Miakej kinemiliaj ke akin kuali momachtijkej uan kipiaj miak tomin kinpaleuis maj kuali nemikan satepan. Kinemiliaj ke akin youij universidad, okachi kinpaleuiskej ininchankauan, kampa kayomej uan kampa tekitij. Oso no kijtouaj ke komo kuali timomachtiaj uelis tikajsiskej se tekit kampa kuali tetaxtauiaj, uan ijkon kemej okachi tiktaniskej tomin okachi tiyolpakiskej.

Zhang Chen se takat akin nemi China kijtoua: “Niknemiliaya ke komo amo niaya universidad amo keman nikpiaskia tomin, uan komo kuali nechtaxtauiskiaj notekipan kuali ninemiskia uan niyolpakiskia”.

Uan miakej para kuali nemiskej, kinekij yaskej itech se universidad tein semi moixmati maski yeski itech okse altepet. Miakej ijkon kichiuayaj hasta ke ueyi kokolis COVID-19, kichiuak maj ouij se youi okseko. Organización para la Cooperación uan Desarrollo Económicos kijtoua tein mochiuak itech xiuit 2012: “Panoua tajko akin momachtitoj itech okse altepet kayomej Asia”.

Miakej tetatmej semi mochikauaj para maj ininkoneuan momachtikan universidad itech okse altepet. Qixiang se takat akin nemi Taiwán, kielnamiki: “Notatuan amo kipiayaj miak tomin. Maski ijkon techtitankej tinauin maj timomachtitij Estados Unidos”. Para kiixtauaskej nejon nemachtil, ichankauan monekik motauikaltiskej ijkon kemej kichiuaj miakej.

Tein melauj nemachtil uelis techpaleuis itech seki taman, sayoj ke miakej akin momachtiaj kiitanij ke amo panoua tein kichiayaj. Kemansa, keman miak xiujmej kikauaj teisa uan motauikaltiaj, miakej amo ueli kiajsij tekit tein kinekij. Tein kijkuiloj Rachel Mui para Business Times ompa Singapur kijtoua: “Axkan okachi miakej akin momachtijkej universidad amo kipiaj tekit”. Jianjie akin kiselij se kuali nemachtil uan nemi Taiwán, kijtoua: “Miakej kipiaj okse tekit tein amo ika momachtijkej”.

Sekin kiajsij se tekit tein ika momachtijkej, sayoj ke amo nemij kemej kinekiaj. Niran se takat akin kayot Tailandia, uan momachtij universidad ompa Reino Unido. Keman mokepak ialtepeuj, ika tein momachtij kiajsik se tekit. Yejua kijtoua: “Ijkon kemej niknekia, ika nemachtil tein nikselij nikajsik se tekit kampa kuali nechtaxtauiayaj. Sayoj ke, para niktanis miak tomin monekia semi nimochikauas uan semi nitekitis. Ika tamik, kampa nitekitia, miakej kipolojkej inintekiuj, uan nejua no. Nikitak ke nochin uelis niman tikpoloskej totekiuj”.

Akin kipiaj miak tomin oso kijtouaj ke kuali nemij porin kipiaj nochi, no kipiaj kuejmolmej iniuan ininchankauan uan kokolispeuaj oso semi kintekipachoua inintomin. Katsutoshi, se takat kayot Japón, kijtoua: “Maski nikpiaya miak tomin, amo niyolpakia porin sekin motataniaj nouan, nechnexikoluiayaj uan kichiuayaj maj amo niyolpaki”. Lam, se siuatsin akin kayot Vietnam, kijtoua: “Nikitani ke miakej mochikauaj kipiaskej se kuali tekit uan miak tomin. Sayoj ke panoua tein amo kichiaj porin semi motekipachouaj uan tayokoyaj, kinkui okseki kokolismej uan amo kuali momachiliaj”.

Miakej no kinemiliaj kemej Franklin, ke amo sayoj moneki se kipias kuali nemachtil uan miak tomin. Sekin amo kitemouaj kipiaskej miak taman, ta kitemouaj okachi kuali nemiskej keman mochikauaj yeskij yolkualmej uan kinpaleuiskej oksekin. ¿Tapaleuis nejin maj okachi kuali tinemikan? Tikmatiskej itech okse tamachtilis.