David kijkuiloj: “Amo akin nikitani akin yolmelauak maj kisenkauakan, nion ikoneuan maj kitemojtokan tein kikuaskej” (Sal. 37:25). David kijtoj nejin tein kipanok itech inemilis keman ininka tajtoj miakej itekitikauan: kiyekmatia ke Jiova nochipa kiyekpiak. Sayoj ke, itajtoluan amo kijtosneki ke nion se itekitikauj Jiova amo keman teyi kipolouani uan nion keman teyi kipolos.

Kemansa David kipanok uejueyi ouijkayomej. Semej tein kipanok yejua keman kicholuijtinemia Saúl. Kemej kitamijtoyajya tein kikuaskiaj, tajtanik maj kimakaskiaj tein kimajseuaskiaj yejua uan itapaleuijkauan (1 Sam. 21:1-6). Itech nejon ueyi ouijkayot, David monekik ‘kitemos tein kikuaskia’. Sayoj ke kiitak ke Jiova amo kisenkaujka. Tein melauj, nion seko itech Biblia ixnesi maj tajtantinemiskia tein kikuaskia.

Itech Mateo 6:33 itech Traducción del Nuevo Mundo moajsi itajtoluan Jesús keman kiyekijtoj ke Dios kinmakas tein kinpolos akin kitayekanaltiaj iTekiuajyo itech ininnemilis. Jesús kijtoj: “Xiksentokakan xiktemokan achto itekiuajyo Dios uan imelaujkayo, uan nochi nejin okseki taman [kemej tein nankikuaskej, nantayiskej uan tein nanmotaliliskej] Dios namechmakas”. Sayoj ke okse tonal no kijtoj ke taixnamikilis ueliskia kichiuas maj ‘iikniuan’ kipanoskiaj mayan (Mat. 25:35, 37, 40). Ijkon kipanok tatitanil Pablo; kemansa amo kipiaya tein kimajseuaskia uan tein tayiskia (2 Cor. 11:27).

Jiova techiluia ke miak taman taixnamikilis tikpanoskej. Tein melauj, uelis kikauas maj titajyouikan keman techpolos teisa uan ijkon titapaleuiskej maj monexti ke amo melauak tein kijtoua Amokuali (Job 2:3-5). Kemej neskayot, maj inintech titanemilikan tokniuan akin nazis kintsakkej kampa kintajyouiltiayaj. Kemej amo kipiayaj tein kikuaskej, yejua nejon se taman tein tel amo kuali tein ika kiyejyekojkej kichiuaskej maj kikauakan Dios. Tokniuan akin amo keman kikaujkej Jiova kisentokakej kitakamatkej uan yejuatsin amo kinkauak. Semi melauak ke kikauak maj kipanouanij nejon tayejyekolis, ijkon kemej kikaua maj nochin tokniuan kipanokan tataman tayejyekolis. Sayoj ke, tikyekmatij ke yejuatsin kinpaleuia maj taxikokan nochin akin tajyouiaj porin kipaleuiaj itokay (1 Cor. 10:13). Maj tikelnamikikan tein kijtoua Filipenses 1:29: “Dios namechmaktilijtok ya nijin omen taman, ke namejuan xitakuautamatikan ya iuan Cristo. Uan no namejuan xitaxikojtiyakan ya tech in tajyouilis porin nantakuautamatinemij iuan Cristo”.

Jiova motenkauani ke yetos iniuan itekitikauan. Kemej neskayot, itech Isaías 54:17 techyekiluia: “Tein yeski tepos tein ika mitsixnamikiskej, amo uelis mitsixpolos”. Nejin uan oksekiok tein Dios motenkaua, kiyeknextia ke senolochmej kemej ixolal, amo kikauas maj ixpoliui. Sayoj ke, sejsemej itekitikauan uelis kipanoskej tayejyekolis oso hasta momikiliskej.