¿UAN TEJUATSIN? ¿TIONMOTAJTANIANI NEJON KEMAN TIKONITA SE TETSAUIT? ¿TIKONPANOUANI SE UEYI TEKOKOJKAYOT TEIN KICHIUANI XIKONNEMILI KE DIOS AMO MOKA MOTEKIPACHOUA?

Sheila, akin nemi Estados Unidos akin ikalyetouanij semi taneltokaj, kijtoua: “Keman nikatka ninojnel uan hasta keman nimoskaltij nikneltokaya ke nemi Dios porin nikmati ke yejuatsin toTachijchiujkauj, sayoj ke amo nikmachiliaya ke niktasojtaya. Maski nikmatia ke uelia nechitaya niknemiliaya ke amo semi noka motekipachouaya. Amo nikneltokaya ke nechtauelitaya, sayoj ke amo no nikneltokaya maj noka motekipacho”. ¿Keyej ijkon tanemiliaya? Yejua kimelaua: “Nochankauan uan nejua miakpa semi titajyouijkej uan moitaya ke Dios nion tepitsin techpaleuiaya”.

Ijkon kemej Sheila, xa tejuatsin tiontaneltoka itech Dios akin nochi ueli kichiua, sayoj ke tionmotajtania ox moka motekipachoua. Job, se takat yolmelauak akin takuaujtamatia itech ichikaualis uan itamatilis Dios no motajtanij nejon (Job 2:3; 9:4). Satepan ke semi tajyouij uan amo kichiayaok tein kuali, kitajtanij Dios: “¿Keyej amo tikaua maj nimitsita uan tinechita kemej akin mitsixnamiki?” (Job 13:24).

Sayoj ke ¿toni kijtoua Biblia? ¿Itajtakol Dios maj titajyouikan? ¿Kitekipachoua tein techpanoua tinochin uan tisejsemej? ¿Keniuj uelis tikmatiskej ox techixmati, techajsikamati uan ox techpaleuia keman tikpiaj ouijkayomej?

Itech okseki tamachtilismej, tikitaskej keniuj tein Dios kichijchiuak uan Biblia kinextiaj ke yejuatsin toka motekipachoua (Romanos 1:20). Keman okachi tikonixmatis toTachijchiujkauj, okachi tikonmatis ke yejuatsin mitsontasojta (1 Juan 2:3; 1 Pedro 5:7).