TAXELOL 2
Kinkixtijkej itech Xochital
Se ángel taixnamikkej kichiuak maj Adán uan Eva amo kitakamatinij Dios. Nejin kiualkuik tajtakol uan mikilis
MIAK xiujmej achto ke nemiskiaj taltikpakneminij, Dios kinchijchiuak seki espíritus, tein moixmatij kemej ángeles. Semej, tein satepan motokaytij Satanás oso Amokuali, taixnamikik uan kikajkayauak Eva. Kichiuak maj kikua kuoujtakilot tein Dios kiniluijka maj amo kikuanij.
Ika se kouat, Satanás kinojnotsak Eva uan kiajsikamatiltij ke Dios kintsakuiltilijtoya teisa tein kuali yejua uan inamik. No kiiluij ke komo kikuaskiaj kuoujtakilot, amo momikiliskiaj. Ika nejin kiteajsikamatiltij ke Dios kinkajkayaujtoya. Amokuali kintanejnektij, ta kiniluij ke komo amo kitakamatij Dios, kipiaskiaj ueyi tamatilis uan ueliskiaj kichiuaskiaj tein kinekiskiaj. Sayoj ke nochi nejin katka se ueyi takajkayaualis tein yekinika moijtoj. Tein melauj, nejon taixnamikkej tajtantoya nejin: ¿Kinamiki Dios maj taixyekana itech iluikak uan taltikpak? ¿Melaujkej itanauatiluan? ¿Techpaleuia komo tiktakamatij?
Eva kineltokak nejon xolopijyot, peuak kiixneki nejon kuoujtakilot uan kikuaj. Ompa, kimakak inamik uan no kikuaj. Maski moitaya ke amo teyi kijtosnekia, ika nejon kinextijkej ke taixnamiktoyaj uan tajtakojtoyaj. Yejuan kuali kimatiaj tein kichiujtoyaj: kiixnamiktoyaj itaixyekanalis Dios akin kinchijchiuak, akin kinmakak nochi, tein iuantiaya nemilis tein amo kipiaya tajtakol.
“Yejua mitskuaxamanis uan tejua tikotsxamanis.” (Génesis 3:15)
Dios kijtoj toni tatsakuiltilis kiseliskiaj taixnamikinij. Yekinika motenkauak ke satepan kiualtitaniskia se Tekoneuj oso Temakixtijkej tein kiixpoloskia kouat oso Satanás. Satepan kijtoj ke momikiliskiaj Adán uan Eva, sayoj ke Dios kiniknelij imin koneuan tein satepan nemiskiaj, yejika amo niman momikilijkej taixnamikinij. ¿Toni nechialis kipiaskiaj imin koneuan? Jiova motenkauak ke akin kiualtitaniskia, kiixpoloskia nochi tein amo kuali tein kiualkuitok nejon taixnamikilis tein mochiuak Edén. Sayoj ke ¿akoni eskia nejon Temakixtijkej tein kiualtitaniskia, uan keniuj kichiuaskia tekit tein Dios kinekia maj kichiua? Tanankilil yolik peuak motemakak ijkon kemej moijkuilojtiaj Biblia.
Ika tamik, Dios kinkixtij Adán uan Eva itech Xochital. Yejuan monekia tel chikauak tekitiskej uan ijkon moixpanoltiskiaj. Ijkuakya Eva kipiak yekinika ikonetsin, Caín. Satepan Adán uan Eva kinpiakej okseki konemej, okichpipil uan siuapipil. Se motokaytij Abel uan okse Set, iuejkaujtat Noé.
(Motaksaltia itech Génesis capítulos 3 a 5 uan Apocalipsis 12:9.)
