¿AKONI amo kiuelita mouikas iniuan akin yolyemankej? Sayoj ke tetayokoltij tikijtoskej ke axkan amo semi moajsij taltikpakneminij akin yolyemankej, uan okachiok akin uejueyi chiuanimej oso kipiaj tanauatil. ¿Toni uelis tikijtoskej ika Jiova, Akin okachi ueyichiujkej itech iluikak uan taltikpak? ¿Yolyemanik yejuatsin? Tanauatijkej Jeremías kijkuiloj seki tajtolmej tein kinankilia nejin netajtanilmej. (Xikonixtajtolti Lamentaciones 3:20, 21.)

Itech amaix Lamentaciones moijtoua se taman tein kipanokej israelitas tein okachi tetayokoltij. Jeremías, akin kijkuiloj nejin amaix, kiitak keniuj babilonios kiixpolojkej Jerusalén tein semi kitasojtaya. Uan maski kimatia ke israelitas kinnamikia maj Dios kintatsakuiltiani porin tajtakojkej, semi motayokoltijtoya. Sayoj ke ¿kinemiliaya ke amo ueliskia kichias tein kuali uan ke Jiova tel uejka moajsia, uan amo keman kintapojpoluiskia itekitikauan tein moyolnonotskej? Maj tikitakan keniuj Jeremías kinojnotsak Dios keman tajtoj inintenkopa israelitas.

Maski miakej semi motayokoltijtoyaj, Jeremías kinextij ke kichiaya tein kuali porin kitataujtij Jiova: “Yekmelauj tejua tinechelnamikis uan timoixpilos kampa niyetok” (versículo 20). * Nejin kinextia ke Jeremías senkis kineltokaya ke Dios amo kinelkauaskia yejua uan nion semej itekitikauan tein moyolnonotskej. Sayoj ke, ¿toni kichiuaskia Dios akin kipia nochi uelilis? (Apocalipsis [Revelación] 15:3.)

Jeremías senkis kineltokaya ke Jiova ‘moixpiloskia’ kampa yetokej taltikpakneminij tein moyolnonotsaj. Nejin tajkuilol no mokepani ijkon: “Tejua titemos kampa niyetok” (Diccionario de figuras de dicción usadas en la Biblia, tein iaxka Ethelbert W. Bullinger). ¡Nejin tajtolmej kinextia ke Dios semi teiknelia! Jiova, akin “Ueyichiujkej itech nochi taltikpak”, ika miak pakilis moixpiloua oso temoua kampa yetokej itekitikauan uan kinpaleuia maj kiyektalikan ininnemilis uan maj oksepa kipiakan itatiochiualis (Salmo 83:18). Nejin kiyolchikauak tanauatijkej Jeremías akin amo keman kikauak Dios. Yejua ika amo yolijsiuik, ta kichiak maj Jiova kiixtaliani tonal keman kinmakixtiskia itekitikauan tein moyolnonotskej (versículo 21).

Nejin tajkuilolmej techmachtia ome taman tein Jiova kinextia. Yekinika techmachtia ke yejuatsin yolyemanik (Salmo 18:35). Maski “kitelpia chikaualis”, ika miak pakilis kemej yeskia moixpiloua kampa tiyetokej uan ijkon techpaleuia keman okachi moneki (Job 37:23; Salmo 113:5-7). ¡Semi techyolseuia tikmatiskej nejin! Ojpatika, techmachtia ke Jiova semi teiknelia. Uelis tikijtoskej ke ‘niman tetapojpoluia’, uan oksepa kinselia akin moyolnonotsaj uan kikauaj inintachiualis tein amo kuali (Salmo 86:5). Nejin ome taman, yolyemanilis uan teiknelilis, nochipa sentekitij.

Semi tiktasojkamatij maj Jiova amo kemej taltikpaktekiuanij tein moueyichiuaj, akin yoltakuaujkej uan amo teikneliaj. ¿Amo tikonuelitaskia okachi tikonixmatis nejin Dios tein yolyemanik uan akin, kemej yeskia moixpiloua uan ijkon kinyolseuia itekitikauan uan kinajsikamatiltia ke uelis kichiaskej tein kuali?

[Tajtolmelaualis]

[Tanemilil itech página 32]

Jiova ika miak pakilis kemej yeskia moixpiloua kampa tiyetokej uan ijkon techpaleuia keman okachi moneki