Akin kitemouaj keniuj kipajtiskej kokolismej itech se itanemilil, kijtouaj ke komo aksa kineki yekmelauj yolpakis, amo sayoj moneki kichiuas tein kipaleuis maj yolto. Uan moita ke kinekij nejon, porin taltikpakneminij kinekij kichiuaskej teisa tein kinpaleuia miakej. Oksekin, keman kisaj itech tekit, kitemouaj nejon yolpakilis itech itachijchiualis toTajtsin, itech tamachijchiualis oso tatsotson. Sayoj ke miakej amo kiajsij nejon tein kitemouaj.

Akin kiixtajtoltiaj Biblia amo kimoujkaitaj maj taltikpaknenkej kimachili ke moneki amo sayoj nemis ta motokis iuan Dios. Yekinika capítulos tein kipia Génesis kinextia ke Dios kichijchiuak yekinika takat uan yekinika siuat, uan nochipa kinnojnotsaya uan kinkauak maj kipiakan se kuali uikalis iuan (Génesis 3:8-10). Amo kichijchiuak taltikpaknenkej maj iselti moixyekana, ta maj kimachiliani ke moneki mouikas iuan Tachijchiujkej. Biblia miakpa kinextia nejon.

Kemej neskayot, Jesús kijtoj: “Yolpakij akin kimachiliaj ke moneki motokiskej iuan Dios” (Mateo 5:3, TNM). Nejin tajtolmej kinextia ke motelneki maj timotokikan iuan Dios, ta sayoj ijkon uelis tikpiaskej yolpakilis. ¿Keniuj uelis tikchiuaskej? Jesús technankilia: “In taka ma nemikan amo sayo ika in takualis san. Ta, no [...] ika nochi in tajtolme ten Dios techmaktilijtinemi” (Mateo 4:4). Kemaj, itajtoluan Dios, oso itanemililuan uan itanauatiluan tein moajsij itech Biblia, uelis techpaleuis maj tiyolpakikan. ¿Keniuj techpaleuia? Maj tikitakan eyi taman nepaleuil.

Axkan moajsij motelmachtianij akin tayolmajxitiaj itech netasojtalis, kuali uikalis iniuan oksekin, kalyetouanij, keniuj se kimelauas kuejmolmej, yolpakilis uan hasta akin teiluiaj keyej tinemij. Sayoj ke, ¿melauj ke akin okachi kuali uelis techyolmajxitis itech nejon taman yejua Jiova akin kichijchiuak taltikpaknenkej?

Kemej neskayot, keman tikonkouati se cámara oso se computadora, ¿melauj ke tikonchia maj  kiualkui se amatsin kampa kimelaua keniuj kuali tikontekitiltis uan maj mitsonpaleui kemej tikonneki? Biblia tamati kemej nejon amatsin, ta ompa, Dios akin techchijchiuak techmachtia keniuj tinemiskej. Nejin amatajkuilol kimelaua keyej Dios techchijchiuak uan keniuj moneki tikuiskej tonemilis kemej okachi techpaleuis.

Ijkon kemej amatsin kuali kimelaua keniuj mokuis tepos, Biblia technejmachtia toni tachiualismej uelis kijtakos oso tatsakuilis maj kuali tikuikan tonemilis. Xa tikitaskej ke okachi amo ouij se kitojtokas tein oksekin tayolmajxitiaj. Sayoj ke komo tiktojtokaj tein technauatia akin techchijchiuak, ¿melauj ke okachi techpaleuis maj tikixnamikikan kuejmolmej uan maj tikpiakan tein kuali?

Sayoj ke maski Jiova techyekana uan techmaka tanauatilmej, amo techchikaujkauia maj tiktakamatikan. Ta kemej techtasojta uan kineki techpaleuis, techiluia ika netasojtalis: “Nejua, Jiova, nimoDios, Akin mitsnextilia keniuj kuali tinemis, Akin mitsnejnemiltia kampa moneki tiojtokas. ¡Komo yekmelauj tiktakamati notanauatiluan! Moyolseuilis yeski kemej se ueyiat, uan momelaujkayo yeski kemej olas itech ueyiat” (Isaías 48:17, 18). Nejin kinextia ke komo tikchiuaj kemej Dios techiluia, tikpiaskej yolpakilis. Yejua ika moneki tiktemoskej Dios.

Sekin kijtouaj ke amo moneki maj tiktemokan Dios oso nion kineltokaj. Kinemiliaj ke komo nemiskia se Dios akin techtasojta, amo onkaskia tein amo kuali. Kemej neskayot, motajtaniaj: “¿Keyej tajyouiaj akin yolkualmej? ¿Keyej miakej konemej akin yolij kinpoloua se taman ininnakayo? ¿Keyej semi moajsij akin teikamauiltiaj?”. Kinamiki maj se motajtani nejon, uan komo se kiajsi tanankilil tein tetaneltoktia uelis senkis kipatas tonemilis. Maj amo tiktajtakoltikan Dios nochi tein mochiua tein amo kuali, okachi kuali maj tikitakan ox itech iTajtol, Biblia, kimelaua nejon.

Itech Génesis, capítulo 3, tikitaj ke Satanás, ika se kouat, kitemoj kinchiualtis yekinika takat uan yekinika siuat maj amo kitakamatinij Dios. Jiova kiniluij ke komo kikuaskiaj koujtakilot tein kiixnextia tein kuali uan tein amo kuali, mikiskiaj. Satanás kiiluij Eva: “Yekmelauj amo nanmikiskej. Porin Dios kimati ke itech tonal keman nankikuaskej koujtakilot, nanixtajtapouiskej uan nanmochiuaskej kemej Dios, uan nankiixmatiskej tein kuali uan tein amo kuali” (Génesis 2:16, 17; 3:4, 5).

Ika nejin, Satanás amo sayoj kijtoj ke Dios se takajkayaujkej, ta no kiteajsikamatiltij ke amo kuali tekiuajti. Kinextij ke okachi kuali nemiskej komo kikakij yejua uan amo Dios. ¿Keniuj ueliskia monextis ox melauak oso amo tein kijtouiliaj Dios? Jiova kikauak maj kisentoka mochiua tein panotoya. Ika okseki tajtolmej, kikauak maj panouanij tonalmej uan ijkon Satanás uan nochin akin kitojtokaskiaj ueliskiaj kinextiskej ox taltikpaknenkej ueli okachi kuali nemi uan amo moneki maj kitemo Dios.

 ¿Toni tikonnemilia tejuatsin? ¿Yekmelauj taltikpaknenkej ueli kuali nemi, ueli moyekana iselti uan amo moneki maj kitemo Dios? Nikan taltikpak semi moita tajyouilis, teikamauiltilis, kokolismej, mikilis, amo kuali tachiualismej, poliujtok chipaujkanemilis, onkak neteuilis uan kinsenmiktiaj miakej. Nochi nejin uan oksekiok ouijkayomej tein kijyouianij taltikpakneminij itech xiujmej tein panouanij, senkis kinextia ke amo tapaleuia maj taltikpaknenkej kiyejyeko iselti moyekanas uan maj amo kitemo Dios. Biblia amo kinextia ke itajtakol Dios maj tajyoui taltikpaknenkej, ta kinextia se taman tein yekmelauj kiualkui tajyouilis: “Taltikpaknenkej kiixyekanani taltikpaknenkej uan ijkon kitajyouiltia” (Eclesiastés 8:9).

Ika nochi tein tikitakejya, ¿melauj ke moneki tiktemoskej Dios uan ijkon amo sayoj tikajsiskej itanankililuan netajtanilmej tein techtekipachoua, ta no tikajsiskej akin kimelauas kuejmolmej?

Taltikpakneminij nochipa kinekinij mokixtiliskej kokolismej, ueuentsiyot uan mikilis. Miakej kikuinij miak tiempo, chikaualis uan tomin, sayoj ke amo uelinij kiajchiuanij. Sekin kinemiliaj ke uelis kipiaskej nejon komo tayij seki taman pajti oso kichiuaj okseki taman, uan oksekin kitemouaj itech ciencia, sayoj ke amo kiajsinij tein kitemouaj.

Dios kineki maj taltikpakneminij yolpakikan. Yejua nejon kinekia keman kichijchiuak yekinika takat uan yekinika siuat, uan kisentoka ijkon kineki (Génesis 1:27, 28; Isaías 45:18). Tikyekmatij ke nochi tein Jiova kijtoua, yekmelauj mochiuas (Isaías 55:10, 11). Biblia kijtoua ke Dios motenkaua ke kichiuas nikan taltikpak se xochital kemej tein kipolojkej yekinika takat uan yekinika siuat. Apocalipsis oso Revelación 21:4, kijtoua ke Dios “kinelkaualtis de ninchokilisuan [...]. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok. Uan ijkon yeski porin nochi tajtamik ya de ne achtopa onkaya”. ¿Keniuj kichiuas nochi nejon tein tel kualtsin? ¿Uan keniuj uelis tikseliskej keman mochiuas nejin tein Dios motenkaua?

IKonetsin Dios, Jesucristo, kinnextilij imomachtijkauan maj kitataujtikan Dios maj mochiua itanejnekilis toTajtsin. Miakej kimatij uan hasta kichiuaj nejon netataujtil tein moixmati kemej padrenuestro. Kijtoua ijkon: “ToTajtsin akin tiyetok iluikak, maj moueyitali motokay. Maj uiki motekiuajyo. Maj mochiua motanejnekilis, kemej iluikak, no ijkon nikan taltikpak” (Mateo 6:9, 10, TNM). ITekiuajyo Dios kiyektalis nochi tein kiuejuelojtokej taltikpaktekiuajyomej uan ijkon mochiuas yankuik taltikpak kampa onkas melaujkayot ijkon kemej Dios motenkaua (Daniel 2:44; 2 Pedro 3:13). * Sayoj ke tejuan no moneki tikchiuaskej teisa. ¿Toni nejon?

Jesús kinextij se taman tein moneki tikchiuaskej  uan amo ouij: “Ne nachipa nemilis kijtosneki yejua nijin: Ke in taltikpakuani ma mitsonixmatikan Tejuatsin ke tion Dios tion Yolmelauaktsin, uan sayo Tejuatsin tion Dios. Uan [...] ma nechixmatikan Nejuatsin ke ni Jesucristo ten Tejuatsin tinechonualtitanik ya nikan taltikpak” (Juan 17:3). Kemaj, sayoj Jiova uelis kichiuas maj tinemikan nochipaya itech se yankuik taltikpak. Yejua ika, maj oksepa timotajtanikan, ¿moneki maj tiktemokan Dios? Kemaj moneki.

Kemej ome mil xiuit achto, itech Areópago oso colina de Marte, itech altepet Atenas, tatitanil Pablo kiniluij motelmachtianij griegos tein kichiua Dios: “Yejuatsin techmakatok tonemilis nikan taltikpak, uan no [...] toijiyo. Uan nochi ten tikpiaj tomako”. Satepan no kinextij: “‘Ika iuelilis [...] nochi tejuan tinentinemij uan tinejnentinemij uan tiyoltinemij’. Uan no sekin namotanauatijkauan ten kiniliaj poetas, [...] kijkuiloayaj ijkuin: ‘Nochi tejuan titaltikpakuani tiualeuke sayo de Dios’” (Hechos 17:25, 28).

No ijkon axkan semi melauak tein Pablo kiniluij akin nemiaj Atenas. ToDios kichiua maj timijyotikan, techmaka tein tikmajseuaskej uan tein titayiskej. Komo amo techmakaskia, amo ueliskia tinemiskej. Sayoj ke ¿keyej Dios kisentoka kitemoua kinpaleuis taltikpakneminij, ta miakej nion no itech tanemiliaj? Pablo technankilia: “Para [...] ma se tonal ma tiktemokan uan ma timotokitij iixpan Yejuatsin uan ma tikajsikan. Porin ueyi melau ke Yejuatsin amo uejka yetika de cada senme de tejuan” (Hechos 17:27).

¿Tikonuelitaskia okachi tikonixmatis Dios? ¿Tikonnekiskia okachi tionmomachtis katiyejua itanejnekilis uan itayolmajxitilis tein mitsonpaleuis okachi kuali xionnemi axkan uan nochipaya? Komo ijkon, timitsonyoleuaj xiontajto iuan akin mitsonkauilij nejin amatajkuilol, oso xikontemo akin kijkuilojkej. Yejuan ika miak pakilis mitsonpaleuiskej.