Tein tajtanij akin taixtajtoltiaj
Itech Ezequiel capítulo 37 ika motajtoua ome koujmej tein mosentiliaj uan mochiuaj sayoj se kouit. ¿Toni kijtosneki?
Ika tein kijkuiloj Ezequiel, Jiova kijtoj ke itekitikauan mokepaskiaj itech Tal tein kinmakaka uan oksepa mochiuaskiaj sayoj se xolal. No kijtoj ke itech itamian tonalmej itekitikauan Dios yeskiaj sayoj se xolal.
Jiova kiluij tanauatijkej Ezequiel maj kikuini ome koujmej uan maj kijkuilouani seki tajtolmej ompa. Itech se monekia kijkuilos: “Iaxka Judá uan xolal Israel akin iuan yetokej”. Uan itech okse monekia kijkuilos: “Iaxka José, ikouj Efraín, uan nochi kali Israel akin iuan yetokej”. Keman ika tajtoj nejin ome koujmej, Dios kiluij Ezequiel: “Maj mochiuakan sayoj se momako” (Ezeq. 37:15-17).
¿Toni kiixnextia “Efraín” itech nejin tajkuilol? Kalyetouanij Efraín yejuan akin kipiayaj okachi chikaualis itech majtakti uejueyi kalyetouanij tein pouiaj itech tekiuajyot Israel. Tein melauj, yekinika tekiuaj itech nejon tekiuajyot monotsaya Jeroboán uan pouia iniuan ichankauan Efraín (Deut. 33:13, 17; 1 Rey. 11:26). Nejin kalyetouanij ualeuayaj itech se ikonetsin José akin monotsaya Efraín (Núm. 1:32, 33). Yejua ika taixejekol maj “ikouj Efraín” kinixnextiani majtakti uejueyi kalyetouanij tein pouiaj itech tekiuajyot Israel. Miak xiujmej achto ke Ezequiel kijkuiloskia nejin tein panoskia, asirios moaxkatilijkej nejin tekiuajyot uan kinuikakej taltikpakneminij. Nejin panok itech xiuit 740 achto itech totonaluan (2 Rey. 17:6). Xiujmej satepan, babilonios kintankej asirios. Yejua ika keman Ezequiel ika tajtoj ome koujmej, tel miakej israelitas moyaujtoyaj itech altepemej kampa taixyekanayaj babilonios.
Itech xiuit 607 achto itech totonaluan, babilonios moaxkatilijkej tekiuajyot Judá, kampa pouiaj ome uejueyi kalyetouanij. Uan no, kinuikakej taltikpakneminij ompa Babilonia. Xa no kinuikakej akin mokauayajok itech tekiuajyot Israel. Tekiuanij akin kinixyekanayaj ome uejueyi kalyetouanij pouiaj iniuan ichankauan Judá. Uan tiopixkamej no nemiaj Judá, porin tekitiaj itech templo ompa Jerusalén (2 Crón. 11:13, 14; 34:30). Yejua ika taixejekol maj kouit tein katka “iaxka Judá” kinixnextiani ome uejueyi kalyetouanij tein pouiaj itech tekiuajyot Judá.
¿Kemanian mosentilijkej ome koujmej? Itech xiuit 537 achto itech totonaluan. Itech nejon xiuit, sekin akin pouiaj itech tekiuajyot Judá uan tekiuajyot Israel mokepkej Jerusalén kiyekchijchiuatoj templo. Ijkuak, israelitas mosentilijkej uan oksepa peuak kisenueyichiuaj Jiova (Ezeq. 37:21, 22). Tanauatianij Isaías uan Jeremías no kijkuilojkej ke panoskia nejin (Is. 11:12, 13; Jer. 31:1, 6, 31).
¿Toni kijtoj Ezequiel ke panoskia ika taneltokalis tein melauak? Ke Jiova kichiuaskia maj nochin itekitikauan mochiuakan “sayoj se” (Ezeq. 37:18, 19). Itech totonaluan, nejin peuak mochiua itech xiuit 1919. Achto ke ajsiskia nejon xiuit, Satanás kitemojka senkis kinxelos itekitikauan Dios. Sayoj ke itech xiuit 1919, yolik peuak oksepa sentekitij.
Itech nejon tonalmej, okachi miakej itekitikauan Dios kichiayaj yeskij tekiuanij uan tiopixkamej iuan Jesús ompa iluikak (Apoc. 20:6). Yejuan katkaj kemej kouit tein iaxka Judá. Sayoj ke semi amo miakej kichiayaj nemiskej nochipaya nikan taltikpak. Ijkon kemej panotiyajkej tonalmej, yejuan peuak momiakiliaj (Zac. 8:23). Yejuan katkaj kemej kouit tein iaxka José.
Axkan, nochi ome oloch tokniuan kisentekitiliaj Jiova uan kipiaj sayoj se tekiuaj, Jesucristo. Itech tein Ezequiel kijtoj ke panoskia, nejin tekiuaj kitokaytiaj “notekitikauj David” (Ezeq. 37:24, 25). Keman ininka tajtoj itatojtokakauan, Jesús kitajtanij iTajtsin: “Ma yejuan ma yek ajsikamajsitinemikan se uan okse [...], ijkon keme Tejuatsin timoajsitinemi nouan, uan ijkon keme Nejuatsin no nimoajsitinemi mouantsin” (Juan 17:20, 21). * Jesús no kijtoj ke tokniuan taixpejpenalmej uan ‘okseki ichkamej’ mochiuaskiaj “sayo se sen oloch yetolis”. Uan nochin kitojtokaskiaj “sayo se tapixke” (Juan 10:16). Ijkon kemej kijtoj Jesús, nochin itekitikauan Dios axkan kisentekitiliaj, yeski kichiaskej nemiskej nochipaya ompa iluikak oso nikan taltikpak.
^ párr. 10 Keman Jesús ika tajtoj tein panoskia itech itamian tonalmej, kintapouij imomachtijkauan miak neskayomej. Yekinika ika tajtoj “takeual ten yolkuali uan ten kuatamatke”, seki tokniuan taixpejpenalmej akin kiixyekanaskiaj ixolal Dios (Mat. 24:45-47). Ompa kijtoj seki neskayomej tein mouika iniuan nochin tokniuan taixpejpenalmej (Mat. 25:1-30). Uan satepan, ininka tajtoj akin kinpaleuiskiaj iikniuan Cristo uan nemiskiaj nochipaya nikan taltikpak (Mat. 25:31-46). No ijkon, keman tein kijtojka Ezequiel peuak mochiua itech totonaluan, yekinika mochiuak iniuan akin kichiaj nemiskej iluikak. Uan maski majtakti kalyetouanij miakpa amo kinixnextiaj akin nemiskej nochipaya nikan taltikpak, kualtsin senyetolis tein ika tajtoua Ezequiel techelnamiktia kualtsin senyetolis tein kipiaj akin nemiskej nikan taltikpak uan taixpejpenalmej.
