1. 1) ¿Toni tein Jiova motenkauak tikchiaj maj mochiua? 2) ¿Toni kijtosneki timochiaskej uan titakuaujtamatiskej iuan Jiova? (Xikonita nota).

 JIOVA techiluia ke nochin akin tiktasojtaj uelis tikchiaskej tein kuali. Yejuatsin kichiuas maj amo akin kokolispeuaok, maj amo akin tayokoyaok nion maj momikiliok (Apoc. 21:3, 4). Kinpaleuis akin yolkualmej akin iuan takuaujtamatij maj kichiuakan se xochital nikan taltikpak (Sal. 37:9-11). Kichiuas maj semi kualtsin timouikakan iuan okachi ke axkan. ¡Semi kualtsin tein tikchiaj! Sayoj ke, ¿keniuj tikmatij ke Jiova kichiuas tein motenkaua? Porin yejuatsin nochipa kichiua tein kijtoua. Miak taman kichiua maj timochiakan uan maj titakuaujtamatikan iuan Jiova (Sal. 27:14). * Tiknextiaj ke tikchiuaj nejin keman amo tiyolijsiuij uan tiyolpakij keman tikchiaj maj Dios kichiua tein motenkauak (Is. 55:10, 11).

2. ¿Toni kichiuakya Jiova?

² Jiova kinextianiya ke kichiua tein motenkaua. Maj tikitakan se taman. Itech amatajkuilol Apocalipsis, Jiova achtook kijtojka ke itech nejin tonalmej kinsentiliskia miakej akin seseko kayomej uan akin tajtouaj tataman  tajtolmej, para maj kisenueyichiuakan kemej yejuatsin kineki. Yejuan tein axkan tikinixmatij kemej “uel miak tagayot” (Apoc. 7:9, 10). Uan maski ompa pouij takamej, siuamej uan konemej akin tatamamej nochin kuali mouikaj (Sal. 133:1; Juan 10:16). Nochin kiuelitaj kinnojnotsaskej akin kinekij kinkakiskej uan kiniluiaj ke kichiaj okachi kuali nemiskej (Mat. 28:19, 20; Apoc. 14:6, 7; 22:17). Komo tejuatsin no tionpoui iniuan xa no semi tikonpatiuita tein tikchiaj.

3. ¿Toni kineki Satanás?

³ Satanás amo kineki maj tikchiakan tein kuali. Kineki maj tiknemilikan ke Jiova amo toka motekipachoua uan ke amo kichiuas tein motenkaua. Komo Satanás kichiua maj ijkon titanemilikan amo tiyolchikaujkejok yeski uan xa amo tiktekitiliskejok Jiova. Kemej tikitaskej, Satanás kinekia maj Job amo kichianiok tein kuali uan maj amo kitekitilianiok Jiova.

4. ¿Toni tikitaskej itech nejin tamachtilis? (Job 1:9-12).

⁴ Itech nejin tamachtilis tikitaskej keniuj Satanás kitemoj maj Job kikauani Jiova (xikonixtajtolti Job 1:9-12). No tikitaskej toni techmachtia tein kipanok Job uan keyej semi moneki maj tikelnamikikan ke Dios techtasojta uan ke kichiua tein motenkaua.

5, 6. ¿Keniuj ijsiujka mopatak inemilis Job?

⁵ Job kualtsin nemia porin kuali mouikaya iuan Jiova, ichankauan miakej katkaj uan yolpakiaj uan no semi tominpiaya (Job 1:1-5). Sayoj ke itech se tonal kipoloj nochi. Yekinika itapialuan (Job 1:13-17). Satepan, nochin ikoneuan akin semi kintasojtaya momikilijkej. Maj tiknemilikan tein kipanotoya Job. Tetatmej semi tajyouiaj keman momikilia se ininkonetsin, axkan maj tiknemilikan keniuj momachilijkej Job uan isiuatsin. Semi tajyouijkej uan kinyolkokoj keman kimatkej ke majtakti ininkoneuan momikilijkej. ¡Yejua ika Job hasta kitsayanak itaken uan moixpiloj hasta talpan uan ika kinextij ke semi motayokoltijtoya! (Job 1:18-20).

⁶ Satepan, Satanás kichiuak maj Job kokolispeua. Nejon semi kitajyouiltij uan kipinaujtij (Job 2:6-8; 7:5). Job semi kipoujkaitayaj uan sekin hasta yayaj kiitatij para maj kinyolmajxiti (Job 31:18). Sayoj ke ika tein kipanotoya, amo kinekiajok kiitaskej. Iikniuan, akin kuali iniuan mouikaya uan hasta itakeualuan kiixtopeuayaj (Job 19:13, 14, 16).

7. 1) ¿Keyej kinemilij Job ke Jiova kitajyouiltijtoya, sayoj ke toni amo kichiuak? 2) ¿Toni ueliskia kipanoskej tokniuan ijkon kemej Job? (No xikonita taixkopin).

⁷ Satanás kinekia maj Job kinemiliani ke tajyouijtoya porin Jiova kualantoya iuan. Yejua ika kichiuak maj chikauak ejeka para maj uetsi kali kampa tatakuajtoyaj majtakti ikoneuan (Job 1:18, 19). No kichiuak maj uetsi tit para maj mikikan itapialuan uan no itakeualuan tein kinyekpiayaj (Job 1:16). Kemej ejekat uan tit ualeujkej iluikak, Job kinemilij ke Jiova kiualtitanilijtoya uan kinemilij ke kichiujka teisa tein kikualantijka. Maski ijkon Job amo kinekik kiuijuikaltis Jiova, kielnamikik ke yejuatsin kimakatoya miak taman tein kuali, uan ke ijkon kemej kiselijka tein kuali no  monekia kiselis tein amo kuali. Yejua ika kijtoj: “Maj kisentoka moueyitali itokay Jiova” (Job 1:20, 21; 2:10). Maski Job amo kipiayaok tomin, momikilijkaj ikoneuan uan kokolispeujka amo kikauak Jiova. Sayoj ke Satanás amo ijkon mosenkauaskia.

8. ¿Toni okse taman Satanás kichiuilij Job?

⁸ Satanás no kichiuak okse taman. Kinkuik eyi takamej akin kijtouayaj ke kuali mouikayaj iuan Job uan kichiuak maj kiluianij miak taman tein kichiuaskia maj Job kinemili ke amo teyi chiujkej katka. Nejon takamej kiluijkej Job ke tajyouijtoya porin kichiujka miak taman tein amo kuali (Job 22:5-9). No kinekiaj maj kinemili ke maski kichiuaskia miak taman tein kuali Jiova amo kipatiuitaskia (Job 4:18; 22:2, 3; 25:4). Kinekiaj maj kinemili ke Jiova amo kitasojtaya, ke amo kiyekpiaya uan ke nenkaj kitekitiliaya. Ika tein kiluijkej, Job xa kinemilij ke tein kipanotoya amo keman moyektaliskia.

9. ¿Toni kipaleuij Job maj yolchikauak?

⁹ Maj tiknemilikan nejin. Job tokotsyetok itech koujnex uan semi tajyouijtok (Job 2:8). Akin iniuan mouika kiluiaj miak taman, kitemouaj maj amo kuali kiitakanok. Kemej Job kipanotok miak kuejmolmej semi amo kuali momachilia uan semi motayokoltia porin momikilijkej ikoneuan. Job yekinika amo teyi kijtoua (Job 2:13-3:1). Sayoj ke, komo nejon takamej akin kijtouaj ke mouikaj iuan, kinemiliaj ke kemej amo teyi kijtoua kikauati Jiova, semi mopolojtokej. Job moixajokui uan kiniluia: “¡Amo keman nikauas Dios hasta maj nimiki!” (Job 27:5). ¿Toni kipaleuij Job maj yolchikauak maski semi tajyouijtoya? Hasta keman semi amo kuali momachiliaya  kimatia ke Jiova kipaleuiskia uan no kimatia ke maski momikiliskia, yejuatsin kichiuaskia maj oksepa nemi (Job 14:13-15).

10. ¿Toni techmachtia tein kipanok Job?

¹⁰ Tein kipanok Job techmachtia ke Satanás amo uelis kichiuas maj tikauakan Jiova, uan ke yejuatsin kiita nochi tein tikpanouaj. Tein kipanok Job no techmachtia okseki taman. Maj tikitakan toni.

11. ¿Toni panos komo titakuaujtamatij iuan Jiova? (Santiago 4:7).

¹¹ Job kinextij ke komo titakuaujtamatij iuan Jiova uelis tikxikoskej tein yeski ouijkayot uan tikixnamikiskej Satanás. ¿Toni panos komo ijkon tikchiuaj? Biblia techyekiluia ke Satanás techcholuis (xikonixtajtolti Santiago 4:7).

12. ¿Keniuj kipaleuij Job kineltokas ke mikemej oksepa nemiskej?

¹² Moneki senkis tikneltokaskej ke mikemej oksepa nemiskej. Kemej tikitakej itech tamachtilis 26, Satanás kitemoua maj semi tikmouilikan timomikiliskej para maj tikauakan Jiova. Maj itech titanemilikan tein kipanok Job. Satanás kijtoj ke Job kichiuaskia tein yeski para amo momikilis uan hasta kikauaskia Jiova, sayoj ke semi mopolojtoya. Hasta keman kipanotoya tein semi amo kuali uan kinemiliaya ke ueliskia momikilis, amo kikauak Jiova. ¿Toni kipaleuij maj taxiko? Kimatia ke Jiova yolkuali uan takuaujtamatia ke yejuatsin kiyektaliskia tein kipanotoya. Job kimatia ke komo Jiova amo kipaleuiaya keman yoltoya, satepan ueliskia kichiuas maj oksepa nemi. Yejua senkis kineltokaya ke mikemej oksepa nemiskej. Komo tejuan no senkis tikneltokaj nejin, amo tikauaskej Jiova maski uelis timomikiliskej.

13. ¿Keyej moneki maj kuali tikitakan tein Satanás kichiuilij Job?

¹³ Moneki kuali tikitaskej tein Satanás kichiuilij Job, porin no yejua tein kichiua axkan. Maj tikitakan tein kijtouilij uan tein techijtouilia tejuan. Kijtoj: “Se taltikpaknenkej kitemakas nochi tein kipia para momakixtis” (Job 2:4, 5). Satanás kijtosnekik ke amo yekmelauj tiktasojtaj Jiova uan ke tikauaskej komo tikitaj ke uelis timomikiliskej. No kijtoua ke Jiova amo techtasojta uan ke amo kipatiuita nochi tein tikchiuaj. Kemej titakuaujtamatij iuan Jiova, Satanás amo techkajkayaua porin tikmatijya tein kichiua.

14. ¿Keniuj techpaleuia keman tikpanouaj se ouijkayot? Xikonijto se neskayot.

¹⁴ Keman tikpanouaj ouijkayomej techpaleuia maj tikmatikan toni moneki tikpataskej. Kemej neskayot, ouijkayomej tein Job kipanok kipaleuij maj kiitani ke monekia yeski okachi yolyemanik (Job 42:3). Tejuan no techpaleuis maj tikitakan ox moneki tikpataskej teisa. Yejua nejon tein kipanok Nikolái, * akin kitsakkej maski semi mokokouaya. Yejua kijtoua: “Keman tetsakuaj, kemej yeskia techiuiliaj se radiografía, porin tepaleuia maj se kimati toni moneki se kipatas”. Keman tikitajya ke teisa amo tikyekchiujtokej, ueli tikpataj.

15. ¿Akoni moneki tikakiskej, uan keyej?

¹⁵ Moneki tikakiskej Jiova uan amo akin techtauelitaj. Job kikakik Jiova keman kinojnotsak. Kemej kinekia maj  tanemili, yejuatsin xa kiluij se taman kemej nejin: “¿Tikitani ke semi nichikauak ika nochi tein nikchijchiuak? Nikita nochi tein tikpanotok. ¿Tiknemilia ke amo uelis nimitspaleuis?”. Job kinextij ke katka yolyemanik uan ke semi kitasojkamatia ke Jiova yolkuali, yejua ika kiluij: “Achto nikakia ke moka tajtouayaj, sayoj ke axkan nimitsita” (Job 42:5). Keman Job kijtoj nejin xa tokotsyetoyaok itech koujnex, kipiaya miak kokomej uan semi tayokoxtoya porin ikoneuan momikilijkaj. Keman kipanotoya nochi nejin, Jiova kimatiltij ke kitasojtaya uan ke kiyolpaktiaya tein kichiuaya (Job 42:7, 8).

16. Kemej kijtoua Isaías 49:15, 16, ¿toni moneki tikelnamikiskej keman tikpanoskej ouijkayomej?

¹⁶ Itech nejin tonalmej, sekin xa techuijuikaltiskej uan techitaskej ke amo teyi tichiuanimej. Xa kitemoskej maj amo kuali techitakanok tejuan uan inechikol Jiova, uan ‘techijtouiliske miak xolopijyot’ (Mat. 5:11). Tein kipanok Job techmachtia ke Jiova kimati ke amo tikauaskej maski tikpanoskej ouijkayomej. Jiova techtasojta uan amo keman kinelkauas akin iuan takuaujtamatij (xikonixtajtolti Isaías 49:15, 16). Maj amo tikakikan tein kijtouaj akin kitauelitaj Dios. Maj tikitakan tein kijtoua James, akin nemi Turquía. Yejua uan ichankauan kipanouanij uejueyi ouijkayomej. James kijtoua: “Tikitakej ke amo techpaleuiskia komo tikakiaj tein kinijtouiliayaj itekitikauan Dios. Yejua ika, okachi itech titanemilijkej tein tikseliskej  satepan uan tiktayekanaltijkej tiktekitiliskej Jiova, nejon techpaleuij maj tiksentokanij tiyolpakinij”. Maj tikchiuakan kemej Job uan maj tikakikan Jiova. Maj tiksentokakan tikchiakan tein kuali maski techijtouiliskej miak taman.

17. ¿Toni techmachtia tein kichiujkej itekitikauan Jiova akin ininka motajtoua itech Hebreos capítulo 11?

¹⁷ Amo sayoj Job kinextij ke katka yolchikauak keman kipanok ouijkayomej. Keman tatitanil Pablo kintajkuilouilij tokniuan hebreos, ininka tajtoj okseki itekitikauan Dios uan kijtoj ke katkaj “uel miakke taneltokani” (Heb. 12:1). Maski kipanokej uejueyi ouijkayomej, amo keman kikaujkej Jiova (Heb. 11:36-40). ¿Tapaleuij tein kichiujkej? Kemaj. Maski amo kiitakej maj mochiua nochi tein Jiova motenkaujka, kisentokakej iuan takuaujtamatkej. Kemej senkis kimatiaj ke kiyolpaktiayaj Jiova, kineltokayaj ke kiitaskiaj keman Jiova kichiuaskia tein motenkaujka (Heb. 11:4, 5). Keman itech titanemiliaj tein kichiujkej, techpaleuia maj nochipa titakuaujtamatikan iuan Jiova.

18. ¿Toni moneki tikchiuaskej maski satepan tikpanoskej ouijkayomej? (Hebreos 11:6).

¹⁸ Axkan okachi mochiua tein amo kuali (2 Tim. 3:13). Uan Satanás kisentoka kitemoua maj tikauakan Jiova. Maski satepan tikpanoskej ouijkayomej, maj tiksentokakan tiktekitilikan Jiova ika nochi toyolo, porin tikmatij ke titakuaujtamatij iuan se Dios akin nochipa yoltok (1 Tim. 4:10). Satepan Jiova kipaleuij Job, uan nejon kinextia ke yejuatsin “semi teyoliknelia uan teyoltasojta” (Sant. 5:11). Ijkon kemej Job, maj amo keman tikauakan Jiova uan maj titakuaujtamatikan ke yejuatsin kintatiochiuis akin kitemouaj kiueyichiuaskej (xikonixtajtolti Hebreos 11:6).