NOCHIN taltikpakneminij kinekij yolpakiskej. Sayoj ke nejin itamian tonalmej semi ouijkej (2 Tim. 3:1). Onkak miak taman tein kichiua maj taltikpakneminij amo yolpakikan, kemej ijkuak kinchiuiliaj tein amo kuali, mokokouaj, kipolouaj inintekiuj oso momikilia aksa akin kitasojtayaj. Hasta itekitikauan Dios uelis yolkuetauiskej uan yolik kipolojtiyaskej yolpakilis. Komo techpanotok nejon, ¿keniuj uelis oksepa tiyolpakiskej?

Tiknankiliskej nejin netajtanil komo yekinika tikajsikamatij toni yolpakilis uan keniuj sekin kisentokanij yolpakinij maski kipanouaj ouijkayomej. Satepan tikitaskej toni techpaleuis maj tiksentokakan tiyolpakikan uan hasta maj okachi tiyolpakikan.

Se yolpaktos uan se uetskatos semi taman. Kemej neskayot, akin tauana xa tel uetska. Sayoj ke, keman ixpetani, amo kisentoka uetska uan kielnamiki ke kipiaok miak kuejmolmej. Iyolpakilis amo uejkauak. Amo katka yekmelauj yolpakilis (Prov. 14:13).

Yolpakilis semi taman. Se kimachilia keman se kiselia oso se kichia teisa tein kuali. Kijtosneki se yolpakis maski se kipanotos tein kuali oso tein amo kuali (1 Tes. 1:6). Tein melauj, aksa uelis amo kuali momachilis uan maski ijkon yolpakis. Kemej neskayot, tatitanilmej kinuijuitekkej, sayoj ke keman kinkaujkej maj yakan “moyolpaktijtiyajke, porin Totajtsin kinkauak ke ma ijkon kijyouikan uan ma kinpinautikan porin yejuan ay tanojnotstinemij ika ne tokaytsin de Jesús” (Hech. 5:41). Yejuan amo yolpakkej porin kinuijuitekkej, ta porin kitakamattoyaj Dios.

Amo akin yoli ika yolpakilis nion sayoj ijkon nesi. ¿Keyej amo? Porin yekmelauj yolpakilis poui itech itakilo iyektikatsin espíritu Dios. Nejin espíritu techpaleuia maj tikpiakan “yankuik talnamikilis”, kampa no poui yolpakilis (Efes. 4:24; Gál. 5:22). Uan keman tikpiaj yolpakilis, okachi amo ouij techkisa tikxikoskej ouijkayomej.

Keman Jiova kichijchiuak taltikpak, kinekia maj pano tein kuali, amo tein amo kuali tein tikitaj axkan. Maski taltikpakneminij kichiuaj tein amo kuali, yejuatsin kisentoka yolpaki. ITajtol kijtoua: “Chikaualis uan yolpakilis moajsij kampa nemi” (1 Crón. 16:27). Uan no, yejuatsin kiyolpaktia kiitas tein kuali tein kichiuaj itekitikauan (Prov. 27:11).

¿Keniuj uelis tikchiuaskej kemej Jiova? Maj amo timoteltekipachokan keman amo mochiua tein tikchiayaj. Maj amo tikpolokan toyolpakilis, ta maj itech titanemilikan tein kuali tein tikpiaj axkan uan maj amo tiyolijsiuikan ta maj tikchiakan maj nochi moyektali. *

 Itech Biblia, tikajsij ininneskayo miakej itekitikauan Dios akin kisentokakej yolpakkej maski kipanokej ouijkayomej. Kemej neskayot, Abrahán kisentokak yolpakik maski ueliskia kipolos inemilis uan keman oksekin kichiujkej maj kipia kuejmolmej (Gén. 12:10-20; 14:8-16; 16:4, 5; 20:1-18; 21:8, 9). ¿Keyej kisentokak yolpakik? Porin nochipa kielnamikik ke ueliskia nemis itech yankuik taltikpak keman taixyekantos Mesías (Gén. 22:15-18; Heb. 11:10, TNM). Jesús kijtoj: “Namouejkautat Abraham, yejua ne moyolpaktiaya porin kimatiaya ke kitas ne tonal kuak Nejuatsin niualas” (Juan 8:56). Tikchiuaskej kemej Abrahán komo titanemiliaj ika yolpakilis itech nochi tein kuali tein tikpiaskej satepan (Rom. 8:21).

Pablo uan Silas no kipiayaj chikauak inintakuaujtamatilis uan kisentokakej yolpakkej maski kipanokej uejueyi ouijkayomej. Se tonal, “kintamikuapitsakuijke” uan kintsakkej. Biblia kijtoua ke “kuak tajkoyoual ya, ijkuakon Pablo uan Silas motatatautilijtoyaj uan kicantarouiliayaj Dios” (Hech. 16:23-25). Yejuan taxikojkej porin kisentokakej tanemilijkej itech tein Dios motenkaua kichiuas satepan. Uan kimatiskej ke tajyouijtoyaj porin katkaj itatojtokakauan Cristo kichiuak maj yolpakinij. Komo tiknekij tikchiuaskej kemej yejuan, nochipa moneki tikelnamikiskej tein kuali tein tikselianij porin tiktekitiliaj Dios ika takuaujtamatilis (Filip. 1:12-14).

Axkan no moajsi ininneskayo tokniuan akin kisentokanij yolpakinij maski kipanouanij ouijkayomej. Kemej neskayot, itech metsti noviembre xiuit 2013, chikaujkakiouit tein kitokaytijkej Haiyan kiuejueloj ininchan panoua mil tokniuan kalyetouanij ompa Filipinas. Yejua nejin tein kipanok se tokniuj akin motokaytia George, itech xolal Tacloban. Yejua kijtoj: “Maski miak taman panok, tokniuan yolpakij. Amo nikajsi tajtolmej tein ika nikmelauas yolpakilis tein tikmachiliaj”. Komo titanemiliaj itech nochi tein Jiova toka kichiuani uan timotasojkamatij, tiksentokaskej tiyolpakiskej maski tikpanoskej uejueyi ouijkayomej. ¿Toni no techmakani Jiova tein techpaleuia maj tiyolpakikan?

Okachi tiyolpakij porin kuali timouikaj iuan Jiova. Tikixmatij akin okachi Ueyichiujkej. Yejuatsin toTajtsin, toDios uan toTasojikniuj (Sal. 71:17, 18).

No tiyolpakij porin tiyoltokej uan ueli timoyolpaktiaj ika nochi tein onkak (Ecl. 3:12, 13). Uan no, kemej Jiova kichiuak maj iuan timotokikan, tikmatij katiyejua itanejnekilis uan toni kineki maj tikchiuakan (Col. 1:9, 10). Sayoj ke, miakej amo kiajsikamatij keyej tinemij. Pablo kinextij nejin keman kijkuiloj: “Totajtsin Dios kiyejyektalij ya se tetayokolil para nochi nekes ten kitasojtaj Dios. Uan nijin tetayokolil de miak tataman de ayamo aken kitaj, uan nion keman ya kitekakilij, uan nion ya keman okse kiyolnemiliayaj de kiseliti. Uan yejua nijin tetayokolilisme, Totajtsin Dios techajsikamatiltia ika in chikaualis den [y]ektikatsin [e]spíritu” (1 Cor. 2:9, 10). Tikajsikamatiskej katiyejua itanejnekilis Jiova uan toni kiixtalijtok kichiuas techualkuilia yolpakilis.

Jiova no toka kichiuani okseki taman. Yejuatsin kitemakak tein techpaleuis maj ueli techtapojpolui (1 Juan 2:12). Kichiuak maj ueli tikchiakan tinemiskej itech se yankuik taltikpak, tein amo uejkaua kiualkuis (Rom. 12:12). Uan axkan, kichiua maj tikpiakan miakej totasojikniuan akin ueli iniuan tikueyichiuaj (Sal. 133:1). Uan no, kiyekpia ixolal maj Satanás uan iamokuali ejekauan amo kijtakokan (Sal. 91:11). Komo titanemiliaj itech nochi nejin  itatiochiualisuan Dios, okachi tiyolpakiskej (Filip. 4:4).

¿Uelis okachi tiyolpakiskej? Jesús kijtoj: “Nejuatsin namechnojnotsa para ximoyolpaktikan ika ne pakilis ten namechmaka uan ijkon ma yek majsitiu noyolpakilis” (Juan 15:11). Nejin kinextia ke nochipa uelis okachi tiyolpakiskej. Yolpakilis tamati kemej tit. Komo tiknekij maj okachi taxota, moneki tiktaliskej okachi kouit. No ijkon, komo tiknekij okachi tiyolpakiskej, moneki tiksentokaskej tiktajtaniskej Dios iyektikatsin espíritu. No moneki titanemiliskej itech Biblia, tein moijkuiloj ika inepaleuil yektikatsin espíritu (Sal. 1:1, 2; Luc. 11:13).

No okachi tiyolpakiskej komo tiktayekanaltiaj tikchiuaskej tein Jiova kiyolpaktia (Sal. 35:27; 112:1). ¿Keyej? Porin yejuatsin techchijchiuak maj tikchiuakan itanejnekilis. Biblia kijtoua: “Xikmoujkatoka Dios akin melauak uan xiktakamati itanauatiluan, porin yejua nejin nochi tein moneki kichiuas taltikpaknenkej” (Ecl. 12:13). Yejua ika, tiyolpakij keman tiktekitiliaj Jiova. *

Ijkon kemej okachi tiyolpakiskej, no tikpanoskej okseki taman tein kuali. Kemej neskayot, keman tiktekitiliaj Jiova ika yolpakilis maski tikpiaj kuejmolmej, tikyolpaktiaj (Deut. 16:15; 1 Tes. 5:16-18). Yekmelauj yolpakilis kichiua maj amo tiktemokan timotomintiskej uan techolinia maj tikauakan seki taman uan ijkon uelis tiktayekanaltiskej iTekiuajyo Dios (Mat. 13:44). Tein kuali tein kiualkui nejin kichiuas maj okachi tiyolpakikan, maj okachi kuali timomachilikan uan maj tikchiuakan maj oksekin okachi yolpakikan (Hech. 20:35; Filip. 1:3-5).

Uan no, komo okachi tiyolpakij, xa techpaleuis maj amo tikokolispeuakan. Biblia kijtoua: “Se yolo tein paki se kuali pajti” (Prov. 17:22). Se tamatkej akin momachtij tapajtilis itech Universidad de Nebraska (Estados Unidos) kijtoj se taman tein mouika ika tein kijtoua Biblia: “Komo axkan tejuatsin tionyolpaki uan kuali tionmomachilia, xa satepan amo semi tionkokolispeuas”.

Kemej tikitakejya, maski semi ouijkej nejin tonalmej, uelis yekmelauj tiyolpakiskej. Yejua ika moneki tiktajtaniskej Dios iyektikatsin espíritu, timomachtiskej Biblia uan itech titanemiliskej. Uan no, komo tiknekij okachi tiyolpakiskej, moneki titanemiliskej itech tatiochiualismej tein tikpiaj, titakuaujtamatiskej kemej okseki itekitikauan Jiova uan timochikauaskej tikchiuaskej itanejnekilis. Ijkon uelis tikitaskej ke melauak tein kijtoua Salmo 64:10: “Akin yolmelauak moyolpaktis itech Jiova uan iuan momatampauis”.