”? Maj titanemilikan itech se takat akin katka yolkuali: Daniel. Yejua katka se tanauatijkej akin amo kikauaya Dios uan keman yaya momikilitia yejuatsin kiluij nejin tajtolmej: “Timoseuis, sayoj ke timoajokuis uan tikuis tein moaxka itech itamian tonalmej” (Daniel 12:13). ¿Kani oksepa nemis Daniel? Biblia kijtoua: “Akin yolmelaujkej ininaxkatis taltikpak, uan ompa nemiskej nochipaya” (Salmo 37:29). Uan no, Jesús achto kijtoj: “Tatiochiualme de Dios ne taneltokani ten iknome [oso akin yolkualmej] tech ninyolojuan. Porin komo ijkon kichiuaj, ijkuakon Dios kintayokolis se yankuik taltikpak nemilis” (Mateo 5:5). Daniel ijkon kemej oksekin itekitikauan Dios akin amo kikaujkej yejuatsin, moajokuiskej uan oksepa nemiskej nikan taltikpak, uan ika yolpakilis uelis nemiskej nochipaya.

¿Uan akonimej akin amo “yolkualime”? Nejin yejuan millones akin momikilijkej uan amo uelkej kiixmatkej nion monejnemiltijkej kemej tamachtia Biblia. Keman oksepa kipiaskej nemilis, kiixmatiskej Jiova * uan Jesucristo uan ijkon uelis kintasojtaskej (Juan 17:3). Akin kiixtaliskej kitekitiliskej Dios nemiskej nochi tonalmej tein Jiova nemis: tein kijtosneki nochipaya.

TEIN BIBLIA TANANKILIA: Dios “kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok” (Apocalipsis 21:4, tejuan tiktalilijkej cursivas). “Uan kinchijchiuaskej kalmej uan ompa chanchiuaskej, uan kitokaskej uvajmekat uan kikuaskej itakilo.” (Isaías 65:21.)

¡Xionmonemili se nemilis ijkon iniuan akin tikontasojta! Sayoj ke moajsiok okse netajtanil tein moneki tiknankiliskej: ¿Keyej tikneltokaj ke oksepa nemiskej akin momikilijkejya?