Tatitanil Pablo kimatia ke takajkayaualis tein Satanás kichiua maj moteixmatilti semi taijtakoua, sayoj ke okseki tokniuan itech nejon tonalmej amo kiitayaj ke tamouilil. Kemej neskayot, itech xolal Corinto seki tokniuan kinemiliayaj ke kemej chikauak kipiayaj inintakuaujtamatilis amo teyi kinijtakoskia (1 Cor. 10:12). Yejua ika, Pablo kinnejmachtij: “Amokuali kouat kikajkayauak in achto siuat in Eva ika tataman takajkayaualis. Uan axkan nejua nikyolmouilijtok ke namejuan nankitakauilijke ya in amokuali Satanás ma namechkajkayauas. Uan no nikyolmouilijtok ke namejuan nankinemilijtinemij ya de nanmosekokauaske de nantakuautamatinemiske iuan Cristo. Uan ne namotakuautamatilis yejua ne kualtsin chipaktsin” (2 Cor. 11:3).

Tein Pablo kijtoj techmachtia ke motelneki amo tiknemiliskej ke amo teyi techijtakos. Moneki tikajsikamatiskej ke takajkayaualis tein Satanás kichiua maj moteixmatilti semi tamouilil uan ke moneki timoyekpiaskej. Nejin techpaleuis maj totanemilil amo moijtako.

Seki taman tein kiteixmatiltiaj amo melauak porin ika kitemouaj kipataskej kemej tanemiliaj uan kemej monejnemiltiaj taltikpakneminij. Kitekitiltiaj takajkayaualis, kipataj tein melauak, kinekij maj tanemilikan kemej yejuan kinekij. Itech nejon motekitiltia “tein amo chipauak, teikamauiltilis uan tein teijtakoua” (Propaganda and Persuasion).

¿Keyej tamouilil? Porin tamati kemej gas tein tepajuia tein amo ueli se kiita nion se kijnekui.  Kemej yeskia kalaki totech keman timijyotiaj uan yolik kijtakojtiuj totanemilil. Vance Packard, se takat akin momachtia keniuj monejnemiltiaj taltikpakneminij, kijtoua ke takajkayaualis tein moteixmatiltia kipata kemej timonejnemiltiaj “okachi ke tein ueli tiknemiliaj”. Okse tamatkej kijtoua ke nejon kichiuani maj taltikpakneminij kichiuakan tein kintelijtakoua miakej uan tein amo taixejekol uan kinuikani maj kinolochmiktikan tel miakej taltikpakneminij, kichiua maj onka neteuilismej uan maj kintajyouiltikan akin taman kemej ixtamatij oso kipiaj okse taneltokalis (Easily Led—A History of Propaganda).

Komo taltikpakneminij ueli techkajkayauaj, Satanás okachi amo ouij kikisas techkajkayauas. Keman Dios kichijchiuak takat, Satanás peuak kiita keniuj monejnemiltiaj taltikpakneminij. Kemej yejua kiixyekana nochi tein mochiua itech taltikpak, uelis kitekitiltis tein yeski taman uan ika kimoyauas itakajkayaualis (1 Juan 5:19; Juan 8:44). “Kinixpojpoyokuiltijtok den nintamachilis” tel miakej taltikpakneminij, yejua ika Biblia kijtoua ke “kinkajkayautinemi nochi in taltikpakuani” (2 Cor. 4:4; Apoc. 12:9). ¿Toni techpaleuis maj amo techijtako itakajkayaualis?

Jesús tamachtij se taman tein amo ouij tein techpaleuis maj amo techijtako takajkayaualis tein moteixmatiltia. Kijtoj: “Nankajsikamatiyaske de ne Tajtoltsin ten yek melau. Uan ne yek melau Tajtoltsin, yejua ne namechtojtomatiu” (Juan 8:31, 32). Itech se neteuilis, se tateuijkej moneki kimatis akoni uelis kimatiltis tein melauak porin akin kinixnamikij kimoyauaskej takajkayaualis uan ika kitemoskej kintaniskej. ¿Kani uelis tikajsiskej tein melauak? Jiova kitematiltia itech iTajtol, Biblia. Ompa tikajsij nochi tein techpaleuis maj tikixtopeuakan takajkayaualis tein Satanás kichiua maj moteixmatilti (2 Tim. 3:16, 17).

Sayoj ke Satanás kimati nejin. Yejua ika kitekitiltia tein onkak nikan taltikpak uan ika kitemoua kintapololtis taltikpakneminij uan kichiuas maj amo kiixtajtoltikan nion maj momachtikan Biblia. ¡Maj amo mitsonkajkayaua! (Efes. 6:11.) Moneki timochikauaskej kuali tikajsikamatiskej tein melauak (Efes. 3:18). Tamachtijkej Noam Chomsky kijtoj: “Amo akin kikalakis tein melauak itech totsontekon. Moneki tejuan tikajsiskej”. Yejua ika tejuatsin xikonajsi tein melauak keman mojmostaj tionmomachtis Biblia ika nejmachkayot (Hech. 17:11).

 Xikonelnamiki ke Satanás amo kineki maj titanemilikan ika nejmachkayot uan maj tikajsikamatikan teisa. ¿Keyej? Porin se amatajkuilol kijtoua ke tein moteixmatiltia okachi kintanejnektia taltikpakneminij keman amo tanemiliaj ika nejmachkayot (Media and Society in the Twentieth Century). Yejua ika amo niman xikonneltoka nochi tein mitsoniluiaj (Prov. 14:15). Dios mitsontayokolij motanemilil uan motaixejekolis, yejua ika xikontekitilti uan ijkon tikonchikauas motakuaujtamatilis (Prov. 2:10-15; Rom. 12:1, 2).

Tateuianij akin kikakij inintakajkayaualis taixnamikinij moujkakalakij uan amo kinekijok tateuiskej. Nejin no uelis kichiuas maj moteuikan sayoj yejuan oso maj moxelokan. Se tateuijkej kayot Alemania kijtoj ke takajkayaualis tein moteixmatiltij kichiuak maj ialtepeuj tapolouani itech Yekinika Neteuilis tein Mochiuak itech Nochi Taltikpak. Kijtoj ke nejon takajkayaualis kemej yeskia kinkochtij itateuijkauan. Satanás no kitekitiltia seki taman kemej nejon uan ika kitemoua kinxelos tokniuan itech nechikol. Kemej neskayot, kitemoua maj tokniuan mokualantikan oso maj kikauakan inechikol Jiova akin kinemiliaj ke kinchiuilijkej teisa tein amo kuali.

¡Amo xionmokaua maj mitsonkajkayaua! Xikonchiua tein iTajtol Dios tayolmajxitia. Biblia techyolchikaua maj tiksentokakan timotapojpoluikan se uan okse uan maj niman tikyektalikan kuejmolmej tein tikpiaskej iniuan tokniuan. Nejin techpaleuis maj amo timoxelokan (Mat. 5:23, 24; Col. 3:13, 14). No technejmachtia ke semi tamouilil komo timouejkatiliaj itech nechikol (Prov. 18:1). Xikonita ox tikonchiujtok tein mitsonpaleuis xikonixtopeua itakajkayaualis Satanás. Kemej neskayot, xikonnemili toni tikonchiuak keman yankuixtok se tokniuj teisa mitsonchiuilij. Xionmotajtani: “¿Niknextij tanemilil tein kiyolpaktia Dios oso tein kiyolpaktia Satanás?” (Gál. 5:16-26; Efes. 2:2, 3).

Komo se tateuijkej peua amo takuaujtamatiok itech itaixyekankauj, amo kuali tateuis. Yejua ika, taixnamikinij kimoyauaj takajkayaualis uan ika kitemouaj kichiuaskej maj tateuianij amo takuaujtamatikanok itech inintaixyekankauan. Kiniluiaj: “Amo uelis inintech nantakuaujtamatiskej” oso “¡Kichiuatij maj namechmiktikan!”. Uan  komo taixyekananij mopolouaj, taixnamikinij ika nejon nepolol kichiuaj maj tateuianij kineltokakan ke melauak tein kiniluiaj. Satanás no ijkon kichiua. Nochipa kitemoua kichiuas maj amo titakuaujtamatikanok inintech takamej akin Jiova kinixtalijtok maj taixyekanakan itech ixolal.

¿Keniuj uelis tionmoyekpias? Xikonixtali tikonsentokas itech inechikol Jiova uan tikonpaleuis akin yejuatsin kinixtalijtok maj taixyekanakan, maski tajtakouanij (1 Tes. 5:12, 13). Amo xikonkaua maj mitsonomeyolotikan akin kikaujkej Jiova uan kiselijkej tamachtilismej tein amo melaujkej oso okseki taixnamikinij, maski moitas ke melauak tein kijtouaj (2 Tes. 2:2; Tito 1:10). Xikonchiua tein kiyolmajxitijkej telpoch Timoteo: amo xikonkaua tein melauak tein mitsonmachtijkej uan amo xikonelkaua kani tionmomachtij (2 Tim. 3:14, 15). Xiontanemili itech nochi tein kinextia ke uelis tiontakuaujtamatis itech takeual takuaujtamach uan tamatkej, akin ajsitokya cien xiujmej Jiova kiixtalij maj techmachti tein melauak (Mat. 24:45-47; Heb. 13:7, 17).

Xikonelnamiki ke Satanás no kitemoua kijtakos totanemilil ika okseki taman tein okachi moita. Kemansa kitekitiltia moujkayot, se taman tein uejkaujya motekitiltia (Easily Led—A History of Propaganda). Kemej neskayot, Philip Taylor, se tamachtijkej kayot Gran Bretaña, kijtoj ke asirios kinmojmoujtijkej uan kinkajkayaujkej akin kinixnamikiaj porin ika kitemouayaj maj motemaktianij. No ijkon, Satanás kichiuas xikonmouili taltikpakneminij, tajyouilis, mikilis oso tein yeski taman uan ika kitemos kichiuas amo xikontekitiliok Jiova (Is. 8:12; Jer. 42:11; Heb. 2:15).

¿Tikonkauas maj Satanás ijkon kichiua mouan? Jesús kijtoj: “Amo xikinyolmouilikan nekes ten uelis kinmiktiske namonakayo san. Porin kuak mikis ya namonakayo, ijkuakon amo teyi uelis ok namechchiuiliske” (Luc. 12:4). Senkis xiontakuaujtamati ke Jiova mitsonyekpias, ijkon kemej motenkaujtok, ke mitsonmakas “chikaukauelilis [tein] ualeutok imako” uan mitsonpaleuis maj amo mitsonijtako itaixnamikilis Satanás (2 Cor. 4:7-9; 1 Ped. 3:14).

Melauak ke kemansa uelis tionmouis oso tikonmachilis ke amo tikonpia chikaualis. Sayoj ke xikonelnamiki tein Jiova kiluij Josué: “Ximoyolchikaua uan xichikauak. Amo ximoujkakalaki nion ximomoujti, porin Jiova moDios yetok mouan kampa yeski tiyas” (Jos. 1:9). Keman tionmotekipachos, niman xikontapoui Jiova nochi tein mitsontekipachoua. Uelis tikonyekmatis ke “yolseuilis” tein Dios kitemaka kiyekpias moyolo uan motanemilil uan ijkon uelis tikonixtopeuas takajkayaualis tein Satanás kichiua maj moteixmatilti (Filip. 4:6, 7, 13).

¿Tikonelnamiki tein kijtoj rabsaqué, akin tekiuaj ompa Asiria kititanik maj kinmojmoujtiti israelitas? Yejua kinekia maj kineltokakan ke nion Jiova ueliskia kinpaleuis maj asirios amo kinixpolouanij. No kijtoj ke Jiova kiniluij asirios maj kiixpolokan Jerusalén. Sayoj ke Jiova kiyolchikauak akin tekiuajtia Judá ika nejin tajtolmej: “Amo ximoui ika tajtolmej tein tikakik, tajtolmej tein itekitikauan akin tekiuajti Asiria ika nechuijuikaltijkej” (2 Rey. 18:22-25; 19:6). Satepan kititanik se ángel akin kinmiktij 185,000 asirios itech sayoj se youak (2 Rey. 19:35).

¿Tikonitani se película kampa semej akin ompa ixnesi amo kiita ke kikajkayaujtokej? ¿Tikonnekia tikoniluis: “¡Amo xikneltoka, mitskajkayaujtokej!”? No ijkon, xikonnemili ke ángeles techitstokej uan techiluiaj: “¡Maj amo mitskajkayaua Satanás!”.

Amo xikonneltoka takajkayaualis tein Satanás kiteixmatiltia (Prov. 26:24, 25). Xikonkaki Jiova uan nochipa iuan xiontakuaujtamati (Prov. 3:5-7). Yejuatsin mitsontasojta uan mitsonyolmajxitia: “Xitamatkej, nokonetsin, uan xinechyolpakti” (Prov. 27:11). Komo ijkon tikonchiua, tikonyekpias motanemilil uan tiontatanis.