BIBLIA kijtoua: “Konemej se netetayokolil tein techkauilia Jiova; tein yoliki tamati kemej se taxtauil” (Sal. 127:3). Yejua ika, keman tetatmej akin kitekitiliaj Dios kipiaj se konetsin kinualkuilia ueyi yolpakilis.

Sayoj ke no kinualkuilia okseki taman tein monekis kichiuaskej. Mojmostaj moneki kimakaskej takual tein kipaleuis maj kuali moskalti uan maj chikauak. No ijkon moneki kemej yeskia kitamakaskej ika iTajtol Dios uan kiyekanaskej, komo kinekij maj kipia se chikauak takuaujtamatilis. Monekis kimachtiskej tein Dios tayolmajxitia (Prov. 1:8). ¿Kemanian moneki peuaskej uan toni kimachtiskej?

Maj tikitakan tein kichiuak Manóah, akin pouia itech ichankauan Dan uan nemia Zorá, se altepet tein moajsia ne uejkauj Israel. Inamik amo uelia kinpiaya konemej, maski ijkon, se tonal iángel Jiova kimatiltij Manóah ke kipiaskiaj se konetsin (Juec. 13:2, 3). Tikyekmatij ke yejuan akin kitekitiliayaj Dios semi kinyolpaktij kimatiskej nejon, sayoj ke no semi kintekipachoj. Yejua ika, Manóah motataujtij: “Xinechtapojpolui, Jiova. Takat akin kitekitilia Dios akin melauak tein yekin tikualtitanik, xikaua maj oksepa techitaki, ika kualtakayot, uan maj techilui toni tikchiuaskej ika konetsin tein yolis” (Juec. 13:8). Manóah uan inamik kinekiaj kuali kiiskaltiskej ininkonetsin. Tikmatij ke yejuan niman peujkej kimachtiaj ininokichpil Sansón itanauatiluan Dios, uan moita ke amo nenkaj kichiujkej nejon chikaujkayot. Biblia kijtoua: “Satepan, iespíritu Jiova peuak tekiti [itech Sansón]”. Ika ichikaualis Dios, kichiuak uejueyi taman keman katka semej tamelauanij ompa Israel (Juec. 13:25; 14:5, 6; 15:14, 15).

¿Kemanian tetatmej moneki peuaskej kinmachtiskej ininkoneuan? Biblia kijtoua ke Eunice, imomaj Timoteo, uan iueyinan Loida, kimachtijkej “Tajkuilolamatsin de Dios”, ‘kuak pili ok katka’ (2 Tim. 1:5; 3:15). Kemej tikitaj, yejuan peujkej kimachtijkej Timoteo keman piliok katka.

Tetatmej akin kichiuaj kemej Cristo semi kuali maj kitataujtikan Dios maj kinyekana uan maj kiixtalikan keniuj uelis peuaskej kinmachtiskej ininkoneuan keman nojnelmej. Proverbios 21:5 kijtoua: “Akin ika nejmachkayot niman kiixtalia keniuj kichiuas teisa yekmelauj kuali kisas”. Tikmatij ke achto ke yolis konetsin, tetatmej ika nejmachkayot niman kiixtaliaj toni kichiuaskej. Xa hasta kiamataliskej nochi taman tein kipolos. Sayoj ke no moneki kinemiliskej keniuj kimachtiskej iTajtol Dios. Kitemoskej kichiuaskej nejon niman keman yolis.

Se amaix tein kimelaua keniuj moskaltiaj konemej kijtoua ke itech seki metsti satepan keman yoli konetsin, ikuatixyo semi ijsiujka kitilana miak taman. Yejua ika itech nejon tonalmej semi kuali maj tetatmej peuakan kimachtikan keniuj tamati Dios uan toni tanauatia.

Se temomaj akin tekiti kemej precursor regular kijtoua tein kichiuak iuan isiuapil: “Peuak nikuika tanojnotsalis keman yekin kipiaya se metsti. Maski yejua amo kiajsikamatia keyej nikuikaya, nikmatia ke kipaleuiskia. Keman kiajxitij ome xiuit, ueliaya iselti kitemakaya amatsitsin itech tanojnotsalis”.

Keman tetatmej niman kimachtiaj ininkonetsin kiualkui tein kuali. Sayoj ke miakej tetatmej kijtouaj ke semi kinouijmaka kimachtiskej tein kijtoua Dios.

Kemej konemej niman peuaj tajmatij oso amo uejkaua tekakij, tetatmej uelis semi kinouijmakas kinmachtiskej. Konemej nochi kinekij kimatiskej, uan nejon panoua porin kitemouaj kiitaskej tein kinyoualoua. ¿Toni uelis nankichiuaskej uan ijkon nanmokonetsin namechkakis keman nankimachtiskej?

Maj tikitakan tein Moisés kijtoj itech Deuteronomio 6:6, 7: “Nejin tajtolmej tein axkan nimitsnauatijtok moneki yetos itech moyolo; uan moneki xikchiua maj mokaua itech mokonetsin uan ika titajtos keman titokotsyetos mokalijtik uan keman tiojtokatos uan keman timotekas uan keman timeuas”. Tajtolmej xikchiua maj mokaua kiteajsikamatiltia ke miakpa kiiluiaj tein kinekij kimachtiskej. Se konetsin tamati kemej se koujkonet tein moneki maj mojmostaj se kitekili tepitsin at. Komo tejuan techpaleuia maj techelnamiktikan tein motelneki, tikyekmatij ke okachi kinpaleuis konemej.

Tetatmej moneki kixeloskej tepitsin tonal uan ijkon uelis kimachtiskej ininkonetsin tein kijtoua Dios. Sayoj ke uelis kinouijmakas kiajsiskej kemanian kimachtiskej porin moneki kichiuaskej miak taman. Tatitanil Pablo tayolmajxitij maj ‘amo kiauilojtiyakan san in tonalme’ uan ijkon uelis kichiuaskej itekiyo Dios (Efes. 5:15, 16). ¿Keniuj uelis kichiuaskej? Se tayekankej itech nechikol semi kiouijmakaya kiajsis tiempo tein kikuis iuan ikonetsin, itech nechikol uan itech tekit. Inamik akin tekiti kemej precursor regular, no semi kipiaya miak taman tein monekia kichiuas. ¿Kani kikixtijkej tiempo  uan ijkon kimachtiskiaj ininsiuapil? Tepopaj kijtoua: “Mojmostaj kualkan achto ke nitekititiuj, nonamik uan nejua tikixtajtoltiliaj amaix Tanojnotsmej tein ualeuaj itech Biblia oso Examinando las Escrituras diariamente. Uan youak achto ke tikochtekaskej, tikixtajtoltiliaj tepitsin, uan tikuikaj keman titanojnotsatij. Amo tiknekij maj sayoj ijkon pano yekinika xiujmej tein kipia”.

Tikinmachtiaj tokoneuan porin tiknekij maj monejnemiltikan kemej moneki keman moskaltiskej. Sayoj ke yekinika tikchiuaj nejon porin tiknekij maj kiyoltasojtakan Dios (Mar. 12:28-30).

Salmo 127:4 kijtoua: “Kemej flechas imako se takat akin chikauak, ijkon tamatij konemej tein se kinpia keman se telpochok”. Konemej tamatij kemej flechas tein moneki kuali kijkopiliskej kampa kinekij maj ajsi flecha. Satepan ke kikajkauaskej amo uelis oksepa kitamotaskej. Tetatmej kinpiaj ininkoneuan sayoj seki xiujmej tein amo semi uejkaua. Yejua ika, itech nejon xiujmej moneki kichiuaskej maj itanauatiluan Dios mokaua itech inintanemilil uan ininyolo konemej.

Keman tatitanil Juan ika tajtoj akin kinitaya kemej ikoneuan, kijkuiloj: “Amo teyi ongak okse pakilis ten kachi nechpaktia kuak nikaki ke nokoneuan taneltokani de ke chipaukanentinemij itech in yek melauak Tajtoltsin de Dios” (3 Juan 4). Tetatmej akin kitekitiliaj Dios no ijkon momachiliskej keman kiitaskej ke ininkoneuan “chipaukanentinemij itech in yek melauak Tajtoltsin de Dios”.