MAK xiujmej achto ke israelitas kalakiskiaj Canaán, Jiova motenkaujka iuan Abrahán ke nejon tal kinmakaskia tein itech ualeujtoskiaj. Uan axkan israelitas tein kinixyekanaya Josué yaya kikuitij nejon Tal tein Dios motenkaujka kinmakas.

Dios kiitak ke tein nemiaj Canaán monekia ixpoliuiskej, ta tel tateuianij uan auilneminij katkaj. Yejika kinnauatij israelitas maj senkis kinixpolouanij nochi altepemej tein pouia Canaán.

Josué achto kintitanik ome tapijpianij. Yejuan kalakkej itech altepet Jericó uan mokaujkej ichan se siuat tein motokaytiaya Rahab. Maski yejua kimatia ke nejon takamej katkaj israelitas, kinkauak maj ompa motatianij. ¿Keyej? Porin Rahab kikakik keniuj Jiova ika ichikaujkauelilis kinmakixtij itekitikauan uan yejika takuaujtamatia iuan Dios. Uan kichiuak maj nejon ome tapijpianij kiyekiluianij ke amo ixpoliuiskiaj yejua uan ichankauan keman kinteuiskiaj.

Satepan, keman israelitas kalakkej Canaán uan kiyoualojkej Jericó, Jiova kichiuak maj xitini tepamit tein kiyoualouaya altepet, uan sayoj Rahab uan ichankauan makiskej. Yejua nejon yekinika tal tein Josué uan itateuijkauan kitankej. Kinuikilij chikuasen xiuit kitamitaniskej uejueyi Tal tein Dios motenkaujka kinmakas. Satepan, kinxejxelouilijkej uejueyi kalyetouanij israelitas.

Se tonal, keman Josué kiuikaya miak xiujmejya kitekitilijtoya Dios uan yaya momikilitia, kinsentilij nochin israelitas. Kinelnamiktij keniuj Dios kinpaleuij imin uejkaujtatuan, uan kinyolchikauak maj amo keman kikauanij Dios. Sayoj ke ijkuak momikilij Josué uan nochin tein iuan tekitiaj, israelitas kikaujkej Jiova uan peuak kinueyichiuaj okseki tiotsitsin. Itech okseki 300 xiujmej, miakpa amo kitakamatkej itanauatiluan Jiova. Uan keman ijkon kichiuayaj, kintemakaya imin mako filisteos uan oksekin taixnamikinij. Sayoj ke nochipa keman kitsajtsiliayaj Jiova maj kinpaleui, kinmakaya se temakixtijkej. Senochia moajsikej 12 temakixtianij tein moixmatiaj kemej tamelauanij.

Itech xiujmej keman nemiaj nejon tamelauanij tein moijtoua itech amaix Jueces, peua ika Otniel uan tami ika Sansón, se takat tein okachi chikauak katka. Nochi tein ika motajtoua itech nejon amaix, kinextia nejin taman tein motelneki: komo tiktakamatij Jiova, kuali kisas tein tikchiuaskej, uan komo amo, tikpanoskej ouijkayomej.

​ (Motaksaltia itech Josué, Jueces uan Levítico 18:​24, 25.)