Juan 18:1-40
18 Keman kitamiijtoj nejin, Jesús yajki iniuan imomachtijkauan oksekopa den atauit Cedrón uan iniuan kalakik kampa tatokalaj.
2 Judas, akin yaya kitemaktiti, no ixmattoya ompa, porin Jesús miakpa mosentiliaya ompa iniuan imomachtijkauan.
3 Yejua ika, Judas ajsito iniuan seki soldados uan inintajpixkauan uejueyi tiopixkamej uan fariseos. Ajsitoj ika tauilmej uan teposmej tein ika tateuiaj.
4 Kemej Jesús kimatia nochi tein yaya kipanoti, kinnamikito uan kintajtanij:* “¿Akoni nankitemouaj?”.
5 Kinankilijkej: “Jesús akin kayot Nazaret”. Yejua kiniluij: “Nejua niJesús”. Uan Judas, akin kitemaktij, no iniuan yetoya.
6 Sayoj ke, keman kiniluij “Nejua niJesús”, tsinkiskej uan uejuetsitoj talpan.
7 Yejua ika, oksepa kintajtanij: “¿Akoni nankitemouaj?”. Kiluijkej: “Jesús akin kayot Nazaret”.
8 Jesús kinnankilij: “Namechiluijya ke nejua. Yejua ika, komo nejua nanechtemojtokej, xikinkauakan maj yakan nejin takamej”.
9 Nejin panok para maj mochiuani tein yejua kijtojka: “Amo nikpoloj nion se akin tinechinmaktilij”.
10 Uan Simón Pedro, akin kipiaya se machete tein ojkan tenej,* kiualkixtij uan kinakaskotonak itakeual tayekankatiopixkat. Kikotonilij inakas tein kipiaya iyekmakopa. Nejon takeual monotsaya Malco.
11 Sayoj ke Jesús kiluij Pedro: “Xikalaki machete itech icubierta. ¿Tiknemilia ke amo moneki nitayis copa tein nechmakak noTajtsin?”.
12 Soldados uan tayekankasoldado* uan inintajpixkauan judíos, kikitskijkej Jesús uan kiilpijkej.*
13 Achto kiuikilijkej Anás porin katka imontat Caifás, akin katka tayekankatiopixkat nejon xiuit.
14 Tein melauj, nejin Caifás katka akin kiniluijka judíos ke okachi tapaleuiskia maj miki sayoj se takat para kinpaleuis nochin.
15 Uan Simón Pedro uan okse imomachtijkaikniuj kitojtokatiayaj Jesús. Nejon okse imomachtijkauj, moixmatia iuan nejon tayekankatiopixkat, yejua ika kalakik iuan Jesús ikalixpan tayekankatiopixkat,
16 sayoj ke Pedro mokauak kalampa, itech puerta. Yejua ika nejon imomachtijkauj Jesús akin iuan moixmatia tayekankatiopixkat, kisak uan tajtoto iuan siuapil* akin tajpiaya kaltenoj uan kikalakij Pedro.
17 Uan siuapil akin tajpiaya kaltenoj kitajtanij Pedro: “¿Melauj ke tejua no tiktojtoka nejon takat?”. Yejua kinankilij: “Amo”.
18 Kemej taseseyaya, takeualmej uan tajpianij taxotaltijkaj* uan ompa ijkatoyaj tajtanakastan mototonijtoyaj. Pedro no iniuan mototonijtoya.
19 Ueyi tiopixkat* kitajtanij Jesús akonimej katkaj imomachtijkauan uan toni tamachtiaya.
20 Jesús kinankilij: “Nitanojnotsani ininixpan miakej. Nochipa nitamachtij kampa taueyichiuaj judíos uan itech templo, kampa nochin judíos mosentiliaj, uan amo teyi nikichtakaijtoj.
21 ¿Keyej tinechtatsintokia nejua? Xikintatsintoki akin kikakkej tein nikiniluij. Ne yetokej, yejuan kuali kimatij tein nikijtoj”.
22 Keman Jesús kijtoj nejin, semej tajpianij akin ompa yetoyaj kiixtaxkaloj uan kiluij: “¿Ijkon tiknankilia ueyi tiopixkat?”.
23 Jesús kinankilij: “Komo nikijtoj teisa tein amo kuali yetok, xinechilui toni; sayoj ke komo tein nikijtoj melauak, ¿keyej tinechixtaxkaloua?”.
24 Uan Anás kititanilij tayekankatiopixkat, Caifás. Uan Jesús ilpitoyaok.*
25 Simón Pedro kisentokaya ompa ijkatoya, mototonijtoya. Uan kitajtanijkej: “¿Melauj ke tejua no tiktojtoka?”. Yejua kijtoj: “Amo, nejua amo niktojtoka”.
26 Semej itakeualuan tayekankatiopixkat, akin katka ichankauj takat akin Pedro kinakaskotonka, kiluij: “¿Amo nimitsitak iuan kampa tatokalaj?”.
27 Sayoj ke Pedro oksepa kijtoj ke amo, uan nimantsin tsajtsik se pio.*
28 Uan kikixtijkej Jesús de ichan Caifás uan kiuikakej palacio kampa yetoya tekiuaj. Semi kualkan katka. Sayoj ke yejuan amo kalakkej palacio para amo mopitsotiliskej uan ijkon ueliskia takuaskej itech iluit tein monotsa Pascua.
29 Yejua ika Pilato kalankisak kampa yetoyaj uan kintajtanij: “¿Toni ika nankiteluiliaj nejin takat?”.
30 Yejuan kinankilijkej: “Komo nejin takat amo kitapanauiliskia tanauatil amo timitsualkuiliskiaj”.
31 Yejua ika Pilato kiniluij: “Xikuikakan uan xikixtalikan tein kinamiki kiselis ijkon kemej kijtoua namotanauatil”. Judíos kiluijkej: “Amo tikpiaj tanauatil para titemiktiskej”.
32 Nejin panok para maj mochiuani tein Jesús kijtojka keniuj yaya momikiliti.
33 Pilato oksepa kalakik palacio, kinotsak Jesús uan kitajtanij: “¿Tejua tiinintekiuaj judíos?”.
34 Jesús kinankilij: “¿Tejua tiknemilij tinechtajtanis nejin, oso oksekin noka mitsnojnotsanij?”.
35 Uan Pilato kiluij: “Tejua tikmati ke nejua amo nijudío. Akin nemij itech moaltepeuj uan uejueyi tiopixkamej mitstemaktijkej nomako. ¿Toni tikchiuak?”.
36 Jesús kinankilij: “NoTaixyekanalis amo poui nikan taltikpak. Komo noTaixyekanalis pouiskia nikan taltikpak, notapaleuijkauan tateuiskiaj para maj amo nechtemaktianij ininmako judíos. Sayoj ke, tein melauj noTaixyekanalis amo nikan poui”.
37 Yejua ika Pilato kitajtanij: “¿Kijtosneki ke tejua titekiuaj?”. Jesús kinankilij: “Kemaj, tejua tikijtojtok ke nejua nitekiuaj. Yejua ika niyolik uan yejua ika niualaj nikan taltikpak: para nikteixmatiltis tein melauak. Akin kitakamatis tein melauak, kikakis notajtol”.
38 Pilato kitajtanij: “¿Toni tein melauak?”.
Keman kitamiijtoj nejin, oksepa kalankisak kampa yetoyaj judíos uan kiniluij: “Nejua amo nikajxilia nion teyi tein amo kuali.
39 Uan no, itech Pascua namejuan namomattokej maj nikajkaua se akin tsaktok. ¿Nankinekij maj nikajkaua inintekiuaj judíos?”.
40 Yejuan oksepa peuak tsajtsij: “¡Amo, ta xikajkaua Barrabás!”. Uan Barrabás katka se tachtekkej.
Tajtolmelaualismej
^ Oso “kintajtoltij”.
^ Oso “espada”.
^ Nejin takat kinixyekanaya mil soldados.
^ Oso “kitsikojkej”.
^ Nejin siuapil katka takeual.
^ Oso “tichiujkaj”.
^ Nejin yejua Anás.
^ Oso “tsikaujtoyaok”.
^ Oso “kaxtil”.
