1. Xikonijto se neskayot tein kipia Biblia tein kinextia ke seki itekitikauan Dios mokajkayaujkej (xikonita taixkopin ipeujyan tamachtilis).

AARÓN, akin katka tayekankatiopixkat, kualkanpa ijkatoya ikalakyan tabernáculo tein iaxka Jiova uan imako kipiaya tein ika tapopochuiaya. Ompakauin yetoyaj Coré uan 250 takamej akin kipaleuiayaj, akin no kitemakatoyaj popoch iixpan Jiova uan sejsemej kipiayaj tein ika tapopochuiayaj (Núm. 16:16-18). Ueliskia moitas ke nochin yekmelauj kiueyichiuayaj Jiova. Sayoj ke Coré uan akin kitojtokayaj, katkaj taixnamikinij akin moueyichiuayaj uan kitemouayaj kikuiliskej Aarón tekit kemej tiopixkat (Núm. 16:1-11). Mokajkayaujkej ijkuak kinemilijkej ke Dios kiseliskia kemej kiueyichiuayaj. Sayoj ke tein kichiujtoyaj kikualantij Jiova, akin kiita tein onkak itech toyolo, uan kimatia ke sayoj kinekiaj kinextiskej ke yekmelauj kiueyichiuayaj (Jer. 17:10).

2. 1) ¿Toni kijtoj Moisés ke panoskia? 2) ¿Keniuj mochiuak tein Moisés kijtojka?

² Se tonal achto, Moisés kijtojka tein panoskia: “Kualkan Jiova kitematiltis akoni iuan poui” (Núm. 16:5). Ijkon kemej moijtojka, moyekitak akonimej yekmelauj kiueyichiuayaj Dios uan akonimej amo, keman “Jiova kititanik se tit uan kinchichinoj [Coré uan] doscientos cincuenta takamej akin tapopochuijtoyaj”  (Núm. 16:35; 26:10). Sayoj ke Jiova kikauak Aarón maj kisentokaskia nemiskia, uan ika nejon kinextij ke kiseliaya kemej tiopixkat uan kiitaya kemej se akin yekmelauj kiueyichiuaya (xikonixtajtolti 1 Corintios 8:3).

3. 1) ¿Toni ouijkayot peuak mochiua itech itonaluan tatitanil Pablo? 2) ¿Toni moita ke ueli kichiua Jiova tein kinpanok Coré uan okseki taixnamikinij?

³ Kemej mil quinientos xiujmej satepan, itech itonaluan tatitanil Pablo, no panok se taman kemej nejon. Seki takamej akin kijtouayaj ke katkaj itatojtokakauan Cristo kiselijkej uan kimoyauayaj tamachtilis tein amo melauak, sayoj ke kisentokayaj mosentiliayaj itech nechikol. Maski xa moitaya ke katkaj kemej oksekin itatojtokakauan Cristo, nejon akin kinekepilijkej Jiova kinijtakojtoyaj akin yekmelauj kichiuayaj kemej Cristo. Katkaj kemej tekuanimej tein moitayaj kemej ichkamej akin kijtakojtoyaj inintakuaujtamatilis seki tokniuan (2 Tim. 2:16-18). Sayoj ke Pablo, akin kimatia toni kinpanok Coré uan akin kipaleuiayaj, kiajsikamatia ke Jiova amo kikajkayauaj akin kinextiaj ke kiueyichiuaj. Maj tikitakan tajtolmej tein teyolnotsaj tein kiluij Timoteo uan maj tikitakan toni techmachtia.

4. 1) ¿Toni senkis kiyekmatia Pablo? 2) ¿Ika toni tajtolmej kiyeknextij Pablo ke kiyekmatia nejon?

⁴ Pablo kiyekmatia ke Jiova uelia kinixmatia akin yekmelauj kiueyichiuayaj uan akin sayoj kinekiaj kinextiskej. Nejon moita itech tajtolmej tein kiixpejpenak ijkuak kitajkuilouilij Timoteo ika ichikaualis Dios. Satepan ke kijtoj ke akin kinekepilijkej Jiova kijtakojtoyaj inintakuaujtamatilis seki tokniuan akin pouiaj itech nechikol, kinextij: “Maski ijkon, tepankalikxit chikauak tein Dios kitalia kisentoka ijkatok, uan ompa ijkuiliujtok nejin tajkuilol: ‘Jiova kinixmati akin iuan pouij’, uan: ‘Akin kinotsa itokay Jiova maj kiixtopeua tein amo kuali’” (2 Tim. 2:18, 19, TNM).

5, 6. 1) ¿Keyej techtanemililtia keman Pablo kikuik tajtolmej “tepankalikxit chikauak tein Dios kitalia”? 2) ¿Keniuj kipaleuij Timoteo nejon tajtolmej tein Pablo kijtoj?

⁵ ¿Keyej techtanemililtia tajtolmej tein Pablo kiixpejpenak ijkuak kijkuiloj nejin texto? Itech nochi Biblia, sayoj nikan moijtoua “tepankalikxit chikauak tein Dios kitalia”. Biblia kikui tajtol tepankalikxit oso tatsineualoni keman ika kiixnextia seki taman, kemej ijkuak ika tajtoua Jerusalén, yekinika altepet itech nochi Israel, oso tekit tein Jesús kichiua itech itanejnekilis Dios (Sal. 87:1, 2; 1 Cor. 3:11; 1 Ped. 2:6). Yejua ika, ¿toni kijtosnekik Pablo ika tajtolmej “tepankalikxit chikauak tein Dios kitalia”?

⁶ Pablo kijtoj nejon tajtolmej keman no mochiujtoya kemej tein panok itech itonaluan Moisés, keman yejua kiniluij Coré uan akin kipaleuiayaj tein ixnesi itech Números 16:5. Ika nejon, Pablo kiyolchikauak Timoteo uan kielnamiktij ke Jiova ueli kimati akonimej taixnamikij uan amo kinkauas maj kichiuakan tein kinekij. Ijkon kemej Coré amo uelik kitsakuilij itanejnekilis Dios, akin kinekepilijkej Jiova akin moajsiaj itech nechikol, amo no ueliskiaj kitsakuiliskej itanejnekilis. Pablo amo senkis kimelauak toni kijtosnekia “tepankalikxit chikauak tein Dios kitalia”. Sayoj ke tikyekmatij ke itajtoluan kipaleuij Timoteo maj senkis takuaujtamatini ke Jiova nochipa kichiua teisa kemej okachi kuali kisas.

7. ¿Keyej uelis tikyekmatiskej ke Jiova nochipa yeski yolmelauak uan nochipa kijtos tein melauak?

⁷ Tayolmajxitilis tein kitemaka Jiova tein tel kuali, amo keman mopata. Salmo 33:11 kinextia: “Itayolmajxitilis Jiova nochipa yetos; tanemililmej tein kipia itech iyolo uejkauaskej nochipaya”. Okseki textos kinextiaj ke Jiova nochipa yeski taixyekankej, nochipa kinextia netasojtalis tein amo tami, melaujkayot uan amo keman takajkayaua (Éx. 15:18; Sal. 106:1; 112:9; 117:2). Malaquías 3:6 kijtoua: “Nejua niJiova; amo nimopatani”. Uan  Santiago 1:17 techyekiluia ke “Dios amo no mopapa[ta]tinemi [...] keme [...] in yekauil kuak mouikatinemi in tonaltsin”.

8, 9. ¿Toni techmachtia “tajkuilol” tein kipia tepankalikxit tein Pablo ika tajtoj?

⁸ Pablo ika tajtoj itech 2 Timoteo 2:19 se tepankalikxit tein kipepechouilijkej se tajkuilol ikespan. Ne uejkauj, itech tepankalikxit tein kipiaya se uejkapan kali kitaliayaj se tajkuilol tein xa ika kinextiayaj akoni kichijchiuak oso akoni iaxka. Pablo yejua yekinika tajkuilojkej ika Biblia akin kikuik nejin neskayot. * Tein ijkuiliujtok itech “tepankalikxit chikauak tein Dios kitalia” kipia ome tanemililmej. Yekinika: “Jiova kinixmati akin iuan pouij”. Uan ojpatika: “Akin kinotsa itokay Jiova maj kiixtopeua tein amo kuali”. Nejin techelnamiktia tein moajsi itech Números 16:5 (xikonixtajtolti).

⁹ ¿Toni kinmachtia akin pouij iuan Jiova “tajkuilol” tein pepechiujtok itech tepankalikxit tein Pablo ika tajtoj? Ke tein Dios kipatiuita uan tein tayolmajxitia mosenijtoua itech nejin ome tanemilil tein motelneki: 1) Jiova kintasojta akin amo kikauaj uan 2) Jiova kitauelita tein amo kuali. ¿Keniuj nejin tein tamachtia tajkuilol mouika ika tein panotoya itech nechikol keman sekin kinekepilijkej Jiova?

10. Ika tein kichiuayaj tenekepilianij, ¿toni kinemiliayaj seki tokniuan akin amo kikauayaj Dios itech itonaluan Pablo?

¹⁰ Timoteo uan okseki tokniuan akin amo kikauayaj Dios xa kintekipachouaya tein kichiujtoyaj akin kinekepilijkaj Jiova. Sekin xa amo kiajsikamatiaj keyej kikauayaj maj nejon tenekepilianij kisentokanij moajsinij itech nechikol. Uan xa hasta motajtaniayaj ox Jiova kiitaya ke yejuan yekmelauj kiueyichiuayaj uan oksekin akin kinekepilijkaj sayoj kinekiaj kinextiskej nejon (Hech. 20:29, 30).

11, 12. ¿Keyej tikmatij ke amat tein Pablo kijkuiloj kichikauak itakuaujtamatilis Timoteo?

¹¹ Amat tein Pablo kijkuiloj tikyekmatij ke kichikauak itakuaujtamatilis Timoteo, porin kielnamiktij ke Jiova kinixpoloj Coré uan akin kitojtokakej porin amo yekmelauj kiueyichiuayaj. Ijkon kiyeknextij ke kinixtopeuaya. Sayoj ke kinextij ke kimakaya itatiochiualis Aarón akin amo kikauaya yejuatsin. Tein melauj, Pablo kijtojtoya ke maski itech nechikol moajsiskiaj itatojtokakauan Cristo akin amo melaujkej, Jiova kinixmatiskia akin  yekmelauj iuan pouiaj, kemej kichiuak itech itonaluan Moisés.

¹² Jiova amo keman mopata, ta senkis takuaujtamach. Yejuatsin kitauelita tein amo kuali, uan keman kiixtalia, kintatsakuiltia tajtakolchiuanij akin amo moyolnonotsaj. Uan kemej Timoteo “kinotsa[ya] itokay Jiova”, Pablo no kielnamiktij ke monekia “kiixtopeua[s] tein amo kuali” tein kichiuayaj itatojtokakauan Cristo akin amo melaujkej. *

13. ¿Toni uelis senkis tikneltokaskej?

¹³ Tejuan no uelis techyolchikauas itajtoluan Pablo tein kijkuiloj ika ichikaualis Dios. Yekinika, techyolchikaua tikmatiskej ke Jiova kiita ke amo tikauaj. Amo sayoj kiyolpaktia kimatis akonimej amo kikauaj, ta no tel ininka motekipachoua akin iuan pouij. Biblia kijtoua ke “iixtololouan Jiova tachixtinemij itech nochi taltikpak uan ijkon kinextis ichikaualis uan ika kinpaleuis akin kipiaj ininyolo ajsitok iuan yejuatsin” (2 Crón. 16:9). Yejua ika, uelis senkis titakuaujtamatiskej ke tein tikchiuaj ijkuak tiktekitiliaj Jiova ika “yolchipaualis”, amo nenkaj, ta nochipa techtatiochiuia (1 Tim. 1:5; 1 Cor. 15:58).

14. ¿Toni taman taueyichiualis kiixtopeua Jiova?

¹⁴ Uan no, itajtoluan Pablo techelnamiktia ke Jiova kinixtopeua akin sayoj kinextiaj ke kiueyichiuaj. Kemej “iixtololouan Jiova tachixtinemij itech nochi taltikpak”, kuali kinita akin amo kiueyichiuaj ika se yolo ajsitok. Proverbios 3:32 kinextia ke Jiova kiixtopeua akin “kinextia ke yolkuali”, akin kitemoua maj nesi ke tatakamati sayoj ke ichtaka tajtakolchiua. Maski nejon taltikpaknenkej xa kinkajkayauas seki tonalmej taltikpakneminij, imelaujkayo Jiova uan ichikaualis tein amo tami kiyeknextia ke “akin kitatia itajtakoluan amo kuali kiyas” (Prov. 28:13; xikonixtajtolti 1 Timoteo 5:24 uan Hebreos 4:13).

15. ¿Toni moneki amo tikchiuaskej, uan keyej?

¹⁵ Tel miakej itekitikauan Jiova kiueyichiuaj ika nochi ininyolo. Semi amo moitani maj se akin poui itech nechikol kiixtali kichiuas maj nesi ke kiueyichiua Jiova. Sayoj ke komo panok itech itonaluan Moisés uan itech nechikol tein moajsia itech yekinika siglo, no uelis panos axkan (2 Tim. 3:1, 5). ¿Kijtosneki nejon ke moneki tiomeyolouaskej ox tokniuan kiueyichiuaj Jiova ika nochi ininyolo? ¡Amo! Amo kuali yeskia maj tiknemilikan ke amo kuali monejnemiltiaj komo amo tikmatij (xikonixtajtolti Romanos 14:10-12 uan 1 Corintios 13:7). Tein melauj, komo nochipa amo titakuaujtamatij ke tokniuan kuali monejnemiltiaj, uelis kijtakos tokuali uikalis iuan Dios.

16. 1) ¿Toni uelis tikchiuaskej tein techpaleuis maj tikixtikan tein yeski taman tein techuikas maj sayoj tiknextikan ke tikueyichiuaj Jiova? 2) ¿Toni techmachtia recuadro “ Ximoyoltatemolikan ika nejmach”?

¹⁶ Sejse tokniuj moneki kiitas “inemilispan” (Gál. 6:4). Kemej titajtakouanij, uelis amo tikitaskej ke peua tikueyichiuaj Jiova ika se amo kuali tanemilil (Heb. 3:12, 13). Yejua ika, kemansa moneki tikitaskej toni techolinia maj tiktekitilikan Dios. Uelis timotajtaniskej: “¿Nikueyichiua Jiova porin niktasojta uan nikneki maj mochiua notaixyekankauj? ¿Oso nikueyichiua sayoj porin nikneki nikselis kuali nemilis itech Xochital?” (Apoc. 4:11). Komo titanemiliaj itech nejin netajtanilmej, uelis tikixtiskej itech toyolo tein yeski taman tein techuikas maj sayoj tiknextikan ke tikueyichiuaj Jiova.

17, 18. ¿Keyej moneki tikueyichiuaskej Jiova ika nochi toyolo?

¹⁷ Komo tikueyichiuaj Dios ika nochi toyolo techualkuilia miak taman tein kuali. Itech  Salmo 32:2 kijtoua: “Yolpaki taltikpaknenkej akin Jiova amo kitaxtaualtia inepolol, akin itech itanemilil amo onkak takajkayaualis”. Kemej tikitaj, akin kikixtiaj itech ininyolo nochi tein kinuika maj sayoj kinextikan ke kiueyichiuaj Dios, okachi yolpakij axkan uan uelis senkis kiseliskej yolpakilis satepan.

¹⁸ Amo uejkaua, Jiova senkis kichiuas maj moita akonimej kipiaj ome nemilis uan nochin akin kichiuaj tein amo kuali. Ijkon moyekitas “keniuj tel taman se akin yolmelauak uan se akin amo yolkuali, se akin kitekitilia Dios uan se akin amo kitekitiliani” (Mal. 3:18). Sayoj ke axkan techyolchikaua tikmatiskej ke “iixtololouan Jiova kinitaj akin yolmelaujkej, uan inakasuan kinkakij keman motataujtiaj” (1 Ped. 3:12, TNM).