Juan 17:1-26
17 Keman kitamiijtoj nejin, Jesús ajkotachiak ne iluikak uan kijtoj: “NoTajtsin, ejkokya hora. Xikueyitali mokoneuj para maj mokoneuj mitsueyitali,
2 ijkon kemej tikmakak tanauatil para maj kinixyekana nochin, para maj yejua kichiua maj nemikan nochipaya nochin akin tejua tikinmaktilij.
3 Para nemiskej nochipaya moneki mitsixmatiskej tejua,* akin yekmelauj tiDios,* uan no moneki kiixmatiskej akin tikualtitanik, Jesucristo.
4 Nejua nimitsueyitalij nikan taltikpak; niktamichiuakya tekit tein tinechnauatij maj nikchiua.
5 Yejua ika axkan noTajtsin, xinechueyitali mouan ijkon kemej nietoya achto ke nemiskiaj akin nemij nikan taltikpak.
6 ”Nikinixmatiltij motokay akin tinechinmaktilij nikan taltikpak. Katkaj moaxkauan uan tinechinmaktilij, uan kichiuaj tein tikijtoua.
7 Axkan kimatkejya ke nochi tein tinechmakak ualeua momako;
8 porin nikinmatiltij tein tinechiluij uan yejuan kikakkej uan yekmelauj kimatkejya ke niualaj nimitsixnextiko uan kineltokakejya ke tejua tinechualtitanik.
9 Nimitstataujtia xikinpaleui yejuan; amo nimitstataujtia xikinpaleui nochin akin nemij nikan taltikpak, ta sayoj akin tinechinmaktilij, porin moaxkauan;
10 uan nochi tein nikpia moaxka, uan tein tikpia noaxka, uan yejuan nechueyitalianij.
11 ”Nejua amo nietotiok nikan taltikpak, sayoj ke yejuan mokauaj nikan taltikpak, uan nejua niouj nimitsajsiti. NoueyiTajtsin,* xikinyekpia* para maj moueyitali motokay, tein tejua tinechmakak, para maj yejuan senpouikan,* ijkon kemej tejuan tisenpouij.*
12 Keman iniuan nietoya nejua nikinyekpiaya para maj moueyitali motokay, tein tinechmakak; uan nejua nikinmatampauij uan nion semej ixpoliuini, ta sayoj akin kiixpolotij, para maj mochiua tein kijtoua Tajkuilolamatsin.
13 Sayoj ke axkan niouj nimitsajsiti, uan nikijtoua nejin keman nietokok nikan taltikpak para maj yejuan senkis yolpakikan ijkon kemej nejua.
14 Nikinmatiltij tein tinechiluij, sayoj ke akin nemij nikan taltikpak kintauelitaj porin amo pouij iniuan, ijkon kemej nejua amo no nipoui iniuan.
15 ”Amo nimitstataujtia xikinxelo para maj amo yetokan iniuan akin nemij nikan taltikpak, ta xikinmatampaui den Amokuali.
16 Yejuan amo pouij iniuan akin nemij nikan taltikpak, ijkon kemej nejua amo no nipoui iniuan.
17 Motajtol yejua tein melauak; ika motajtol ximoinxelouili* para maj mitstekitilikan.
18 Ijkon kemej tejua tinechualtitanik maj nitanojnotsaki, nejua no nikintitanik maj tanojnotsatij.
19 Nejua nimoxeloua* para nimitstekitilis, para maj yejuan no xeliujtokan* para mitstekitiliskej ika motajtol tein melauak.
20 ”Amo nimitstataujtia xikinpaleui sayoj yejuan, ta no akin nouan takuaujtamatiskej keman kikakiskej tein yejuan tamachtiaj,
21 para maj nochin yejuan senpouikan. Ijkon kemej tejua, noTajtsin, nouan tietok uan nejua mouan nietok, maj yejuan no touan yetokan; ijkon nochin kineltokaskej ke tejua tinechualtitanik.
22 Nejua nikinueyitalij ijkon kemej tejua tinechueyitalij para maj yejuan senpouikan, ijkon kemej tejuan tisenpouij:
23 nejua iniuan nietok uan tejua tietok nouan, ijkon yejuan yekmelauj senyetoskej. Ijkon nochin kimatiskej ke tejua tinechualtitanik uan tikintasojta yejuan ijkon kemej nejua tinechtasojta.
24 NoTajtsin, kampa nejua nietos nikneki maj no ompa yetokan akin tinechinmaktilij, para maj kiitakan ke tinechueyitalij porin peuak tinechtasojta achto ke peuaskiaj yoliskiaj akin nemij nikan taltikpak.
25 NoTajtsin, tejua nochipa tikchiua tein kuali yetok. Tein melauj, akin nemij nikan taltikpak amo mitsixmatij, sayoj ke nejua nimitsixmati uan akin tinechinmaktilij kimattokejya ke tejua tinechualtitanik.
26 Nikinixmatiltij motokay uan niksentokas nikteixmatiltis, para maj tetasojtakan ijkon kemej tejua tinechtasojta, uan ijkon uelis iniuan nietos”.
Tajtolmelaualismej
^ Oso “kisentokaskej mitsixmatiskej”. Nikan tajtol griego kinextia se taman tein kisentoka mochiua.
^ Oso “sayoj setsin Dios akin melauak”.
^ Oso “NoTajtsin akin tiyektik”.
^ Oso “xikinita”.
^ Oso “pouikan kemej yeskia sayoj se”.
^ Oso “tipouij kemej yeskia sayoj se”.
^ Oso “xikinchipaua”.
^ Oso “nimochipaua moixpan”.
^ Oso “chipaujkej moixpan”.
