¿Toni moneki kichiuaskej itatojtokakauan Cristo axkan?

TEIN yekmelauj kichiuaj kemej Cristo, kitojtokaj neskayot tein kikauak Jesús uan amo mokalakiaj itech política. Yejua ijkon kiyeknextij keman kijtoj: “Nejuatsin amo no nipoutinemi ok nikan taltikpak”. Uan imomachtijkauan kiniluij: “Amo [nan]poutinemij ok iuan in taltikpaknemini” (Juan 15:19; 17:14). Maj tikitakan keyej itatojtokakauan Jesús moneki maj amo mokalakikan itech política.

1. Taltikpaknenkej amo nochi ueli kichiua. Biblia kijtoua ke taltikpaknenkej amo ueli taixyekana uan nion kiseliani tanauatil maj kichiua. Jeremías kijkuiloj: “Amo iaxka taltikpaknenkej tein nentok nion kiyekanas itaksalis” (Jeremías 10:23).

Ijkon kemej taltikpaknenkej amo chijchiujtok maj ueli patani, no ijkon amo chijchiujtok maj ueli taixyekana kemej moneki. Se tajkuilojkej tein motokaytia David Fromkin, kiajsikamati ke tekiuanij amo ueli nochi kichiuaj uan kinextij: “Tekiuanij no taltikpakneminij uan mopolouaj, yejua ika amo nochipa mochiua tein kiixtaliaj. Yejuan kipiaj chikaualis, sayoj ke amo ajsitok” (The Question of Government [Itachiualisuan tekiuajyot]). ¡Yejua ika Biblia techiluia maj amo titakuaujtamatikan iuan taltikpaknenkej! (Salmo 146:3.)

2. Amokuali espíritus tekititokej maski miakej amo kimatij. Keman Satanás kimakasnekia Jesús nochi taltikpaktekiuajyomej, Jesús amo keman kijtoj ke nejon amo iaxka Amokuali uan yejua ika amo ueliskia kimakaskia taixyekanalis. Tein melauj, Jesús kinextij ke Satanás yejua akin “nikan taltikpak takitskijtok ika ne ichikaualis”. Uan seki xiujmej satepan, tatitanil Pablo kijtoj ke yejua “ueyi chiuke in amokuali  ten tayekantinemi nikan taltikpak” (Juan 14:30; 2 Corintios 4:4). Itech se amat tein Pablo kintitanilij tein no kichiuayaj kemej Cristo, kijkuiloj: “Timoteuijtinemij iuan ne amokuali tanauatiani den takitskijtokke nikan taltikpak kampa sayo ongak tayouayanilot [...;] [no] iuan nochi amokuali chikaukaejekame ten takitskijtokke tech nochi in lugares de eluiyaktsinko” (Efesios 6:12). Nejin kinextia ke akin yekmelauj taixyekantokej itech taltikpak, yejuan amokuali espíritus, maski miakej taltikpakneminij amo kimatij. Yejua ika, ¿keniuj moneki itatojtokakauan Cristo kiitaskej política?

Maj titanemilikan itech nejin neskayot: taltikpaktekiuajyomej tamatij kemej tsikitsitsin barcos tein kinuikatok ueyiat tein motalojtok, porin yejuan kinuikatok ininchikaualis amokuali espíritus. Uan ijkon kemej taltikpakneminij tein kinejnemiltiaj barcos amo ueli kiixnamikij chikaualis tein kipia ueyiat tein motalojtok, no ijkon políticos amo uelij kiixnamikij ininchikaualis nejon amokuali espíritus, akin sayoj kitemouaj kinijtakoskej taltikpakneminij uan kichiuaskej maj tel tajyouikan (Apocalipsis [Revelación] 12:12). Yejua ika, sayoj Jiova Dios uelis kipatas nochi porin kipia okachi chikaualis ke Satanás uan iamokuali ejekauan (Salmo 83:18; Jeremías 10:7, 10).

3. Tein yekmelauj kichiuaj kemej Cristo sayoj kipaleuiaj iTekiuajyo Dios. Jesús uan imomachtijkauan kimatiaj ke ijkuak ajsiskia tonal, Dios kitaliskia ne iluikak se tekiuajyot tein taixyekanaskia itech nochi taltikpak: iTekiuajyo Dios. Biblia kijtoua ke Jiova kiixtalij Jesucristo kemej Tekiuaj itech nejin Tekiuajyot (Apocalipsis 11:15). Jesús kimatia ke nejon tekiuajyot kinixyekanaskia nochin taltikpakneminij, yejua ika keman tanojnotsaya, yekinika kitenextiliaya “kuali tanauatilmej ika itekiuajyo Dios” (Lucas 4:43, NM). No kinmachtij imomachtijkauan maj tajtanikan itech netataujtil: “Maj uiki motekiuajyo”. ¿Keyej? Porin keman taixyekantos nejon Tekiuajyot, mochiuas itanejnekilis Dios nikan taltikpak kemej ne iluikak mochiujtokya (Mateo 6:9, 10, NM).

¿Uan toni kinpanos taltikpaktekiuajyomej? Biblia kijtoua ke “nochi tataman tayekanani ten kinyekantinemij in taltikpakuani nochi senmanauak” senkis ixpoliuiskej (Apocalipsis 16:14; 19:19-21). Yejua ika, akin kineltoka ke iTekiuajyo Dios kinixpolos nochin taltikpaktekiuajyomej, amo takuaujtamati itech política. Komo kinpaleuiskia semej taltikpaktekiuajyomej maski kimati ke ixpoliuiskej, tein melauj kinpaleuijtoskia akin kitauelitaj Dios.

[Tanemilil itech página 6]

Itaixpantijkauan Jiova amo tayolchikauaj maj motayektali ika política, porin kipaleuiaj iTekiuajyo Dios