• Dios kiixpejpenaskia nejon tekiuaj. Salmo 2:6, 8 kijtoua: “Nejua niktaliani noTekiuaj [...], uan nimitstayokolis altepemej uan nimitsaxkatilis nochi taltikpak”.

• Kiseliskia itaixyekanalis tekiuaj David. Isaías 9:6, 7 kijtoua: “Se konet yolik, se konet techmakakej [...]. Kipatauas itaixyekanalis uan yekyetolis amo kipias itamilis itech itekiuajyo David uan ijkon itaixyekanalis amo uejueliuis”.

• Yoliskia ompa Belén. Mateo 2:4, 5 kijtoua: “Herodes kintajtanilij ijkuin: ‘¿Xe ipa nankimatokke ya kan yolis in okichpil ten monotsa Cristo Temakixtijke?’. Uan yejuan kinankilijke ijkuin: ‘Tech ne pueblo de Belén ten itatilanal Judea, ompa yolis. Porin in tanauatijke de Dios kijkuilojka ya’”.

• Kiixtopeuaskiaj uan kimiktiskiaj. Isaías 53:3, 5 kijtoua: “Tiktauelitakej uan tikitakej ke amo teyi chiujkej [...], kikoyonijkej ika tonepololuan. Kitajyouiltijkej ika tonepololuan”.

• Oksepa nemiskia uan Dios kiueyitaliskia. Hechos 2:31, 33 kijtoua: “Jesús amo mokauaskia kampa yetokke in animajme [oso mikemej], uan amo no ninakayo palaniskia. [...] Uan ijkon Totajtsin Dios kiajokuik Jesús uan kitalij iyekmakopaka kampa iuelilispan”.

Nejin tein tikitakej sayoj mochiuak itech Jesucristo. Uan no, se ángel kiluij inan Jesús akin motokaytiaya María: “Totajtsin Dios [...] kichiualtis ke in Jesús Temakixtijke ma kipia uelilis de rey, ijkon keme in tayekankatat David [...], Yejuatsin ya ne kinyekantinemis in pueblojuani [...] sen nachipa” (Lucas 1:31-33).

Jesús amo taixyekanak keman moajsia nikan taltikpak. Sayoj ke, axkan moajsi ompa iluikak uan satepan taixyekanas nikan taltikpak porin yejua tekiuaj itech taixyekanalis tein Dios kiixtalij. ¿Keyej kuali techixyekanas? Maj tikitakan tein kichiuak keman moajsia nikan taltikpak.

•   Jesús kinpaleuij oksekin. Yejua kinpaleuij takamej, siuamej, telpochmej, akin xiuejkejya, akin okseko kayomej uan amo kiitaya ox kipiayaj tomin oso amo (Mateo 9:36; Marcos 10:16). Se tonal, se takat akin kipiaya lepra kiluij: “Komo tikonekiskia, tionuelis tinechonchipauas de nijin pitsotik kokolis”. Jesús kiiknelij uan kipajtij (Marcos 1:40-42).

• Jesús techmachtij keniuj tikyolpaktiskej Dios. Yejua kijtoj: “Amo aken uelis kintekitilis [...] Totajtsin Dios uan in ricojyot”. No kijtoj ke moneki tikinchiuiliskej oksekin kemej tejuan tikuelitaskiaj maj techchiuilikan. Techmachtij ke Dios amo sayoj kiita tein tikchiuaj, ta no tein tiknemiliaj uan tein tikmachiliaj. Yejua ika, tikyolpaktiskej Dios komo tiktsakuiliaj tein tikmachiliaj (Mateo 5:28; 6:24; 7:12). Jesús no kijtoj ke uelis tiyolpakiskej komo tikmatij tein Dios kineki maj tikchiuakan uan ijkon tikchiuaj (Lucas 11:28).

• Jesús techmachtij keniuj moneki titetasojtaskej. Tein yejua kijtouaya uan tein kichiuaya kinpaleuiaya oksekin maj no ijkon kichiuanij. Biblia kijtoua: “In tagayot kimoukamatiaj de ne tanextililisme. Porin Jesús kinnextiliaya in takakini ika chikaukatanauatil” (Mateo 7:28, 29). Se tonal, kiniluij: “Xiktasojtakan naken namechtauelitaske”. Uan no, yejua kichiuak se netataujtil ininka akin kimiktijkej: “Notajtsin Dios, xikintapojpolui nijin taka porin amo kajsikamatij toni kichiutokke” (Mateo 5:44; Lucas 23:34).

Jesús yejua akin kuali techixyekanas. Kuali kimati keniuj taixyekanas, techtasojta uan kineki techpaleuis. Sayoj ke, ¿kemanian taixyekanas?