Maski moneki tiojtokaskej kampa tel koujtaj oso tikisaskej maski kioujtos, tiitaixpantijkauan Jiova nochipa tiyouij tonechikoluan. ¿Keyej semi timochikauaj timonechikoskej iniuan tokniuan maski tikpiaskej ouijkayomej itech tonemilis oso titelsioujtoskej porin titekitikej nejon tonal?

Techpaleuia maj tikixnamikikan ouijkayomej itech tonemilis. Keman tatitanil Pablo kijtoj ke moneki tiyaskej nechikolmej, kijkuiloj: “Ma tiktemolijtiyakan de keniu timopaleuijtiyaske se uan okse” (Hebreos 10:24). Nejin kijtosneki ke moneki timoixmatiskej keniuj tinemij tisejsemej. Ika okseki tajtolmej, techyolchikaua maj timotekipachokan ininka oksekin. Keman tikinixmatij oksekin akin pouij itech tonechikol, tikmatij ke sekin kiixnamikinij ouijkayomej kemej tein tejuan uelis tikpanotoskej uan no tikmatij ke yejuan uelis techpaleuiskej maj tikixnamikikan nejon ouijkayomej.

Techpaleuia maj tikinpiakan yekmelauj totasojikniuan. Itech nechikolmej timosentiliaj, amo iniuan akin sayoj tikinixmatij, ta akin yekmelauj kuali iniuan timouikaj. Uan no, kemansa timosentiliaj uan timoixpetaniaj kemej Dios kiyolpaktia. ¿Keniuj techpaleuia nejon? Kichiua maj okachi timopoujkaitakan, uan ijkon mochikaua netasojtalis tein techsentilia. Uan keman tokniuan kipiaj ouijkayomej, ijsiujka tiktemouaj keniuj tikinpaleuiskej porin ipa kuali iniuan timouikajya (Proverbios 17:17). Keman kuali timouikaj iniuan nochin akin touan monechikouaj, tiknextiaj ke timotekipachouaj se iuan okse (1 Corintios 12:25, 26).

Timitsonyoleuaj xikonixpejpena motasojikniuan akin kichiujtokej itanejnekilis Dios. Nejon tasojiknimej tikonajsis iniuan itaixpantijkauan Jiova. Amo xikonkaua maj nion teyi mitsontsakuili touan xionmonechiko.

• ¿Keyej semi kuali maj timonechikokan iniuan akin kichiuaj kemej Cristo?

• ¿Kemanian tikonuelitaskia touan tionmonechikos?