TETATMEJ
7. Xikonmachti maj kichiua tein kuali
¿TONI KIJTOSNEKI?
Akin kichiua tein kuali moixyekana ika nejon itech inemilis. ¿tikonchiua tein kuali? Komo ijkon, xa no tikonnextilis mokoneuan maj ijkon kichiuakan.
Akin kichiua tein kuali amo techikoita, kuali tekiti uan teajsikamati, nejin amo kiouijkisas kichiuas aksa komo momachtia desde telpoch.
BIBLIA KIJTOUA: “Xikmachti okichpil itech ojti kampa moneki yas, uan amo kikauas nion keman ueuentsintias” (Proverbios 22:6).
¿KEYEJ SEMI MONEKI?
Maj se kinnextili tein kuali axkan ke semi mokuij celulares. “Ika celulares, tokoneuan uelis kiitaskej seki taman tein uelis kinijtakos, ijkon kijtoua se temomaj akin monotsa Karyn. Ueliskia tokotsyetoskej touan uan no kiitstoskej tein pitsotik”.
BIBLIA KIJTOUA: “Akin semi takuaujtamatij [...] kimatij keniuj kuali kikuiskej inintanemilil uan ijkon ueli kimatij toni kuali uan toni amo” (Hebreos 5:14).
Maj no se kinexti tein kuali. Semi moneki maj se kijto “ika kualtakayot” uan “tasojkamatik”, uan ininka se motekipachos oksekin, se taman tein amo semi mochiua axkan, porin miakej sayoj kiitstokej inincelular.
BIBLIA KIJTOUA: “Xikinchiuilikan oksekin tein nankiuelitaskiaj maj namechchiuilikan” (Lucas 6:31).
¿TONI UELIS TIKONCHIUAS?
Xikonijto ke amo tikonchiua tein amo kuali. Taixmatinij kijtouaj ke telpochmej amo auilnemiskej, komo inintatuan kinnextilia ke amo kuali yetok nejon.
TEIN UELIS TIKONCHIUAS: Xikonnojnotsa mokoneuj ika se taman tein amo kuali tein yekin mochiuak, para tikonnextilis ke moneki kichiuas tein kuali. Komo mokakik ke aksa kimiktijkej, uelis tikoniluis: “¡Amo kuali tein kichiujkej! ¿Keyej tiknemilia ke miakej temiktiaj?”.
“Tokoneuan kuali taixpejpenaskej, komo kimatij toni tein kuali uan toni tein amo kuali” (Brandon).
Xikinmachti maj kuali monejnemiltikan. Konemej uelis kinextiskej ke ininka motekipachouaj oksekin, uelis kijtoskej “ika kualtakayot” uan “tasojkamatik”. Se amatajkuilol kijtoua: “Keman konemej kiajsikamatij ke amo sayoj mochiuas tein yejuan kinekij, ta ke kipiaj ininchankauan, akin iniuan momachtiaj, uan kampa nemi, okachi kinekiskej kinpaleuiskej oksekin” (Parenting Without Borders).
TEIN UELIS TIKONCHIUAS: Xikonilui mokoneuan maj kichiuakan seki tekimej ompa kalijtik, ijkon momatiskej ke moneki kinpaleuiskej oksekin.
“Komo mokoneuan momachtiaj kichiuaskej seki tekimej ompa kalijtik, keman nemiskej ininselti amo tajyouiskej, porin ipa momattoskejya” (Tara).
