1 Corintios 13:1-13
-
Se tetasojtas yejua tein okachi kuali (1-13)
13 Komo nitajtoua tataman tajtolmej uan kemej tajtouaj ángeles sayoj ke amo nitetasojta, sayoj niyeskia kemej se tepos tein chikauak komoni uan takuejsoua.
2 Komo ueli niktematiltia tein Dios nechiluia, nikajsikamati nochi tein amo kitematiltijtoya,* nikixmati nochi, semi nitakuaujtamati uan nejon nechpaleuia maj ueli nikinajchiua tepemej, sayoj ke amo nitetasojta, amo teyi nichiujkej.*
3 Komo niktemaka nochi tein nikpia para nikintamakas oksekin oso nimotemaktia para uelis nimoueyimatis* sayoj ke amo nitetasojta, nenkaj nochi tein nikchiua.
4 Akin tetasojta amo yolijsiui uan kualtakat. Akin tetasojta amo tenexikoluia.* Amo kijtojtinemi tein ueli kichiua, amo moueyimati,*
5 amo eliuisti, amo kitemoua tein sayoj yejua kipaleuis, amo niman kualani. Amo kipoujtiuj tein kichiuiliaj.
6 Amo yolpaki keman mochiua tein amo kuali, ta yolpaki keman mochiua tein kuali yetok.*
7 Nochi kijyouia, nochi kineltoka, nochi kichia, nochi kixikoua.
8 Tetasojtalis amo keman tapoloua.* Sayoj ke, ejkos tonal keman amo akinok uelis kitematiltis tein Dios kiluia, amo akinok uelis tajtos itech tataman tajtolmej,* amo akinok uelis kijtos tein oksekin amo kimatij porin ixpoliuiskej nejon tatiochiualismej.
9 Porin amo nochi tikixmatij uan amo ajsitok tiktematiltiaj tein Dios techiluia;
10 sayoj ke keman ejkos tein ajsitok, tein amo ajsitok ixpoliuis.
11 Keman katka niokichpil, nitajtouaya kemej okichpil, nitanemiliaya kemej okichpil uan nitaixejekouaya kemej okichpil. Sayoj ke axkan ke nimoskaltijya, amo nikchiuaok tein se okichpil kichiua.
12 Axkan amo tiyektachiaj porin kemej yeskia timoixitstokej itech se teposteskat, sayoj ke satepan tiyektachiaskej kemej yeskia timoixitstoskiaj iuan aksa.* Axkan amo nochi nikixmati, sayoj ke satepan senkis nikixmatis Dios ijkon kemej yejua senkis nechixmati.
13 Sayoj ke mokauaskejok nejin eyi taman: titakuaujtamatiskej, tikchiaskej tein kuali uan titetasojtaskej. Sayoj ke tein okachi tayekantok yejua titetasojtaskej.
Tajtolmelaualismej
^ Xikonita tein Dios amo kitematiltijtoya.
^ Oso “amo teyi nikualtia”.
^ Oso “nimoueyinekis”.
^ Oso “amo chauati”.
^ Oso “amo moueyineki”.
^ Oso “ika tein melauak”.
^ Oso “amo keman tami”.
^ Nejin kijtosneki se tajtos okseki tajtolmej porin Dios tepaleuia ika ichikaualis.
^ Oso “akin”, “akaj”.
