DANIEL katka se israelita tein amo kikauaya Dios tein kiuikakej Babilonia keman katka telpoch, tepitsin achto ke kiixpoloskiaj Jerusalén. Yejua uan oksekin judíos, maski moajsiaj temako Babilonia, kinkauayaj maj kichiuakan seki taman. Itech nochi xiujmej keman Daniel nemik itech nejon altepet, Dios nochipa kipaleuij. Uan se tonal, kimakixtij keman kipantamotkej kampa moajsiaj tekuanimej, uan kiitaltij tein mochiuaskia miak xiujmej satepan. Tein okachi motelneki tein Daniel kijtoj, kipia ke kiitas iuan Mesías uan iTekiuajyo Dios.

Keman ejkoskia Mesías. ¿Kemanian monekia kichiaskej itekitikauan Dios maj ejko “Mesías Tayekankej”? Daniel kimelauilijkej ke panoskia 69 semanas ika xiujmej. Nejin peuaskia mopouaskia keman tanauatiskiaj maj moyekachijchiua tepamit tein kiyoualouaya Jerusalén. Kemej se semana kipia chikome tonalmej, se semana ika xiujmej kijtosneki chikome xiujmej. ¿Kemanian motanauatij maj moyekachijchiua Jerusalén? Itech xiuit 455 achto itech totonaluan, miak xiujmej satepan ke nemik Daniel. Komo ijkuak peua tikpouaj 69 “semanas” —oso 483 xiujmej⁠—, techajxitia itech xiuit 29 itech totonaluan. ¿Toni panok itech nejon xiuit? Satepan tikitaskej. Daniel no kimatiltijkej ke Jesús ‘kitekiskiaj’ oso kimiktiskiaj, uan ijkon kiixtauaskia imin tajtakol taltikpakneminij (Daniel 9:​24-​26).

Mesías eskia Tekiuaj ne iluikak. Dios kiitaltij Daniel se teisa tein semi kimoujkaitak. Kiitak ke “aksa kemej se ikonetsin taltikpaknenkej” —tein katka yejua Mesías⁠— motokij kampa Dios taixyekana ne iluikak. Ompa, Jiova kimaktilij “taixyekanalis uan poujkaitalis uan tekiuajyot”, se taixyekanalis tein uejkauaskia nochipaya. Daniel no kimatiltijkej ke Tekiuaj Mesías, taixyekanaskia imiuan “taixpejpenalmej tein iaxkauan akin Okachi Ueyichiujkej” (Daniel 7:​13, 14, 27).

Tekiuaj kinixpolos nochi taltikpak tekiuajyomej. Dios kipaleuij Daniel maj kimatini toni kijtosnekia se takochitalis tein kimoujtiaya Nabucodonosor akin tekiuajtia Babilonia. Yejua kiitak se ueyi estatua tein itsontekon chijchiujtoya ika oro, iyolixpan uan imauan ika plata, ipox, itajkoyan uan ikesuan ika cobre, itankuay uan imetskoujyo ika hierro uan imetsuan ika hierro tamanelol ika sokit. Ompa, se tet tein kisak itech se tepet kimotak imetsko tein amo takuauak uan mokauak talnex. Daniel kimelauilij tekiuaj ke itsontekon estatua tachijchiuj ika oro kijtosnekia Babilonia, uan okseki kijtosnekia uejueyi taltikpak tekiuajyomej tein satepan ualaskiaj. ITekiuajyo Dios peuaskia tekitiskia keman tantiaskiajya nejon tekiuajyomej —nejin kijtosneki imetsuan tamanelol ika hierro uan sokit⁠— uan kintamiskia nochin taltikpak tekiuajyomej. Uan yejua ualtaixyekanaskia nikan taltikpak nochipaya (Daniel, capítulo 2).

Maski Daniel katka tel xiuejya, uelik kiitak keman Babilonia uetsik temako. Ijkon kemej moijtojka, tekiuaj Ciro kiteuij nejon altepet uan kitanik. Tepitsin satepan, ijkuak ajsik 70 xiujmej tein moijtojka ke mokauaskia taseltijkan imin tal judíos, kinkaujkej maj kisanij uan maj mokepanij ompa. Ika imin nepaleuil taixyekananij, tiopixkamej uan tanauatianij tein amo kikauayaj Jiova, judíos kiyekachijchiujkej Jerusalén uan itemplo Jiova. Sayoj ke ¿toni mochiuak keman ajsik 483 xiujmej tein moijtojka?

​(Motaksaltia itech amaix Daniel.)