Jesús kijtoj ke Dios kimati nochi tein techpoloua hasta achto ke tiktajtaniskej (Mateo 6:8). Uan no, David, akin tekiuajtik itech ne uejkauj xolal Israel, kijkuiloj: “Amo onkak nion se tajtol itech nonenepil, sayoj ke, ¡xikita! Tejua Jiova, nochi tikmatiya” (Salmo 139:4). Yejua ika, komo Dios kiixmati nochi tein tikmachiliaj uan tein techpoloua, ¿keyej moneki tiktataujtiskej? Tein techpaleuis maj tiknankilikan nejin netajtanil, maj tikitakan toni kijtoua Biblia ika netataujtil. *

Maski Biblia kijtoua ke Jiova * kimati nochi, no kimelaua ke amo sayoj kinejneki kimatis akonimej itekitikauan (Salmo 139:6; Romanos 11:33). Yejuatsin senkis nochi kuali kielnamiki, sayoj ke amo tamati kemej se computadora kampa sayoj ueli se kisentilia seki taman. Amo, ta Dios yekmelauj motekipachoua hasta ika tein tikpiaj toyolijtik, porin kineki kuali mouikas touan (Salmo 139:23, 24; Santiago 4:8). Yejua ika, Jesús techyoleua maj tiktataujtikan Jiova maski yejuatsin kuali kimati tein techpoloua (Mateo 6:6-8). Keman okachi tiktapouiskej toDios akin techchijchiuak tein tiknemiliaj, okachi kuali timouikaskej iuan.

Kemansa xa amo tikmatiskej toni tiktajtaniskej Dios. Oso xa amo uelis tikiluiskej keniuj timomachiliaj. Maski ijkon, yejuatsin uelis kiitas nejon, uan kemej senkis ueli kiixmati tein techpanotok, uelis techmakas tein techpoloua (Romanos 8:26, 27; Efesios 3:20). Keman tikitaj ke Dios techpaleuia itech tonemilis, maski kemansa amo niman tikitaj keniuj kichiuak, nejon okachi techtokia iuan.

Biblia kijtoua ke Dios akin nochi ueli kichiua, kinnankilia itekitikauan akin amo kikauaj, sayoj ke no techmelauilia keyej amo kinnankilia nochin akin kitataujtiaj. Kemej neskayot, ne uejkauj itech seki tonalmej keman israelitas semi tateuiayaj, Dios kiiluij tanauatijkej Isaías maj kinmatiltiani israelitas nejin: “Maski nankichiuaskej miak netataujtilmej, amo namechkaki; ta nanmomauan kitoyaujtokej tel miak esti” (Isaías 1:15). Kemej tikitaj, akin kiixnamikij itanauatiluan Dios oso kitataujtiaj teisa tein kinextia ke sayoj kitemouaj inintanejnekilis, amo uelis kichiaskej maj kinkaki (Proverbios 28:9; Santiago 4:3).

Sayoj ke Biblia no kijtoua: “Tikmatij ya ke komo tiktajtaniliaj Dios tensa ijkon keme yejua in itanejnekilis [...,] techkakilia” (1 Juan 5:14). ¿Kijtosneki nejon ke Dios kinmaka itekitikauan nochi tein kitajtaniaj? Amo. Maj tikitakan tein kipanok tatitanil Pablo, akin expa kitajtanij Dios maj kiajchiuiliani ‘toneukayot tech inakayo ijkon keme yeskia se uitsti’ (2 Corintios 12:7, 8). Xa katka se ueyi kokolis  tein kipiaya itech iixtololouan. ¡Xa semi amo kuali momachilij maj amo uelini moijkuaniliani kokolis ta yejua kipiaya ichikaualis Dios tein ika tapajtiaya uan hasta oksepa kimakaka nemilis se akin momikilijka! (Hechos 19:11, 12; 20:9, 10.) Sayoj ke maski Dios amo kinankilij kemej kinekia, kiselij uan kitasojkamatik tein yejuatsin kinankilij (2 Corintios 12:9, 10).

Semi melauak ke itech Biblia ixnesij sekin akin Dios niman kinnankilij uan kichiuak teisa ika ichikaualis (2 Reyes 20:1-7). Sayoj ke semi amo miakpa panok nejon. Kemansa moitaya ke Dios amo kinnankiliaya tein kitataujtiayaj itekitikauan, uan nejon semi kintekipachouaya. Semej akin kipanok nejon yejua tekiuaj David, akin kijtoj ika tayokol: “¿Hasta kemanian, Jiova, tinechelkauas? ¿Nochipaya? (Salmo 13:1). Sayoj ke ijkuak David kiitak kanachpa Jiova kimakixtijka, okachi takuaujtamatik. Uan moita nejon, porin itech nejon netataujtil no kijtoj: “Nitakuaujtamati itech moueyi netasojtalis tein amo tami” (Salmo 13:5). Kemej David, axkan itekitikauan Dios xa no monekis miakpa kitataujtiskej uan ijkon uelis kiitaskej ke kinnankilia tein kitajtaniaj (Romanos 12:12).

Techmaka tein yekmelauj techpoloua.

Maski tetatmej kintasojtaj ininkoneuan, amo kijtosneki ke nochipa kinmakaj nochi tein kintajtaniaj keman yejuan kinekij. No ijkon, Dios amo no kinankilis tein tiktataujtiskej kemej tejuan tikitaj ke monekia kichiuas oso keman tiknekij tikseliskej. Maski ijkon, uelis titakuaujtamatiskej ke yejuatsin, kemej se tePopaj tetasojtakej, kinmaka ikoneuan tein yekmelauj kinpoloua keman okachi moneki uan kemej okachi kuali (Lucas 11:11-13).

Uelis amo niman tikajsikamatiskej keniuj technankilia.

¿Uan komo tiknekij yolchikaualis keman tikpiaj se kuejmol? ¿Moneki tiknemiliskej ke kemej amo tikitaj teisa tein mochiua ika ichikaualis Dios, kijtosneki ke amo technankiliani? Amo, ta moneki tiktemoskej xa technankilianiya uan amo tikitakej. Xa se akin kuali iuan timouikaj techpaleuij keman okachi tiknekiaj nepaleuil (Proverbios 17:17). Maj tiknemilikan ke xa Jiova kiolinij maj techpaleuiani. Dios no uelis technankilis tein tiktataujtijkej ika tein kijtoua Biblia. Xa ompa tikajsikej tamatilis tein techpaleuia maj tikixnamikikan se ouijkayot (2 Timoteo 3:16, 17).

Dios amo kiyektalia nochi kuejmolmej tein kipiaj itekitikauan, ta kinmaka chikaualis tein kinpaleuis maj kixikokan (2 Corintios 4:7). Se tonal, Jesús kitataujtij iTajtsin maj kiajchiuiliani se ueyi ouijkayot, porin kimouiliaya maj amo kuali ika motajtouani itokay Dios. Jiova kinankilij keman kititanik se ángel maj kiyolchikauati (Lucas 22:42, 43). No ijkon axkan, Dios uelis kichiuas maj semej akin iniuan kuali timouikaj maj techyolchikaua keman okachi moneki (Proverbios 12:25). Keman Jiova ijkon technankilia uelis amo niman tikitaskej, yejua ika moneki tiktemoskej keniuj kichiua.

Kemansa monekis tikchiaskej maj ejko tonal keman kiitas ke okachi kuali.

Biblia kiyekijtoua ke Dios akin nochi ueli kichiua, kinnankilia akin yolyemankej keman kiita ke okachi kuali (1 Pedro 5:6). Yejua ika, komo moita ke amo niman kinankilia tein tiktataujtianij, moneki amo tiknemiliskej ke amo toka motekipachoua. Ta kemej okachi kuali kiixmati nochi uan kimati kemanian okachi kuali maj tikselikan, yejuatsin techmaka tein okachi kuali.

Xionmonemili ke tikonpia se konetsin akin nojnel uan mitsontajtania se bicicleta. ¿Niman tikonkouiliskia? Komo tikonita ke ayamo uelis kinejnemiltis, xa ayamo tikonkouilis. Xa tikonnemilis ke okachi kuali tikonkouilis hasta keman tikonitas ke amo ika mokokos. No ijkon, komo kuali yetok tein tikyolnejnekij uan tiksentokaj tiktataujtiaj, Dios uelis techmakas keman kiitas ke okachi kuali (Salmo 37:4).

Biblia kinyoleua akin kichiuaj kemej Cristo maj kisentokakan takuaujtamatikan ke tel tapaleuia maj  tiktataujtikan Dios. Xa aksa kijtos: “Nejon amo ouij se kijtoua”. Melauak nejin, xa tiknekiskej maj Dios niman technankili uan amo tiknekiskej tikchiaskej komo uejkaujya tikpanotokej se ueyi kuejmol oso techchiuiliaj tein amo kuali. Komo ijkon techpanoua, semi kuali komo tikelnamikij ke Jesús tamachtij ke moneki tiksentokaskej tiktataujtiskej Dios.

Itech se neskayot tein Jesús kitemakak, ika tajtoj se siuat akin amo nemiaok itakauj akin miakpa kitataujtiaya se tamelaujkej akin amo yolkuali maj kipaleuiani (Lucas 18:1-3). Maski yekinika nejon tamelaujkej amo kinekik kipaleuis, satepan kinemilij: “Nijin siuakaual kisentoka nechkuejmoloki, ika ya nojon nikpaleuis [...] para ma amo kisentoka ok uiki” (Lucas 18:4, 5). Komo se tamelaujkej akin amo yolkuali motemakak kipaleuis se siuatsin akin kipanotoya tatasojtilis porin amo kinekia maj kijtouilianij tein amo kuali, okachiok toDios tetasojtakej kinpaleuis akin kitataujtiaj “youal itonal”. Kemej kijtoj Jesús, “Totajtsin Dios amo uejkauas de techpaleuis” (Lucas 18:6-8).

Maski kemansa amo tiknekiskej tiksentokaskej tiktajtaniskej Dios maj techpaleui, moneki amo timosenkauaskej. Komo tiksentokaj tikchiuaj, tiknextiskej ke yekmelauj tiknekij maj technankili. Uan no, tikajsikamatiskej keniuj Dios kinankilia tein tiktajtaniaj, uan nejon techpaleuis maj okachi timotokikan iuan. Kemej tikitakejya, komo tiktataujtiaj Jiova kemej kineki uan tikchiuaj ika takuaujtamatilis, uelis tikyekneltokaskej ke technankilis (Lucas 11:9).