Biblia techmachtia ke tejuan titajtakouanij. Yekinika takat Adán techkauilij tajtakol tinochin, uan axkan yejua techyekana. Yejua ika, kemansa tikchiuaj tein amo kuali uan satepan tiknemiliaj maj amo tikchiuanij. IKonetsin Dios, Jesucristo, momikilij uan ijkon kiixtauak totajtakoluan. Inemilis tein kitemakak, kichiuak maj Dios ueli techtapojpolui totajtakoluan. Nejin se netetayokolil tein techmaka yejuatsin. (Xikonixtajtolti Romanos 3:23, 24.)

Sekin kichiuanij uejueyi tajtakolmej uan motajtaniaj ox Dios uelis kintapojpoluis. Techyolpaktia tikmatiskej tein kijtoua Biblia: “Iesyotsin de Jesucristo Ikonetsin Dios, [...] techchipautinemi de nochi totajtakol” (1 Juan 1:7). Kemej tikitaj, Jiova ika miak pakilis techtapojpoluia maski tikchiuaskej uejueyi tajtakolmej, komo ika nochi toyolo timoyolnonotsaj. (Xikonixtajtolti Isaías 1:18.)

Komo tiknekij maj Jiova techtapojpolui, moneki tikixmatiskej: tikajsikamatiskej keniuj kichiua teisa, tikmatiskej toni techyolmajxitia uan toni technauatia maj tikchiuakan (Juan 17:3). Jiova ika miak pakilis kintapojpoluia akin moyolnonotsaj ika inintajtakoluan uan mochikauaj amo kichiuaskejok. (Xikonixtajtolti Hechos 3:19.)

Kemaj uelis tikyolpaktiskej Dios. Yejuatsin kiajsikamati ke titajtakouanij, semi yolkuali uan teiknelia. ¿Melauj ke nejin techolinia maj okachi timomachtikan keniuj uelis tikyolpaktiskej? (Xikonixtajtolti Salmo 103:13, 14.)